Mannu Maganu Yaannore Macciishshanno Gede Kaaꞌle
1. “Mangistekki Daggo!” yinannihu Awuraajju Gambooshshira fultino birosherubba hiikkuriiti? Kuriuu birosherubba rosiisate injiitanno gede assinori maati?
1 “Mangistekki Daggo!” yaannohu Awuraajju Gambooshshira, Maganu Yaannore Macciishshite Hegerera Heeꞌri yitannotinna haransine qixxeessinoonniti Maganu Yaannore Macciishshi yinanniri lame haaruudde birosherubba fultinota qaagginanni. Tenne lamente birosherera nabbambanniri batiꞌrinokki daafira qallaalunni tira dandiinanni. Maganu Yaannore Macciishshite Hegerera Heeꞌri yinanni biroshere fultu waro nafa 431 afiinni tirroonni.
2. Kuriuu birosherubba qixxeessinoonnihu roorenka ayeooraati?
2 Kuriuu birosherubba qixxeessinoonnihu roorenka ayeooraati? Hanni roore wote alamete qooxeessira tuncu yaannoha mito mito coye laꞌno:
• Mittu halashshaanchi mittu manchi ledo Qullaawu Maxaafire umo hasaawanno wote woyi wirro mare hasaawisanno wote, kuni manchi tamaarinokkita woyi hakkeeshshi geeshsha nabbawe afannokkita buuxanno.
• Mittu halashshaanchi qole borronke tirroommokki afiinni woyi boode borro calla tirroommo afoo coyiꞌranno mannira sabbakanno. Woyi mittu qachira heeꞌrannohu batinyu manni roore wote coyiꞌranno afoo nabbawa dandaannokkiha ikkanno.
• Mittu halashshaanchi danqootu afoo horoonsiꞌre qachisira heedhanno danqootira sabbakanno.
• Mittu anni nabbawa dandiinokki qaaqqisira Qullaawu Maxaafi halaale rosiisa hasiꞌranno.
3. Maganu Yaannore Macciishshi yinanni biroshere qixxeessinoonnihu hiittoonniiti?
3 Qixxeessinoonnihu Hiittoonniiti? Maganu Yaannore Macciishshi yinanni birosherera nabbambanniri lowo geeshsha shiimaho; qoleno mittu mittunku qooli hunda qara hedo xawissanno xiqisenna harancho coyi fooliishsho no. Konni garinni qixxeessinoonnihu mayiraati? Hanni mittu manchi nabbawa dandiitinannikki afiinni borreessinoonni biroshere uyinoꞌnehu gede assitine hedde; miteekkite borreessinoonni fidalla affinoonnikkita ikkitara dandiitanno. Tini biroshere biifado misilla afidhinota ikkituro nafa, adhate hakkeeshsha quqquxxe yitannoꞌne? Quqquxa hooggaꞌnera dandiitanno. Hattonni, nabbawa dandaannokki manna, nabbambanniri batiꞌrino borro mulenni ceeꞌmishshansara dandiitanno. Konni daafira, mittu mittunku qoolira hasaawate kaaꞌlitannoti danchu garinni qixxeessinoonni misile no; mitte misilere hasaambe kaꞌniro aantete hasaambanni misile leellishshannoti worbicho labbanno malaatta no.
4. Maganu Yaannore Macciishshite Hegerera Heeꞌri yinanni biroshere qixxeessinoonnihu hiittoonniiti?
4 Maganu Yaannore Macciishshite Hegerera Heeꞌri yinanni birosherera noo misilla Maganu Yaannore Macciishshi yinanni birosherera noote. Tenne biroshere hakkeeshshi geeshsha nabbawa dandiitannokkire woyi xaalla nabbawa rosiisidhanni noore xiinxallisate qixxeessinoonni. Tenne biroshere horoonsiꞌne Maganu Yaannore Macciishshi yinanni biroshere xiinxallitannore nafa xiinxallisa dandiinanni. Lamu qoolira xawinsoonni rosi hanafanno qooli baalunkura guraanni umoho worroonni xaꞌmo no. Qoleno, hatte qoollara misillate ledo assaawenna xiqisubba no. Haammata qoollara hundi adda, xiinxallinsanni manchi dandoo garinni xiinxallinsanniti ledote assaawenna xiqise saaxinete giddo no.
5. Kuriuu birosherubba mamootenna hiittoonni ela dandiinanni?
5 Horoonsiꞌra Dandiineemmo Gara: Aganu birosherubba ellanniha ikka hoogirono, minunni mine haꞌne soqqammeemmo wote coyishiinsheemmo manna kaaꞌlitannonsaha ikkiro, kuri birosherubba ela dandiineemmo. (“Ela Dandiinanni Gara” yitanno saaxine laꞌe.) Albaanni coyishiishshinoonni manna wirro hasaawissinanni wote, hasatto noosi manchira nabbambannire massitinoonnisita kultine tenne biroshere ela dandiitinanni.
6. Kuriuu birosherubba horoonsiꞌne Qullaawa Maxaafa xiinxallisa dandiinannihu hiittoonniiti?
6 Maganu Yaannore Macciishshi yinanni biroshere xaꞌmo afidhinokki daafira, tenne biroshere xiinxallinseemmohu Qullaawu Maxaafi Roso yinanni maxaafa xiinxallinseemmohu gede xaꞌmotenninna dawarotenni diꞌꞌikkino. Duuchunku budira mannu xagge macciishsha baxanno. Konni daafira, tenne birosherera noo misilla horoonsidhine Qullaawu Maxaafi giddo noo xagge kulle. Misilla maa leellishshannoro xawisse. Iibbado giddonni coyidhe. Xiinxallissinanni manchi leellinosire kulanno gede xaꞌme. Hakko qoolira hundaho noo xiqise nabbabbine, tini xiqise hasaawaꞌne daggaffanno gara xawisse. Xiinxallissinanni manchi tasaattafanno gede assatenna xiinxallanni noore wodanchinoronna teꞌee afate xaꞌmo xaꞌme. Xiinxallissinanni manchi Maganu Yaannore Macciishshite Hegerera Heeꞌri yinanni biroshere xiinxallannoha ikkiro, mitte mittenta misillare hasaabbinanni wote, misilete ledo noo assaawenna xiqisubba nabbabbe.
7. Qullaawa Maxaafa rosiinseemmo manchi ayyanaamittetenni lophanni haꞌranno gede kaaꞌla dandiineemmohu hiittoonniiti?
7 Rosaanchu Ayyaanaamittetenni Lophanno Gede Kaaꞌle: Xiinxallissinanni wote rosaanchu Yihowa Qaale umisi nabbawe egenno afiꞌrate, nabbambanni gara rosate hasatto kalaqantasira dandiitanno. (Maat. 5:3; Yoh. 17:3) Konni daafira, Maganu Yaannore Macciishshi yinanni biroshere xiinxallissinanniha ikkiro, galtine hossinanni rosaancho nabbawa dandaanno gara rosiissinesi, Maganu Yaannore Macciishshite Hegerera Heeꞌri yinanni biroshere xiinxallisa jammartinara dandiitinanni. Xiinxallissinanni biroshere baxxuta ikkiturono, rosaanchu biroshere gudino daafira calla cuuamate ikkado ikkino yaa diꞌꞌikkino. Konni daafira, Qullaawu Maxaafi Roso yinanni maxaafa woyi Qullaawa Maxaafa seekke huwatate kaaꞌlitannosita wole borro xiinxallisa hasiissannoꞌne.
8. Haaro birosherubba afiꞌranke hagiirsiissinonkehu mayiraati?
8 Mannu hegerera heeꞌrate, kalqete alamera Aliidihu yaannore macciishsha hasiissannonsa. (Isa. 55:3) Yihowa “baalunku gari manni,” nabbawa dandaannokkihuno, isi yaannore macciishshanno gara afara hasiꞌranno. (1 Xim. 2:3, 4) Mannu Maganu yaannore macciishshanno gede rosiisate kaaꞌlitannonketa kuriuu birosherubba afiꞌnoommohura lowonta hagiidhinoommo!
[Qoola 3 noo saaxine]
Ela Dandiinanni Gara
Layinkinna sayikki qoola fante leellishshanni, togo yite xaꞌmi: “Togoo alamera heeꞌroottoro baxisannohe? [Dawaro qola geeshsha agari.] Qullaawu Maxaafi Maganu muli barri giddo baxissannotanna keeru woꞌminota, hattono buximanna xibbu nookki alame abbannota kulannonke. Tini xiqise hakko heeꞌrate maa assa hasiissannonkero xawissanno. [Sayikki qoolira umoho noota Isayyaasi 55:3 nabbawi.] Tini xiqise Maganunniwa ‘shinqeemmo’ gedenna isi yaannore ‘macciishshineemmo’ gede kultannonke. Ikkina, Maganu yaannore macciishsha dandiineemmohu hiittoonniiti?” Shoolkinna ontikki qoola fanteenna, tenne xaꞌmo dawaro hasaabbe. Muddamannoha ikkiro kayinni, biroshere uyiteennasi wole wote hasaabbinanni gede qaxaro amadi.