Qullaawa Maxaafa Xiinxallanno Manna Afiꞌnannita Onte Doogo
1. Killilenke giddo Qullaawa Maxaafa xiinxallanno manna afiꞌra qarra ikkituro, ma assa hasiissannonke? Mayira?
1 Qullaawa Maxaafa xiinxallissinanni manna afiꞌra qarrissinoꞌneni? Xaano hasiꞌra agurtinoonte. Yihowa hexxo mudhite fajjosi assa agurtannokkire maassiꞌranno. (Gal. 6:9) Tennera kaaꞌlitannoꞌneta onte doogga aanchine xawinsoonni.
2. Xiinxallo jammarsiisate xaaddote xaꞌma dandiineemmohu hiittoonniiti?
2 Xaaddote Xaꞌma: Batinyu manni Agarooshshu Shaenna Baqqi Yiiyye! yinanni metseetta elleemmota afinoha ikkirono, Qullaawa Maxaafa xiinxallinseemmota afa hoogara dandaanno. Minunni mine soqqantinanni wote, xiinxalla hasiꞌrannotanna teꞌee mayira xaaddote dixaꞌmitinanni? Wirro hasaawissinanniha hasatto noo mannano Qullaawa Maxaafa xiinxalla hasiꞌrannoronna teꞌee xaꞌma dandiitinanni. Kuni manni dihasiꞌneemmo yiiro, borro uyitinanni hasatto heedhannonsa gede kaaꞌla dandiitinanni. Mittu rodii mittu minaanniranna minaamara haammata diro metseetta massanni keeshshino. Mitto barra haarote fultino metseetta masse kae haꞌrara alba wodhe heeꞌre, “Qullaawa Maxaafa xiinxalla hasidhinanni?” yee xaꞌmokka yee hedi. Hatto yee xaꞌmita insa, ‘Ee hasiꞌneemmo’ yitu; togo yitanno yee isi horo dihedino. Xa insa cuuantinoreeti.
3. Gambooshshe daanno manni kawoote mitu roduuwi ledo Qullaawa Maxaafa xiinxallanni noo yee heda garaho? Xawisi.
3 Gambooshshenke Daanno Manna: Songote gambooshshe daanno manna kawoote mittu rodii xiinxallisanni noonsa yine hendoonke. Mittu rodii togo yiino: “Xiinxallisoommo manni giddo darate aleenni ikkannoha jammarsiisoommohu gambooshshe dayinowa coyishiisheeti.” Mitte rodoo manna waajjitannota mitte mancho gamba yite hasaawisate murcidhu; tenne manchori lame seenni cuuamino roduuwaati. Tini mancho 15 diri geeshsha gambooshsheho Mangistete Addaraashe dagganni keeshshitino; gambooshshu xaalla jammare heeꞌreenna dagganno, goofanni heeꞌreenna fulte hadhanno. Tini mancho Qullaawa Maxaafa xiinxallate maahoyye yitu, hakkiinnino halaalu minira daggino. Ise xiinxallissu rodoo togo yitino: “Xiinxalla hasidhannotanna teꞌee xaꞌmummakki 15 diro keeshshaꞌya lowo geeshsha gaabbissinoe!”
4. Xiinxallanno manna mannu aanaanni afiꞌra dandiineemmohu hiittoonniiti?
4 Wolu Manni Aanaanni: Mitte rodoo, roduuwu manna Qullaawa Maxaafa xiinxallissanno wote koyissannose gede assidhanno. Hakkiinnino xiinxallote jeefora xiinxallissanno rodoo faqqadisiisidhe, ‘Xiinxalla hasiꞌrannohu afootta manni nooni?’ yite rosaancho xaꞌmitanno. Wirro martine hasaawissinanni manchira Qullaawu Maxaafi Roso yinanni maxaafa eltinanni wote, “Konne maxaafa afiꞌriro hagiidhanno yite hedatto manni nooni?” yitine xaꞌme. Mito wote halashshaano woyi suwisaano killilensa giddo affinoha hasatto noosi mancho xiinxallisate injaa hoogansara dandaanno. Konni daafira Qullaawa Maxaafa xiinxallisate injaannoheta roduuwu affanno gede assi.
5. Songoꞌnera noo roduuwiha ammaninokki minaanna woyi minaama xiinxalla hasiꞌrannotanna teꞌee xaꞌma dancha ikkitinohu mayiraati?
5 Ammaninokki Minaanna Woyi Minaama: Songoꞌne giddo ammaninokki minaanni woyi minaama noonsa halashshaano nooni? Mitu ammaninokki minaanni (ammantinokki minaamano ikkitara dandiitanno) Kiristaancho galtesi Qullaawu Maxaafire kultannosita giwanno; gobba manni coyishiishiro kayinni xiinxallate maahoyye yaara dandaanno. Ammaninokki minaanna woyi minaama tenne xaꞌmate balanxe Kiristaanchu minaanni woyi minaama ledo amaalama lowonta woyyitanno.
6. Xiinxallanno manna hasiꞌneemmo wote huuccatto mageeshsha kaaꞌlitannonke?
6 Huuccatto: Huuccatto lowo wolqa afidhinota deꞌinoonte. (Ya. 5:16) Yihowa fajjosi ledo sumuu yaanno garinni huucciꞌnummoro macciishsheemmo yee qaale eino. (1 Yo. 5:14) Loosu batiꞌrannosihu mittu rodii Qullaawa Maxaafa xiinxallannoha mitto mancho afiꞌrate huuccatto assiꞌra jammari. Minaamasi kayinni, yanna afiꞌre xiinxallisa dandaakka yite huluullantu, hakko iso xiinxallanno manchi qarraataamo ikkiro konne mancho kaaꞌle afakka yite heddino. Konni daafira minaannise xiinxallanno manna afiꞌranno gede huuccatto assidhu wote, huluullisinosere Yihowara kultu. Lame saamminte gedensaanni, songonsati mitte suwisaancho xiinxalla hasiꞌrannoha mitto mancho affe konni rodiira uyitu wote huuccattonsa dawaro afidhu. Minaama togo yitino: “Qullaawa Maxaafa xiinxallisa kabbaadete yite heddannore baalanka togo yeemmansa: Hasidhinannire huuccattotenni xawissine kulle, qoleno huucciꞌra agurtinoonte. Afiꞌnoommo hagiirri hedoommahura aleenniiti.” Kiꞌneno sharrama agurtinannikkiha ikkiro, Qullaawa Maxaafa xiinxallanno manna afidhinaranna “heeshshote widira massitanno doogo” haꞌranno gede kaaꞌlitine hagiidhitinara dandiitinanni.—Maat. 7:13, 14.