Masaalaanote Haꞌruma Hadhe—Amootsi
1. Masaalaanchu Amootsi lawishshi jawaachishankera dandaanno yineemmohu mayiraati?
1 Gari geeshsha tamaara hoogaꞌnenninna angate anje noowa lophaꞌnenni kainohunni sabbakate ikkado diꞌꞌikkoommo yitine heddine egentinoonni? Hatto ikkiro, Amootsi lawishshi guulletenni sabbakate kaaꞌlaꞌnera dandaanno. Amootsi geꞌreewo ceꞌꞌe heeꞌrannohonna baatto loosiꞌre galinoho, ikkirono lowo geeshsha hasiissanno sokka kulanno gede Yihowa jawaante uyinosi. (Amo. 1:1; 7:14, 15) Yannankerano Yihowa shooshaqanna insaneeto heeshshi assanno manna horoonsiꞌranno. (1 Qor. 1:27-29) Masaalaanchu Amootsi lawishshinni soqqanshonkera kaaꞌlannonkere wolere maa ronseemmo?
2. Soqqanshonkewa mannu taqawwamannonke wote kaajjine uurrineemmohu mayiraati?
2 Mannu Taqawwamannoꞌne Wote Kaajjitine Heedhe: Isiraeelennita tonne-gaꞌre amadinohu aliyye gashshooti giddo siitu magansiꞌrara kakkalannohu Ameesiyaasi, Amootsi masaalo coyiꞌranna macciishshe hanqe coyiꞌrinori togo yiinohu gedeeti: ‘Kai kawii! Ninkera uminke ammaꞌno noonke!’ (Amo. 7:12, 13) Ameesiyaasi Nugusu Iyyoorbiaami Amootsi loosanno looso uurrisanno gede assate, masaalaanchu coyiꞌrinore wire wolere coyiꞌrino. (Amo. 7:7-11) Amootsi kayinni waajje dijajjarino. Yannankerano mitu ammaꞌnote marooti Yihowa manna qarrisate gashshaano kaaꞌlitannonsa gede assate woꞌnaaltanno. Ikkollana, Yihowa ninke goddaasate qixxeessinanni massaari baalunku hegerete gawajjo abbannokkita kulinonke.—Isa. 54:17.
3. Sabbankeemmoti lamu gari sokka hiittenneeti?
3 Yihowa Firdenna Albillitte Daanno Atoote Dudubbe: Amootsi Isiraeelennita tonne-gaꞌre amadino gashshootira dagganno firde kulinoha ikkirono, isi suꞌminni suꞌminoonni Maxaafira gumulote, Yihowa eino qaalenna albillittete daanno atoote kulino. (Amo. 9:13-15) Ninkeno albillitte Maganunnihu “firdete barri” daannota dudumbeemmoha ikkirono, kuni, duduwa hasiissannonkehu “mangistennihu danchu duduwi” giddo mittoholla. (2 Phe. 3:7; Mat. 24:14) Yihowa Armagedooni olinni bushuulle uullate aaninni hune uulla gannate ikkitanno gede faro fananno.—Far. 37:34.
4. Yihowa fajjo wonsha dandiineemmo yineemmo gede assannonkeri maati?
4 Taqawwamanno manni batiꞌrino alamera heeꞌne Maganu Mangiste sokka sabbaka, Yihowara ammaname heeꞌratenna fajjosi wonshate eꞌnoommo qaale wonsha sharransiissannonke gede assitannota anfoommo. (Yoh. 15:19) Ikkirono, Yihowa Amootsi kaaꞌlinte gede ninkeno fajjosi wonshineemmo gede kaaꞌlannonketa dihuluullammeemmo.—2 Qor. 3:5.