Aante Aantete Fulannoha Soqqanshote Kaaꞌlannonke Birxicho
1. “Qullaawu Maxaafi Hasaawa” yaannohu aante aantete fulanno birxichi hiittee lame kaaꞌlo aanno?
1 Mannaho ellanniti Agarooshshu Shae yannate kiiro, “Qullaawu Maxaafi Hasaawa” yaannoha aante aantete fulanno birxicho amadde fultanno. Kuni birxichi fulannohu lamuriraati: Qullaawu Maxaafi roso mannaho baxisanno woy coommanno garinni kulatenna mitte hajo lainohunni hayyotenni manna ammansiisa dandiineemmo gara huwanteemmo gede kaaꞌlateeti. (1 Phe. 3:15) Tenne birxichuwa seekkine horoonsiꞌra dandiineemmohu ma garinniiti?
2. Aante aantete fultanno birxichuwa soqqanshonkera horoonsiꞌra dandiineemmohu ma garinniiti?
2 Soqqanshote Yannara Horoonsidhe: Konne birxicho amadde fultannota Agarooshshu Shae naggi assitine adha dandiitinanni. Coyishiinshoommohu qaete anni, mittu hasatto noosi manchi woy Qullaawu Maxaafi rosaanchinke tenne birxichuwa giddo mittete noo xaꞌmo xaꞌminkero, metseete uyitinesi ledosi hasaabbe. Attamante fultinota konne birxicho amaddino metseete hoogginiro, jw.org aaninni dirrisiꞌra dandiitinanni.
3. Aante aantete fulanno birxicho horoonsiꞌne qaete anni ledo hasaawa dandiineemmohu hiittoonniiti?
3 Tenne birxichuwa horoonsiꞌne mittu manchi ledo hasaawa dandiineemmohu hiittoonniiti? Mitu roduuwi hasaawissino manchi, olliichu coyiꞌrino gede assine qixxeessinoonni gafa qoonqosi naggi asse nabbawanno gede assite, insa kayinni Yihowa Farciꞌraasinchi coyiꞌrinoha nabbabbanno. Togoohu borreessine qixxeessinoonni hasaawi, qaete anni hasaawu okkinosihu gede ikke macciishshamisikki ammaꞌnonkere huwatanno gede assannosi daafira dancha guma abbara dandaanno.—Marro 32:2.
4. Ninkeneeto qajeelsiꞌrate tenne birxichuwa horoonsiꞌra dandiineemmohu ma garinniiti?
4 Kiꞌneneetono Wolootano Qajeelse: Tenne birxichuwa nabbabbinanni wote, qummi assinoonni xiqisubba, lawishshuwanna assaawe xawinsoonni gara huwatte. Qixxeessinoonni hasaawi afiꞌrino nyammo wodanche. Kiꞌneno soqqanshote yannara hakko garinni hasaawisate woꞌnaalle. (Law. 1:5; 9:9) Mitte rodoo togo yitino: “Tenne birxichuwa nabbawa, ayewoteno yitannore hooggannokkite ‘worba’ suwisaancho ledo soqqamme ise laꞌne rosate gedeeti!”
5. Qullaawu Maxaafi rosaanonke soqqanshote qixxaabbanno gede kaaꞌlate maa assa dandiineemmo?
5 Qoleno Qullaawu Maxaafi rosaanchoꞌne soqqanshote qixxaawanno gede kaaꞌlate tenne birxichuwa horoonsiꞌra dandiitinanni. Rosaanchu halashshaanchu gede ikkeenna, konne birxicho mitteenni nabbabbinanni rosiisidhe. Konni garinni, Qullaawu Maxaafi rosaano ammanansa hayyotenni mannaho xawissanno gara rossanno. (Qol. 4:6) Addaho, Yihowa soqqanshonke ‘woꞌmunni woꞌma gumulleemmo’ gede ninke kaaꞌlanno doogga giddo mitte tini birxichuwa fultanno gede assasiiti.—2 Xim. 4:5.