Soqqantinanni Wote Yannaꞌne Danchu Garinni Horoonsidhe
Yihowa Farciꞌraasine saihu 2014 soqqanshote diro 1,945,487,604 saate soqqantino; tini Yihowara jaatanaambe soqqamate murciꞌnoommota leellishshannote! (Far. 110:3; 1 Qor. 15:58) “Gattino yanna shiima” ikkitino daafira, soqqammeemmo wote muxxe yannanke roore manna hasaawisate horoonsiꞌra dandiineemmo?—1 Qor. 7:29.
Soqqammeemmo wote yannanke danchu garinni horoonsiꞌrate qooxeessaho injaanno garinni qixxaawa hasiissannonke. Lawishshaho soqqantinanni heedhine mitto manchono hasaawissinikkinni mitte saate woy hakkuyi aleenni keeshshitinanniha ikkiro, coyishiishshinanni manna afiꞌrate wolu garinni woꞌnaala dandiitinanni? Soqqamanni gari bayichu bayichu garinni babbaxxanno. Ikkollana, aante noo assaawe, ‘bubbe gantinannikki’ gede yaano yannaꞌne danchu garinni horoonsidhinanni gede kaaꞌlitannoꞌne.—1 Qor. 9:26.
Minunni Mine Haꞌne Soqqama: Lowo diro halashshaano soqqansho hanafanno wote minunni mine hadhe soqqama rosantinote. Ikkirono, batinyu manni barra qaete heeꞌrannokki daafira, minunni mine rooru manni qaete heeꞌranno woy fooliishshiꞌranno yannara hawarro woy leeshshote woꞌnaalleemmo? Barra doogote woy daddalu basera farciꞌra dancha guma abbitara dandiitanno.
Gudumaaleho Farciꞌra: Borro worre leellinshanni xarapheessanna gaare songote killile giddo mannu ale woro higannowa wora hasiissanno. (Maaja 2013, Maganu Mangiste Soqqanshonke, qoola 5 lai.) Gudumaaleho Farciꞌrate doorroonni bayicho mannu ale woro haꞌra ajanni daanno wote, Songonniti Soqqanshote Komite borro worranni xarapheessa woy gaare haaro ikkine mannu ale woro haꞌrama batiꞌrannohu wolu qooxeessira worranni gede wossana dandiitanno.
Galagalle Marre Hasaawisanna Qullaawa Maxaafa Xiinxallisa: Galagaltine martine hasaawisatenna Qullaawu Maxaafi xiinxalloꞌnera, wolu gari soqqanshonni gari guma afiꞌnannikki yannara haꞌra dandiitinanni? Lawishshaho, Qidaame soodo minunni mine haꞌne soqqama dancha guma abbitannoha ikkiro, Qullaawa Maxaafa xiinxallissinanni manniwa barra woy hawarrissine haꞌra dandiitinanni? Galagaltine hasaawisate hadhinanni wote, roore soqqama dandiitinanni gede halashshaano shiima shiima gaamo assitine makeenu noonsa roduuwi ledo maddawa dandiitinanni?
Aye woteno soqqammeemmo wote soqqammoommo saate borreessine amandeemmoti egennantinote, soqqanshonkenni guma afiꞌneemmoha ikkiro kayinni roore hagiidhineemmo. Soqqantinanni heedhine, hatte yannara hakko gari soqqanshonni guma afiꞌra hoogginiro, wolu garinni soqqamate woꞌnaalle. Soqqanshote yannaꞌne danchu garinni horoonsiꞌra dandiitinanni gede biddishsha afiꞌrate “midote Mooticha” Yihowa huuccidhe!—Maatewoosi 9:38.