Kalaqaanchu Uyinonke Hexxo Kulino Gara

Manchi beetti kalaqami yannanni kayise, Kalaqaanchinke sokkaasinetenna masaalaanote widoonni mannaho hedosi kulanni keeshshino. Qoleno, sokkasinna abbara qaale eino atoote borreessine worranni gede assino. Maganu albillitte hagiirru woꞌmino heeshsho heeꞌnammora hexxo uyinonke. Ikkina Maganu uyino hexxo noohu hiikkooti?

Maganu soyinonke sokka noohu Qullaawa Borro giddooti. (2 Ximootewoosi 3:16) Maganu, masaalaano sokkasi borreessitanno gede assinohu hiittoonniiti? (2 Pheexiroosi 1:21) Isi hedosi borreessaanote surrera worino; hakkiinni insa hattenne hedo borreessitino. Hanni tennera mitto lawishsha laꞌno. Mittu loosiisaanchi, borreessaanchisi sokka borreessanno gede assiro, hatti sokka isite ikkinnina borreessaanchunnita diꞌꞌikkitino. Hatteente gede, Maganu sokkasi mannu borreessanno gede assinoha ikkirono, Qullaawa Borro Anni kayinni isooti.

MAGANU QAALE BAALUNKU MANNI AFIꞌRA DANDAANNO

Maganu sokka lowo geeshsha hasiissannota ikkitino daafira, isi baalunku manni sokkasi nabbawaranna huwatara hasiꞌranno. Xaa yannara ‘hegereta Danchu Duduwi sokka’ baalanti ‘gosa, gaꞌrenna addi addi afiinni coyiꞌranno manni’ afiꞌra dandaanno. (Yohaannisi Ajuuja 14:6) Maganu galatamona, xaa yannara Qullaawa Borro woꞌma woy gama 3,000 saꞌꞌanno afiinni tirroonni; alamete aana konni maxaafi geeshsha mannaho tuqinohu wolu maxaafi horo dino.