Kaaꞌlo Hasiissannonsare Kaaꞌlitannori Afidhanno Atoote

Alamete aana lowo mannira sagalenna heeꞌranno mini hasiisannonsa. Mitootu kayinni albillittete hexxo afiꞌra hasidhanno. Togoo manna kaaꞌlate assineemmori, Magano hagiirsiinseemmonna atootesi afiꞌneemmo gede assannonkehu hiittoonniiti?

MAGANU QAALI MAYYAANNO?

“Buxanete aannohu Kaaliiqira liqiissanno; Kaaliiqino assino danchummara aannosi.”—LAWISHSHA 19:17.

KAAꞌLO HASIISSANNONSARE KAAꞌLATE YAA MAYYAATE?

Yesuusi, mulqidhannori ganteenna foolu callu gatino manchire kulanno lawishsha coyiꞌrino. (Luqaasi 10:29-37) Mittu doogaanchi konne baasa gawajjamino mancho kaaꞌlinosi. Kuni doogaanchi gaꞌresi wole ikkiturono hakkonne gawajjamino mancho kaaꞌlinosi.

Kuni shaqqadu manchi gawajjamino mancho xagisinosihanna hasiisannosire uyinosiha calla ikkikkinni fooliishshiishinosi.

Konni lawishshinni maa ronseemmo? Yesuusi konne lawishsha horoonsiꞌre, kaaꞌlo hasiissannonsare dandiinummo doogo baalantenni kaaꞌla hasiissannonketa rosiisino. (Lawishsha 14:31) Qullaawa Borro, Maganu muli yanna giddo buximanna qarra hunannota kultanno. Kayinni, ‘Maganu tenne assannohu hiittoonniiti? Qoleno konne assannohu mamooteeti?’ yine hendeemmoha ikkara dandaanno. Aananno birxichira, baxannonke Kalaqaanchinke albillittete qixxeessinonke atooti daafira ronseemmo.