Dagoomittete Webisayite Woshshaado Ikkitoonkeꞌne

QOROPHA HASIISSANNOHU MAYIRAATI? Wolu batinyu uduunnichinte gede dagoomittete webisayiteno kaaꞌlitarano gawajjitarano dandiitanno. Mitu Kiristaani dagoomittete webisayite horoonsiꞌra agura doodhitino. Wolu Kiristaani kayinni dagoomittete webisayite maatensanna jaallansa ledo xaadate horoonsiꞌranno. Ikkollana Daawuloosi dagoomittete webisayite, suꞌmankenna Yihowa ledo noonke jaalooma huntanno garinni horoonsiꞌnammora hasiꞌranno. Yesuusi gede gawajjannore bande afatenna hooꞌlate Maganu Qaaliha xintu seera horoonsiꞌra dandiineemmo.—Lu 4:4, 8, 12.

XEERTIꞌRA HASIISSANNO COYE:

• Dagoomittete Webisayite quwa sae horoonsiꞌra. Dagoomittete Webisayite horoonsiꞌnanni lowo yanna guda ayyaanaamittete coye assineemmota muxxe yanna hoongeemmo gede assitannonke

  Qullaawu Maxaafiha xintu seera: Ef 5:15, 16; Fil 1:10

• Gara ikkinokkire laꞌꞌa. Hakkeeshshi geeshsha teeda baꞌinokki misilla laꞌꞌa teeda baꞌino misilla laꞌꞌa araado ikkitanno gedenna amanyoote bainore assinanni gede assitara dandiitanno. Kaadaasinete borro nabbawa ammana huntanno

  Qullaawu Maxaafiha xintu seera: Mt 5:28; Fil 4:8

• Gara ikkitinokki hedo woy foto webisayitete aana wora. Wodanu xagaraamo ikkino daafira, mittu manchi dagoomittete webisayitete aana gara ikkitinokki hedo woy foto worara dandaanno. Tini qolte mittu manchi suꞌma huntara woy woloota ayyaanaamittetenni gawajjitara dandiitanno

  Qullaawu Maxaafiha xintu seera: Ro 14:13; Ef 4:29

DAGOOMITTETE WEBISAYITE HOROONSIꞌRATTO WOYITE HAYYICHA IKKI YITANNO VIIDIYO LAꞌINI GEDENSAANNI AANE NOORE GARGADHA DANDIINANI GARA HASAABBE: