‘Kuri Shiimmaaddaho’ Guficho Ikkitinoonte

1. Yihowa ninke mitto mittonka ma assinonke?

YIHOWA ninke mitto mittonka isiwa abbinonke. (Yoh. 6:44) Hanni togo yaa mayyaatero hedi. Yihowa alamete aana nooha lowo biliyoone ikkanno manna baala seekke lai woyite, lowo geya muxxe ikkinori yaano suwashshu wodani noohetanna iso baxattora dandaattota huwatino. (1 Dud. 28:9) Yihowa afinohe, seekke egenninohe hattono baxannohe. Tini lowo geya jawaachishshaate!

2. Yihowa ninke mittu mittunku daafira hedannota Yesuusi lawishshunni kulinohu hiittoonniiti?

² Yihowa ate daafira seekke hedanno, hattono ammanate roduuwikki baalaho hedanno. Yesuusi tenne lawishshunni kulate, Yihowa allaalaanchu gede ikkinota coyiꞌrino. Xibbu geꞌreewi giddonni mitte geꞌrecho hoshshatewiinni baxxite baꞌuro allaalaanchu maa assanno? “Honsayina honse hakko ilaalu iima agure baꞌinota mitticho hasiꞌrara” haꞌranno. Allaalaanchu baꞌino geꞌrecho afiꞌranno woyite baxxite baꞌino daafira beebba diassiꞌrannose. Isi afiꞌrino daafira hagiidhanno. Tennenni ninke maa ronseemmo? Geꞌreewisi baalu Yihowara muxxete. Yesuusi togo yiino: “Gordoho heeꞌrannohu Anniꞌneno kuri shiimmaaddu giddonni mittuno baꞌꞌara dihasiꞌranno.”—Mat. 18:12-14.

3. Konni birxichira maa ronseemmo?

³ Ammanate roduuwinke giddonni mittuno hexxo mudhanno gede assa dihasiꞌneemmo. Wolootaho guficho ikkineemmokki gede qoropha dandiineemmohu hiittoonniiti? Mittu manchi xissiisiꞌneemmo gede assinkero maa assa dandiineemmo? Konni birxichira kuri xaꞌmuwara dawaro afiꞌneemmo. Hanni kayi balanxe Maatewoosi fooliishsho 18⁠te “kuri shiimmaaddu” yiniri ayeootiro laꞌno.

“KURI SHIIMMAADDU” YINOONNIRI AYEOOTI?

4. “Kuri shiimmaaddu” yinoonniri ayeooti?

⁴ “Kuri shiimmaaddu” yiniri baalante Yesuusi rosaanooti. Dirinsa ikkihano ikkiro, insa Yesuusiwiinni rosate maahoyye yitino daafira, ‘qaaqquullu gedeeti’ yaa dandiinanni. (Mat. 18:3) Insa lophitino gari, budinsa, mittu coyira noonsa lao hattono akatinsa addi addiha ikkirono, baalunku Kiristoosa ammantannota leellishshino. Kiristoosino lowo geya baxannonsa.—Mat. 18:6; Yoh. 1:12.

5. Soqqamaanosi giddonni mitto nafa gufiꞌranno gede assinanni woyite woy gawajjinanni woyite Yihowara mayi macciishshamannosi?

⁵ “Kuri shiimmaaddu” yiniri baalu Yihowara muxxete. Isi ninke mageya baxannonkero huwatate, hanni ninke qaaqquullenke mageya banxeemmoro hendo. Insa ninkera muxxete. Jawu gede wolqa, dandoonna egenno noonsakki daafira towaanteemmonsa. Aye manchino gawajjamara hasiꞌneemmokkiha ikkirono, mittu manchi hakko iso qaaqquulle gawajjanna laꞌnummoro lowo geya dadillineemmo, wole agurina hanqinammora nafa dandiineemmo. Hatteente gede Yihowano ninke towaatannonke. Isi soqqamaanosi giddonni mitto nafa gufiꞌranno gede assinanni woyite woy gawajjinanni woyite lowo geya dadillanno, wole agurina hanqanno!—Isa. 63:9; Maq. 9:42.

6. Umi Qorontoosi 1:26-29 kultanno garinni, alame Yesuusi rosaano ma garinni laꞌanno?

⁶ Yesuusi rosaano “shiimmaaddu” gede ikkitinoti wole doogo hiitteeti? Alame hiittoo manna ayirrissanno? Dureeyye, maccare ikkitinorenna silxaane noonsare. Yesuusi rosaano kayinni mannu mishantinori, tidhitinokkirinna “shiimmaaddu” gede asse laꞌꞌanno. (1 Qorontoosi 1:26-29 nabbawi.) Yihowa laꞌꞌannonsahu kayi hakko garinni diꞌꞌikkino.

7. Yihowa ammanate roduuwanke ma assinammora hasiꞌranno?

⁷ Yihowa baalanta soqqamaanosi yaano isira lowo diro soqqantinoreno ikko halaalu minira muli yannara dagginore baxannonsa. Yihowa ammanate roduuwanke baalanka baxannonsa daafira, ninkeno insa baxa hasiissannonke. “Mitti mittinke kuꞌu koꞌonni biso” ikkinoommo daafira, gama roduuwa calla ikkikkinni roduuwu maamara woꞌma baxa hasiissannonke. (Rom. 12:5) Insa agaratenna towaatate dandaaminkere baala assate maahoyye yaa hasiissannonke. Mittu ammanate rodiinke xissiisiꞌranno gede woy koffi yaanno gede assinoommota anfummoro, isi kairiralla muffi yaanno woy hakkeya didhiwinoreeti yine lashshi assine saꞌꞌa dihasiissannonke. Isi koffi yiinohu mayira ikkara dandaanno? Mitu roduuwi lophitino gari insaneeto woffi assitanno gede assansara dandaanno. Wolootu kayi halaalu minira haarote dagginore ikkitino daafira mannu koffi assannonsa woyite, maa assa hasiissannonsaro dirossino. Kalaqaminori ikkireno ikkiro, kawa kaꞌaa higinore taashshate dandiinummore baala assa hasiissannonke. Qoleno mulenni koffi yaanno manchi kuni akati dancha ikkinokkita wodanchanna biddi assiꞌrate sharrama hasiissannosi. Tini giddiidi keerisi baꞌꞌannokki gedenna wolu roduuwi ledo dancha aante heedhannosi gede kaaꞌlitannosi.

WOLOOTU KIꞌNE ROORTINOHU GEDE ASSITINE HEDDE

8. Yesuusi rosaano insaneetira gara ikkitinokki lao heedhannonsa gede assinonsari maati?

⁸ Yesuusi “kuri shiimmaaddu” daafira coyiꞌranno gede assinosiri maati? Rosaanosi, “Gordu Gashshootira baalanka roorannohu ayeti?” yite xaꞌmitinosi. (Mat. 18:1) Hatte yannara batinyu Yihudu manni silxaanenna maarage lowori gede asse laꞌꞌanno. Mittu fullahaanchi togo yiino: “Hakkawaro labballu ayirrinye afiꞌratenna maccaha ikkate dirmitanno.”

9. Yesuusi rosaano maa assa hasiissinonsa?

⁹ Yesuusi Yihudu budi giddo halaꞌlinoha mimmitu ledo heewisamate akata, rosaanosi wodaninsa giddonni buqqisse hooꞌlate sharrama hasiissannonsata afino. Isi togo yiinonsa: “Kiꞌne giddo jawa ikkara hasiꞌrannohu, shiimiidiha ikko. Roorre afiꞌrinohu soqqamaanchu gede ikko.” (Luq. 22:26) ‘Wolu manni ninkenni roorinohu gede assine hendeemmoha’ ikkiro, ninkeneeto ‘shiimiidihu’ gede assine laꞌnanni heeꞌnoommo. (Fil. 2:3) Togoo akati heeꞌrannonke gede assiꞌnummo kiiro, woloota gufinseemmokki gede albinni roore qorophineemmo.

10. Phaawuloosi amaalinota hiittenne amaale dea dihasiissannonke?

¹⁰ Baalunku roduuwinke mite doogonni roortannonke. Insara noonsata dancha akatta illachinsheemmoha ikkiro, tenne huwata diqarrissannonke. Soqqamaasinchu Phaawuloosi Qorontoosi Kiristaana amaalino amaale dea dihasiissannonke; isi togo yiinonsa: “[Ate] wolu mannira aliidiha assinohehu ayeti? Noohere baala uyinohehu Magano diꞌꞌikkino? Uyinoonnisikkihu gede ikkite umokki mayira bokkeessattoyya?” (1 Qor. 4:7) Leellamate woꞌnaalleemmokki gede woy woloota roorroommohu gede assine hendeemmokki gede qoropha hasiissannonke. Mittu rodii dancha lallawo shiqishannoha ikkiro woy mitte rodoo manna Qullaawu Maxaafi xiinxallo hanafisiisate dandoo heedhusero tennera ayirrinye Yihowara aa hasiissannonsa.

WOLOOTA “WODANIꞌNENNI” GATONA YIIYYE

11. Yesuusi mittu mootenna borojjichisi daafira coyiꞌrino masalonni maa ronseemmo?

¹¹ Yesuusi harunsaanosi wolootaho guficho ikkitannokki gede qorowisiisihunni shiima yanna gedensaanni, mittu mootenna borojjichisi masalo coyiꞌrino. Moote borojjichisi horo baata dandaannokkiha lowo asale agurinosi. Gedensoonni kuni borojjichi wolu borojjichira liqiissinoha shiima woxe agura giwino. Jeefote moote hakkonne godowa kaajjado borojjicho usuru minira eessino. Tennenni maa ronseemmo? Yesuusi togo yiino: “Kiꞌneno, mitti mittiꞌne rodiiꞌnera wodaniꞌnenni sao agura hoogginiro, gordoho heeꞌrannohu Anniꞌya kiꞌne saono diagurannoꞌne.”—Mat. 18:21-35.

12. Gatona yaa gimbummoro woloota gawajjineemmohu hiittoonniiti?

¹² Borojjichu assooti iso calla ikkikkinni wolootano gawajjino. Umihunni, isiwiinni woxe liqiiꞌrino borojjicho mittoreno mararikkinni, “amade haaꞌre birrasi baata geeshsha usurame keeshshanno gede” asse gawajjinosi. Layinkihunni, assootesi laꞌinore wole borojjootano gawajjino. Insa “konne coye macciishshite lowo geeshsha [dadillitino].” Hatteente gede assootinke woloota gawajjara dandaanno. Mittu manchi hanqiseennanke gatona yaa gimbummoro mayi ikkara dandaanno? Umihunni, gatona yaa gimboommohura, fiile hoꞌlinoommosihuranna baxille leellisha hoongoommosihura iso gawajjineemmo. Layinkihunni songote giddo noori wolu roduuwi hakko rodii ledo salaame noonkekkita affuro saaltanno.

13. Mitte suwisaancho rodoo woꞌnaalshinni maa rosootto?

¹³ Ammanate roduuwanke gatona yineemmoha ikkiro, tini ninkeno wolootano kaaꞌlitanno. Kiristaalib yinannite mitte suwisaancho woꞌnaalshi tenne leellishanno. Songosera nooti mitte rodoo ise xissiisidhanno gede assitinose. Kiristaali togo yitino: “Mito woyite ise coyidhannori bisete gede qasannoe. Ise ledo soqqansho nafa fula dihasiꞌreemma. Albi gede diinaggaawe soqqama qarra ikkitinoe, hattono dadillaame ikkoomma.” Kiristaali koffi yaase gara ikkitinohu gede assite heddino. Ikkirono ise rodoote koma amadde dikeeshshitino woy iseneetira calla diheddino. Hatteentenni ise umose heeshshi assite, Birra 15, 1999nnite Agarooshshu Shaera (Amaaru Afoo) “Wodaniꞌnenni Gatona Yiiyye” yaanno birxichira noota Qullaawa Borro amaale loosu aana hosiissino. Ise rodoose gatona yitino. Kiristaali togo yitino: “Baalunku haaro mannimma uddiꞌrate sharrammanni heeꞌnoommotanna Yihowa barru baala mulla gatona yaannonketa xa huwatoomma. Lowo duhi aaniꞌyanni hoꞌlinoe. Qoleno wirro hagiirraame ikkoomma.”

14. Maatewoosi 18:21, 22 kultanno garinni, soqqamaasinchu Pheexiroosira maa assa qarra ikkitinosiha ikkara dandaanno? Yesuusi isira qolino dawaronni maa rosootto?

¹⁴ Gatona yaa hasiissannonketa anfoommo; qoleno hatto assa hasiissannote. Ikkirono gatona yaa shota ikka hooggankera dandiitanno. Soqqamaasinchu Pheexiroosirano gatona yaa qarra ikkitinosi woyiti nooha ikkara dandaanno. (Maatewoosi 18:21, 22 nabbawi.) Ikkina kaaꞌlankera dandaannori maati? Umihunni, Yihowa mageeshsha gatona yiinohero hiinci. (Mat. 18:32, 33) Isi, maarosi afiꞌneemmo gedeere ikka hoongummorono, mulla gatona yaannonke. (Far. 103:8-10) Ninkeno “mimmitonke baxa hasiissannonke.” Hakko daafira gatona yaa, hasiꞌnummoro calla assineemmore diꞌꞌikkitino. Ammanate roduuwanke gatona yaate giddeeti noonke. (1 Yoh. 4:11) Layinkihunni, gatona yaa mayi horo afidhinoro hiinci. Hatto assanke koffi assinonke rodoo kaaꞌlitara, songote mittimma kaajjitanno gede assitara, hattono Yihowa ledo noonke jaaloomi baꞌꞌannokki gedenna aaninkenni duhu hoꞌlanno gede assitara dandiitanno. (2 Qor. 2:7; Qol. 3:14) Jeefoteno, woloota gatona yineemmo gede kulinonkeha Magano huucciꞌri. Sheexaanu ammanate roduuwikki ledo noohe salaame hunahera wodhitooti. (Efe. 4:26, 27) Sheexaanu woshshaado amaddannonkekki gede qorophate Yihowa kaaꞌlo hasiissannonke.

KIꞌNE UMIꞌNE GUFIDHINANNIKKI GEDE QOROPHE

15. Efesooni Sokka 4:32 kultanno garinni, mittu rodii koffi assinkero maa assa dandiineemmo?

¹⁵ Mittu ammanate rodiikki lowo geya xissiisannohere assiro, ati maa assa hasiissannohe? Mereeroꞌne noo salaame baꞌannokki gede assate sharrami. Yihowa seekkite huucciꞌri. Yihowa koffi assinohe mancho kaaꞌlannosi gede huucci; hattono Yihowa iso baxannosi gede assitinota dancha akattasi huwatatto gede kaaꞌlahera huucciꞌri. (Luq. 6:28) Rodiikki assinohere hawa qarra ikkituhero, iso danchu garinni hasaawisa dandaatto gara hedi. Rodiikki baddalinohehu afanni heeꞌre ikkinokkita woꞌmanka woyite heda danchate. (Mat. 5:23, 24; 1 Qor. 13:7) Ammanattosita leellishanno garinni hasaawisisi. Isi araarama hasiꞌrannokkihalla ikki? Cincilla. Hexxo mudhitooti. (Efesooni Sokka 4:32 nabbawi.) Baalunkunni roore, Yihowa ledo noohe jaalooma huntara dandiitanno daafira koma amaddooti. Mittu coyino gufiꞌratto gede assahera wodhitooti. Hatto assittoro, baalunku coyinni roore Yihowa baxattota leellishatto.—Far. 119:165.

16. Mitti mittinke maa assa hasiissannonke?

¹⁶ ‘Mittu allaalaanchi’ allaalannanke “mitte hoshsha” ikkine Yihowara mittimmatenni soqqama ninkera loworeeti. (Yoh. 10:16) Yihowa Fajjo Assate Feeffatino Manna yaanno maxaafira qoola 165te, “Tenne mittimmanni horo afidhanni nootto daafira, atino tini mittimma baꞌannokki gede kaaꞌla hasiissannohe” yitanno hedo no. Hakko daafira, roduuwanke “Yihowa laꞌꞌanno garinni laꞌꞌa rosa” hasiissannonke. ‘Shiimmaaddaho’ yinoonniri ninke baalunku Yihowara muxxete. Ati roduuwakki laꞌꞌattohu hakko garinniiti? Yihowa insa kaaꞌlatenna towaatate assattore baala laꞌꞌanno hattono naadanno.—Mat. 10:42.

17. Maa assate murciꞌnoommo?

¹⁷ Ammanate roduuwanke lowo geya banxeemmo. Hakko daafira ammanate rodiinke, ‘gufiꞌre cubboho uwanno’ gede assineemmokki gede murciꞌnoommo. (Rom. 14:13) Roduuwinke ninke roortinohu gede assine hendeemmo; hattono wodaninni gatona yineemmonsa. Wolootunni kainohunni gufiꞌneemmokki gedeno qorophino. Hatteentenni, “keere heeꞌnanni garanna mimmito dhaambanni doogo” haꞌno.—Rom. 14:19.