Asseemmorira Baalaho Yihowa Albaꞌyaanni Wodhoommo

Ilamoommohu Libaanoosi gobbara Amiyuni yinanni katamira Onkoleessa 19, 1940nniiti. Shiimu diri gedensaanni maatenke Tirippooli yinanni katama hadhu; ani lophoommohu hakkooti; maatenke baxillunna hagiirru woꞌminote; qoleno Magano Yihowa affinotenna iso lowo geya baxxannote. Onte oosonke giddo ani maaꞌniidiho; sase meya roduuwinna mittu labbaa rodii nooe. Anniꞌyanna amaꞌya balaxisiisannohu woxe diꞌꞌikkino. Roore balaxisiinseemmo coyi, Qullaawa Maxaafa xiinxallate, Kiristaanu gambooshshe haꞌratenna wolootu Magano affanno gede kaaꞌlate.

Songonkera buurantinori haammatu roduuwi no. Insa giddo mittu Misheeli Abudiiti; isi hakkawaro maxaafu xiinxallo yinannita massaganno. Abudi Qullaawu Maxaafi halaale Libaanoosi gobba abbinohu 1920 ballaati; halaale macciishshinohu kayi Niwu Yorkete katamiraati. Misheeli, Aani Biverinna Giweni Biveri yinanniri Giiliyaadi Rosi mininni maassantinore lame wedella roduuwa ayirrisannonsanna kaaꞌlannonsa gara horo dihaweemmo. Insa ninkera dancha jaalla ikkitinonke. Lowo diri gedensaanni Ameerikaho Aaninni xaadummoti lowo geya hagiidhoommo. Shiima yanna gedensaanni Giweninni xaadummo; ise hakka woyite Wilfireedi Guuchi yinanni rodiira assidhe Ingilaandete gobbara Lendenete Beeteelera soqqantanni no.

LIBAANOOSI GOBBARA SABBAKA

Anje noommo yannara Libaanoosi gobbara nooti Yihowa Farciꞌraasine shiimate. Ikkollana Qullaawu Maxaafinni ronsoommore mannaho quqquxamme kulleemmo. Hatto assineemmohu mitu ammaꞌnote murrooti gibbanni heedheennankeeti. Hatte yannara ikkinoha mito coye xaa geya qaageemmo.

Mitto barra aninna rodooꞌya Saana mittu hintsi giddo mannaho Qullaawu Maxaafi sokka kullanni heeꞌnoommo. Manna hasaawinsanni heeꞌneenna mittu qeesichi kae dayi. Isi dayinohu mitu woshsheenna ikkikki digatino. Qeesichu rodooꞌya xoni. Isi lowo geya hanqe Saana dirimu aaninni tugeenna gaꞌnite madidhu. Hakkiinni dowwolle polise woshshineenna insa dagge kaaꞌlituse. Insa qeesicha polisete xaawa haadhe hadhu; hakkiicho isi shugguxe qodhe noota affu. Polisete roorrichi iso, “Afummona ati ammaꞌnote murrichaatinso shittootu halaqaati?” yee xaꞌmi.

Woluno horo haweemmokki coyi no; mitto barra songonke otobise kaaraayyaꞌeenna xeertowa noo katamira dancha duduwo duduwate haꞌnummo. Hakko dancha gede soqqammanni heeꞌneenna qooxeessu qeesichi assinanni heeꞌnoommore afiti ninke gawajjate manna gamba assiꞌre dayi. Kuni manni waajjishiishinonke; aanaho kinna nafa ollolinonke; hatte mereero insa annaꞌya gawajjitu. Anniꞌya madire alba mundee goofinota qaageemmo. Isi amaꞌya ledo otobisenniwa higi; ninkeno yaandoommori mitu insa hoode haꞌnummo. Ikkirono amaꞌya anniꞌya mada fiitanni, “Yihowa, diaffe assitanni noona gatona yiinsa ballo” yitinota horo dihaweemmo.

Wole yannara qole ayiddenke layiꞌrate haꞌnummo. Hakkiicho ahaahiꞌya qaera mittu egennamino qeesichinni xaandummo. Isi anniꞌyanna amaꞌya Yihowa Farciꞌraasine ikkinota afino. Ani lewu diri qaaqqo ikkummorono, isi ane calla bade “Koo, cuuamoottokkihu mayiraati?” yiie. Anino xaara qaaqqo ikkoommotanna cuuamate Qullaawa Maxaafa lede afanna kaajjado ammana hasiissannoeta kulummosi. Yoommore baxinokki daafira, manna diayyirisannoho yee ahaahiꞌyara kuli.

Kayinni togoohu dadillisanno coyi iillinonkehu sae saeetilla. Xaphoomunni Libaanoosi gobbara heeꞌranno manni faasiiqahonna wosina adha baxannoho. Hakko daafira batinyu manni ledo Qullaawu Maxaafire dancha gede hasaamboommo, hattono lowo manna Qullaawa Maxaafa xiinxallinsoommo.

WOLE GOBBA HAꞌRATE KAꞌNUMMO

Roso rosanni noommo yannara mittu wedellichu rodii Venizuweelu gobbanni Libaanoosi dayi. Isi songonke dayinowa rodooꞌya Waafa adhara layiꞌrino. Gedensoonni insa adhame Venizuweela haꞌrino. Waafa sokka borreessite sokkanni, anniꞌya maatesi adhe Venizuweela haꞌranno gede wotto wortusi. Ise hatto assitannohu ninke lowo geya qalli yitino daafiraati. Gedensoonni ninke hakkira haꞌneenna ise halchitinori woꞌminose.

Hakkiinni 1953nni Venizuweela haꞌne Karakasi yinanni katamira gobbate gashshaanchi heeꞌranno qooxeessira heeꞌra hananfummo. Qaaqqo ikkoommo daafira, gashshaanchu hoola yinoonni makeeninni saꞌꞌanno woyite laꞌꞌa lowo geya baxeemmo. Anniꞌyanna amaꞌyara kayi hatte gobba, qaale, bude, sagalenna ayyare rosa qarra ikkitinonsa. Insa xaalla badaxxite rossanni heedheenna masisannori iillinke.

BUUTOTE QARRI IILLINKE

Annaꞌya dhiwinohu gede assisi. Isi hakkuyira albaa gellessanna fayyo ikkino daafira coyi wosiꞌninonke. Dhiwamoommo yaanna anfe diegenninoommo. Hakkiinni kaanserete dhibbi amadeennasi darre gombi. Ma assineemmo hige, mitte lamala gedensaanni isi fooliishshiꞌrino.

Hakka woyite xissiisiꞌnoommo gari coyiꞌne kuꞌlate nafa qarrisannoho. Hatte yannara ani 13 diriholla. Manse qoꞌla hoongoommo, hattono boosaallu boono ikkinonke. Mite yanna geya, amaꞌyara minaannise reyinota ammante adha nafa qarra ikkitinose. Ikkollana sheshifata hasiissannonketa huwantoommo; qoleno Yihowa kaaꞌlonni dandiine saꞌnoommo. Tonaa lewu dirihu heeꞌre Karakasi katamira roso gudummoti maateꞌya kaaꞌla lowo geya hasiꞌrummo.

Hatte mereero rodooꞌya Saana Rubeni Arayuho yinanni rodiira assidhu; isi Giiliyaadi Rosi mine maassame Venizuweela higino. Hakkiinni insa Niyu Yoorke haꞌrino. Maateꞌya yuniversite eꞌe rosa hasiissannohe yitinoe daafira, insawa heeꞌre rosate Niyu Yoorke haꞌrummo. Rodooꞌyanna minaannise ledo heeꞌroommo yannara, insa ayyaanaamittetenni lopheemmo gede lowo geya kaaꞌlitinoe. Qoleno Birukiliini Ispeenete Afiinni assinanni songora ayyaanaamittetenni gikki yitinori lowo roduuwi no. Insa giddo lamu Milteni Hensheliitinna Firediriki Firaansiiti; lamunku Birukiliini Beeteelera soqqantanno; insa ledo egennamaꞌyanni tashshi yiinoe.

Yuniversitete umi diri roso gudammora rahe heeꞌre, heeshshoꞌya giddo maa assanni noommoro heda hanafummo. Kiristaanu dancha mixo fushshiꞌra hasiissannonsata kultannota Agarooshshu Shaera fultino birxichuwa nabbawe seekke hiincoommo. Songonkera noo suwisaanonna Beeteelete soqqantanno roduuwi mageya hagiirraamma ikkitinoro laoommo; hakko daafira anino insa gede ikkate halchummo. Ikkirono hatte yannara dicuuamoommo. Shiima yanna gedensaanni heeshshoꞌya Yihowara sayise aa hasiissannoeta huwatummo. Qoleno hatto assoommo; hakkiinni Badheessa 30, 1957 cuuamummo.

SHOTA IKKINOKKI DOORSHA

Konne lowo geya hasiisanno coye assummohu gedensaanni, wolere assate yaano woꞌma yanna soqqansho hanafate hedummo. Hatto assate lowo geya halchoommoha ikkirono, tini shota ikkitinokkita huwatoommo. Kaꞌaa yuniversitete rosanni heeꞌre kawaa woꞌma yanna soqqansho soqqama dandeemmohu hiittoonniiti? Yuniversitete roso agure Venizuweela hige suwisaancho ikka hasiꞌrummo; tenne daafira amaꞌyanna roduuwiꞌya ledo hasaawate mimmitoho duucha hinge borrote sokka sonkoommo.

Ella 1957nni agure Karakasi katama higummo. Ikkirono maateꞌya noo gari dancha ikkinokkita huwatummo. Insara loose woxe abbe kaaꞌlannohu hasiisinonsa. Insa kaaꞌla dandeemmohu hiittoonniiti? Baankete mine looso afiꞌroommoha ikkirono, suwisaancho ikke soqqamano lowo geya hasiꞌroommo. Qoleno Venizuweela higoommohu suwisaancho ikkateeti. Loosono loosanni suwisaancho ikke soqqamate doodhoommo. Lowo diro, baankete mineno loosanni suwisaancho ikke soqqamoommo. Hakkuyira albaa loosu togo batiꞌre diegenninoe; qoleno hatto hagiidhe diegennoommo.

Jarmanetenni dagginote Silviya yinanni rodoo ledo egenname ise adhummo; ise Yihowa baxxannote xuma rodooti; tini hagiirriꞌya lexxanno gede assitino. Ise Venizuweela dagginohu annisenna amase ledooti. Gedensoonni lame ooso illummo; labbaa qaaqqinke suꞌmi Misheeliiti (Mayik); meya qaaqqonke suꞌmi Samiiraati. Qoleno amaꞌya towaaxxa hanafummo. Ise ninke ledo heeꞌra hanaffino. Maateꞌyara hasiisannore wonshate suwisaancho ikke soqqama agura hasiissinoeha ikkirono, suwisaanote gede diinaggaawe soqqama diaguroommo. Silviyanna ani loosunni fooliishshiꞌneemmo yanna baalantera kaaꞌlaano suwisaano ikkine soqqammeemmo.

WOLE SHOTA IKKINOKKI DOORSHA

Konni birxichi hanafora noo woꞌnaalsha kulummoꞌne woyite, oosonke roso diguddino. Heeꞌneemmo heeshsho qawaaxxaamete yaa dandeemmo; qoleno baankete mine ledoꞌya loossannori ayirrissannoe. Ikkirono ani mannu roore Yihowa soqqamaanchi gede asse laꞌꞌaera hasiꞌroommo. Mannu konni garinni laꞌꞌannoe gede ma assokka yee duucha hige hedummo. Konnira noonke woxi daafira minaamaꞌya ledo hasaambummo. Baankete mine loosa agurummoro, baanke lowo woxe uyitannoeta afoommo. Asalu noonkekki daafira, heeshshonke bikkunnita assiꞌnummoro kuni woxi lowo yannara ikkannonke yine hendoommo.

Hatto assa shota ikka hooggurono, muxxe minaamaꞌyanna amaꞌya tennera sumuu yee kaaꞌlinoe. Hakko daafira wirro woꞌma yanna soqqansho soqqama dandeemmo. Tennera lowo geya hagiidhoommo! Kayi suwisaancho ikkammora kae heeꞌreenna, hendoommokki coyi ikki.

HAGIIRSIISAARE AFIꞌNUMMO

Mitto barra akimichu Silviya godobbinota kulinke. Tini dihendoommote! Hatte yannara hagiidhoommoha ikkirono, suwisaancho ikkate hede noommo daafira ma asseemmoro wirro heda hasiissinoe. Suwisaancho ikke soqqama dandeemmo? Bayichonkonni wodananke qixxeessiꞌne ilamanno qaaqqo lossiꞌneemmo gara heda hananfummo. Ikkirono xaano, ‘Suwisaancho ikka dandeemmo ikka?’ yee heda diaguroommo.

Mixonke daafira hasaambummohu gedensaanni, suwisaancho ikkeemmo gede sumuu yinummo. Qaaqqinke Gebirieeli 1985nni ilami. Ikkollana, baankete mine looseemmo looso agurummohu gedensaanni Ella 1985nni wirro woꞌma yanna suwisaancho ikke soqqama hanafummo. Yannate gedensaanni Sinu Biiro Komite miila ikke soqqamate qoosso afiꞌrummo. Sinu Biiro noohu Karakasi katamira diꞌꞌikkino; hakkira iilleemmohu 80km meddi yitanno doogo haꞌreeti; lamalate giddo lame woy sase barra haꞌre soqqameemmo.

XAANO WOLEWA HAꞌNUMMO

Sinu biiro noohu Laa Viktooriya yinanni katamiraati; hakko daafira, Beeteelenniwa shiqqi yaate maatenke woꞌma hakkira haꞌrate kaꞌnummo. Kuni shota coye diꞌꞌikkino. Maateꞌya lowo geya galateemmonsa. Insa lowo geya kaaꞌlitinoe. Rodooꞌya Baaha amaꞌya towaatate maahoyye yitino. Mayiki seenne adhino; Samiiranna Gebirieeli kayi ninke ledo heeꞌranno. Hakko daafira Laa Viktooriya haꞌnummota insa Karakasi noonsa jaalla agurte haꞌra hasiissinonsa. Muxxe minaamaꞌya Silviyano injaannoha jawa katama agurte shiimu katamira heeꞌra rosa hasiissinose. Qoleno ninke baalunku shiimu mini giddo heeꞌra rosa hasiissinonke. Karakasinni Laa Viktooriya haꞌrate lowore biddi assiꞌnoommo.

Ikkollana coyi galagale woyyaawi. Gebirieeli seenne adhi; Samiira kayi umose dandiite heeꞌra hanaffu. Hakkiinni 2007nni Silviyanna ani Beeteelete soqqammeemmo gede koyinsinke; xaa geya hakko soqqammanni heeꞌnoommo. Bayiriidi beettinke Mayiki songote cimeessaati; hattono minaamasi Monika ledo suwisaancho ikke soqqamanni no. Gebirieelino songote cimeessaati; isi minaamasi Ambira ledo Ixaaliyu gobbara soqqamanni no. Samiirano suwisaancho ikkite soqqantanni no; qoleno Beeteelete looso minese heedhe kaaꞌlitanno.

DOODHOOMMO DOORSHI HORO DIGAABBISANNOE

Shaaꞌꞌa ikkinokkiha addi addi coye doodhoommo. Ikkirono hatto assaꞌyanni horo digaabbeemmo. Xa wirro doodhi yinoommeꞌꞌero hakko coyella doodheemmo. Lowoha ayyaanaamittete looso uyinoonnie daafiranna Yihowara soqqamate qoosso afiꞌroommohura tashshi yiinoe. Heeshshoꞌya giddo, Yihowa ledo nooe jaalooma kaajjishiꞌra lowo geeshsha hasiissannota wodanchoommo. Doodhineemmo coyi ikki geeshshihano ikkiro, isi ‘mannu hedora aleenni ikkitinota’ giddiidi salaame aannonke. (Fil. 4:6, 7) Beeteelete soqqammeemmoti qullaawa soqqansho Silviyanna ane lowo geya hagiirsiissannonke; qoleno Yihowa iso albaanni wodhine assinoommoha mitto mittonka coye maassiꞌrinonke.