Halaalu Magansiꞌra Hagiirriꞌne Lexxanno Gede Assitanno

1-2. Yihowa magansiꞌranke adhanno gede maa assa hasiissannonke?

“MAGANSIꞌRA” yaanno qaale macciishshatto woyite maa hedatto? Goxara albaanni guluphe giddosita kule Yihowa huucciꞌrannoha mitto rodoo hedattoha ikkara dandaanno. Woy Qullaawa Maxaafa seekkite xiinxallitannota mitte hagiirraame maate hedattoha ikkara dandaanno.

² Lamente ikkitora kulli manni Magano magansiꞌranni no. Yihowa insa magansiꞌra adhanno? Insa iso magansidhinohu fajjosi ledo sumuu yaanno garinni hattono baxillunninna ayirrinyunni ikkiro Magansiꞌransa adhanno. Yihowa lowo geeshsha banxeemmo. Magansiꞌra hasiissannonkehu iso ikkinota anfoommo hattono dandaaminke deerrinni iso danchu garinni magansiꞌra hasiꞌneemmo.

3. Konni birxichira maa ronseemmo?

³ Konni birxichira hundi waro Yihowa adhino magansiꞌra hiittooteronna xaa yannara Yihowa iso magansiꞌnammora hasiꞌrannota sette doogga ronseemmo. Tenne assineemmo woyite mittu mittunku Yihowa magansiꞌneemmo gara woyyeessiꞌneemmohu hiittoonniitiro heda dandiineemmo. Qoleno halaalu magansiꞌra hagiidhineemmo gede assitannonke yineemmohu mayiraatiro ronseemmo.

HUNDI WARO YIHOWA ADHINO MAGANSIꞌRA

4. Hundi waro heeꞌrinohu Yihowa magansiꞌranno manni iso ayirrisannotanna baxannota leellishinohu hiittoonniiti?

⁴ Hundi waro heedhinori ammanantino labballi yaano Aabeeli, Nohi, Abirihaaminna Iyyoobi Yihowa ayirrissannotanna baxxannota leellishshino. Hiittoonni? Hajajante, ammana noonsata leellishshenna kakkalo shiqishshe iso ayirrissannotanna baxxannota leellishshino. Qullaawu Maxaafi insa Magano magansiꞌrate maa assa hasiissannonsaro mitto mittonka coye dikulanno. Kayinni insa Yihowa ayirrissannota leellishate dandiiture baala assitino; Yihowano magansiꞌransa adhino. Gedensoonni Yihowa Abirihaami sirchira Muse widoonni Seera uyino. Kuni seeri, Yihowa hasiꞌranno garinni iso magansiꞌra dandiinanni dooggano tittire kulanno.

5. Yesuusi reyihunna reyotenni kaihu gedensaanni, Yesuusi harunsaano Yihowa ma garinni magansiꞌra hasiissannonsa?

⁵ Yesuusi reyihunna reyotenni kaihu gedensaanni, mannu Yihowa magansiꞌrate Muse Seera harunsa dihasiissannonsa. (Rom. 10:4) Kiristaanu haaro seera yaano “Kiristoosi Seera” harunsanno. (Gal. 6:2) Insa konni ‘seerira’ hajajantannohu konne asse konne assitinoonte yitannota batinye wodho agadhite woy konne seera qaagge ikkikkinni Yesuusi lawishshanna isi rosiisino roso harunsiteeti. Xaa yannarano Kiristaanu Kiristoosi lawishsha harunse, Yihowa hagiirsiisatenna lubbonsara ‘fooliishsho afiꞌrate’ dandaaminsare baala assanno.—Mat. 11:29.

6. Kuni birxichi kaaꞌlannonkehu hiittoonniiti?

⁶ Magano magansiꞌneemmo woyite assineemmoha mitto mittonka coye xiinxallineemmo woyite ateneeto togo yite xaꞌmi, ‘Tenne hajo daafira woyyeessiꞌroommo coyi maati?’ Qoleno togo yite xaꞌma dandaatto: ‘Magano magansiꞌreemmo gara kawii roore woyyeessiꞌra dandeemmo?’ Woyyeessiꞌrootto coyi heeꞌriro hagiidha hasiissannohe; woyyeessiꞌra hasiissannohe coyi heeꞌriro kayinni huuccatto assidhe heda dandaatto.

YIHOWA MAGANSIꞌNEEMMO WOYITE ASSINEEMMOHU MITU COYI MAATI?

7. Yihowa giddonkenni kaꞌne huucciꞌneemmo huuccatto ma garinni laꞌꞌanno?

⁷ Yihowa huucciꞌneemmo woyite iso magansiꞌnanni heeꞌnoommo. Qullaawu Maxaafi, huuccattonke umo xaadooshshu dunkaani giddo gedensoonni kayinni qullaawu mini giddo shiqinshannihu dancha gede qixxeessinoonni hixaani gede ikkitinota kulanno. (Far. 141:2) Konni hixaani suꞌniilli Magano lowo geeshsha hagiirsiisanno. Hatteente gede giddonkenni kaꞌne huucciꞌneemmoti harancho huuccatto nafa “tashshi assitannosi.” (Law. 15:8; Mar. 33:10) Yihowa banxeemmositanna galatu noonketa kulleemmosi woyite macciishsha hagiirsiissannosi; togo yineemmo gede assannonkehu ikkadu korkaati noonke. Isi huluullinonkere, hexxineemmo coyenna halchonke kullammosira hasiꞌranno. Huuccatto assiꞌnammora albaanni mayine huucciꞌneemmoro seekkine heda hasiissannonke. Hatto assanke iimi Anninkera dancha ‘hixaana’ shiqishiꞌneemmo gede kaaꞌlitannonke.

8. Magano galaxxineemmoti hiitti kaajja faro noonke?

⁸ Yihowa galaxxineemmo woyite iso magansiꞌnanni heeꞌnoommo. (Far. 34:1) Yihowata dhagge ikkitanno akattanna loosino loosi daafira wolootaho kulle iso galaxxa dandiineemmo. Galanteemmore ikkinummoro Yihowa guwinseemmo gede assannonkehu batinyu coyi noonke. Yanna gaaꞌmine Yihowa danchumma yaano assinonke coye baala hiincineemmoha ikkiro iso galaxxineemmo gede assannonkere dihoongeemmo. Sabbakate loosi ‘Maganoho suumenkenni galatu kakkalo’ shiqishiꞌneemmota kaajja faro fanannonke. (Ibi. 13:15) Yihowa huucciꞌnammora albaanni mayine huucciꞌneemmoro seekkine hendeemmonte gede, soqqanshonniwa xaandeemmo manna mayine hasaawinseemmorono seekkine heda hasiissannonke. Shiqishiꞌneemmoti “galatu kakkalo” lowo geeshsha dancha ikkitara hasiꞌneemmo. Wolootaho halaale kulleemmo woyite woꞌma giddonkenni kulleemmohu iseraati.

9. Hundi Israeele gede gambooshshe haꞌra kaaꞌlitannonkehu hiittoonniiti? Gambooshshe haꞌra kaaꞌlitinohe gara kuli.

⁹ Gambooshshe haꞌneemmo woyite Yihowa magansiꞌnanni heeꞌnoommo. Hundi Israeelera togo yine kulloonninsa: “Labballiꞌne baalu dirunni sase hige, . . . doodhanno dargira Maganiꞌne Kaaliiqi albira shiqqona.” (Mar. 16:16) Insa qaensanna gatensa agarannohu nookkiha agurte haꞌra hasiissinonsa. Kayinni Yihowa togo yee qaale einonsa: “Ane Maganiꞌne Kaaliiqi albira shiqqinanni yannara, baattoꞌne ayino diyoranno.” (Ful. 34:24) Kuni Yihowa waajjannohu Israeelete manni woꞌmunni woꞌma iso addaxxe diru kiiro ayirrinsanni ayyaana ayirrisate haꞌranno. Konni garinni insa lowo atoote afidhanno; lawishshaho, Maganu Seera albinni roore huwattanno; danchummasi hiincitanno hattono ammanate roduuwinsa ledo hagiirsiissanno yanna sayissanno. (Mar. 16:15) Ninkeno uminke horo agurre gambooshshe haꞌneemmoha ikkiro togoo atoote afiꞌneemmo. Gambooshshunniwa haranchonna xabbe leeltanno dawaro qolate qixxaambe haꞌneemmo woyite Yihowa mageeshsha hagiidhannoro hanni hedi!

10. Faarso magansiꞌranke widooti yineemmohu mayiraati?

¹⁰ Roduuwinke ledo faarso faarsineemmo woyite Yihowa magansiꞌnanni heeꞌnoommo. (Far. 28:7) Israeelete manni faarso faarsa magansiꞌransa wido ikkitinohu gede asse laꞌꞌanno. Moote Daawiti qullaawu mini giddo faarsitannore 288 Leewaawoota doorino. (1 Dud. 25:1, 6-8) Xaa yannarano galatu faarso faarsine Magano banxeemmota leellisha dandiineemmo. Faarso faarsineemmo woyite roore hasiisanno coyi dancha huuro afiꞌra diꞌꞌikkitino. Hanni tenne hendo: Coyiꞌneemmo woyite ninke baalunku duucha hinge “soꞌneemmo”; tini kayinni gambooshshunniwanna soqqanshonniwa coyiꞌneemmokki gede diassitannonke. (Yai. 3:2) Hatteente gede ‘Faarseemmo woyite huuroꞌya didanchate’ yine Yihowara galatu faarso faarsa agura dihasiissannonke.

11. Faarso 48:13 kultanno garinni maatete deerrinni Qullaawa Maxaafa xiinxallate yanna gaaꞌma hasiissannonkehu mayiraati?

¹¹ Yihowa Qaale xiinxallineemmo woyitenna oosonkera isi daafira rosiinseemmo woyite Yihowa magansiꞌnanni heeꞌnoommo. Sambatu, Israeelete manni barru dilgonsa agure Yihowa ledo noonsa jaalooma illachishanno faro fanannonsa. (Ful. 31:16, 17) Ammanaminohu Israeelete manni oosonsara Yihowanna isi danchumma daafira rosiisannonsa. Ninkeno mittu mittunku Maganu Qaale nabbawatenna xiinxallate yanna gaaꞌma hasiissannonke. Tini Yihowa magansiꞌrate widooti; hattono isiwa shinqeemmo gede kaaꞌlitannonke. (Far. 73:28) Qoleno, maate mitteenni Maganu Qaale xiinxallitanno woyite haaro ilama yaano oosonsa baxillaanchu iimi Anninke ledo dancha jaalooma kalaqidhanno gede kaaꞌlitanni noonsa.—Faarso 48:13 nabbawi.

12. Yihowa xaadooshshu dunkaani giddo worranni uduunnicho loosate daafira noosi laonni maa ronseemmo?

¹² Magano magansiꞌnanni mine minneemmo woyitenna gatamarreemmo woyite Yihowa magansiꞌnanni heeꞌnoommo. Yihowa xaadooshshu dunkaananna giddosi worranni uduunnicho loosa qullaawu loosi gede asse laꞌꞌanno. (Ful. 36:1, 4) Xaa yannarano Yihowa Gambooshshu Addaraashenna wole tiokiraasete minna minate looso qullaawa soqqansho gede asse laꞌꞌanno. Mitu roduuwi konne looso loossanni lowo yanna sayissanno. Maganu Mangiste looso konni garinni kaaꞌlitanno roduuwa naada dihasiissannonke? Hige insa sabbakate loosono loossanno. Insa giddo mitu isinni suwisaano ikka nafa hasidhara dandiitanno. Songote cimeeyye kuri diinaggaabbe loossanno roduuwi ikkadda ikkituro, suwisaano ikkitanno gede shoonte gimbaatu looso kaaꞌlitannota leellisha dandiitanno. Gimbaatu loosira dandoo heedhunkerono hooggunkerono, ninke baalunku Magano magansiꞌnanni mini ishinannokki gede towaata dandiineemmo.

13. Maganu Mangiste looso kaaꞌlate fushshineemmo woxe ma garinni laꞌꞌa hasiissannonke?

¹³ Maganu Mangiste looso kaaꞌlate woxe fushshineemmo woyite Yihowa magansiꞌnanni heeꞌnoommo. Israeele Yihowa albira mulla anganni shiqqannokki gede kulloonninsa. (Mar. 16:16) Insa angansa assitu deerrinni mito coye aa hasiissannonsa. Insa konni garinni, ayyaanaamittetenni insa kaaꞌlate assinoonni qixxaawo naaddannota leellishshanno. Ninkeno Yihowa banxeemmotanna qixxeessinoonninketa ayyaanaamittete qixxaawo naandeemmota leellisha dandiineemmohu hiittoonniiti? Tenne assa dandiineemmoti mitte doogo anganke assitu deerrinni songonkeranna alamete doyicho loosira woxe fushshate. Tenne hajo daafira soqqamaasinchu Phaawuloosi togo yiino: “Aate halchiniro, nookkihu aaninni ikkikkinni afiꞌnoonnihu bikkinni aa danchate.” (2 Qor. 8:4, 12) Fushshineemmo woxi gariha ikka hoogiro nafa giddonkenni kaꞌne uyineemmo woxe Yihowa lowo geeshsha naadanno.—Maq. 12:42-44; 2 Qor. 9:7.

14. Lawishsha 19:17 kultanno garinni Yihowa kaaꞌlo hasiissannonsa roduuwa kaaꞌlate assineemmore ma garinni laꞌꞌanno?

¹⁴ Kaaꞌlo hasiissannonsare ammanate roduuwanke kaaꞌlineemmo woyite Yihowa magansiꞌnanni heeꞌnoommo. Yihowa buxanete uyitannore Israeelete manna kiisannonsata kulinonsa. (Mar. 15:7, 10) Addaho, kaaꞌlo hasiissannosihu ammanate rodiinkera uyinummo kiiro Yihowa isira uyinoommohu gede asse laꞌꞌanno. (Lawishsha 19:17 nabbawi.) Lawishshaho Filiphisiyusi heeꞌranno Kiristaani, usurame noohu Phaawuloosira mitore soyi yannara Phaawuloosi, “Kuni afanshiꞌne suꞌniitanno kakkalo gede Maganu hagiidhannohonna adhannoho” yiino. (Fil. 4:18) Songokkira noo roduuwa hedde, ‘Kaaꞌla dandeemmo rodii noo ikka?’ yite ateneeto xaꞌmi. Yihowa yannanke, wolqanke, dandoonkenna noonkeha maalaamittete coye horoonsiꞌne kaaꞌlo hasiissannonsare kaaꞌlinanna laꞌꞌanno woyite lowo geeshsha hagiidhanno. Isi tenne iso magansiꞌnanni heeꞌnoommohu gede asse laꞌꞌanno.—Yai. 1:27.

HALAALU MAGANSIꞌRA HAGIIDHINEEMMO GEDE ASSITANNONKE

15. Halaalunni Yihowa magansiꞌrate yannanna sharro hasiissannoha ikkirono, tenne assa diqarrissanno yineemmohu mayiraati?

¹⁵ Halaalunni Yihowa magansiꞌrate yannanna sharro hasiissanno. Kayinni tenne assa qarrissannota diꞌꞌikkitino. (1 Yoh. 5:3) Mayira? Korkaatuno Yihowa magansiꞌneemmohu iso banxeemmo daafiraati. Hanni annisira mitore aara hedino qaaqqo hendo. Isi annisira aanno misile kayisanni lowo yanna gudinoha ikkara dandaanno. Tenne misile kayisanni lowo yanna gudino daafira digaabbanno. Isi annasi baxanno hattono tenne misile annisira uyino daafira hagiidhanno. Hatteente gede ninkeno Yihowa banxeemmo daafira yannankenna wolqanke horoonsiꞌne iso magansiꞌrate assineemmori hagiirsiisannonke.

16. Ibiraawoota 6:10 kultanno garinni ninke mittu mittunku Yihowa hagiirsiisate assineemmore isi ma garinni laꞌꞌanno?

¹⁶ Qaaqquullensa baxxanno annuwinna amuuwi ‘Qaaqquullinke mittu gari afansha aannonke’ yite diheddanno. Insa mittu qaaqqinsa assa dandaannore wolu qaaqqinsa assa dandaannokkita affino. Hatteente gede iimi Anninke ninke mittu mittunku assa dandiineemmore afanno. Affinoonni manninna baxxinanni manni assa dandaannorinni roorinore assa dandiitinanniha ikkara dandaanno. Woy diru akkalle amaddinoꞌne daafira, dhiwanni waadannoꞌne daafira woy maatete qeechi nooꞌne daafira wolootu assitannohu geeshsha assa hoogginara dandiitinanni. Hatto ikkiro hexxo mudhitinoonte. (Gal. 6:4) Yihowa loossinoonni looso dihawanno. Dancha giddonni kaꞌine wolqaꞌne assitu geeshsha uyitinanniha ikkiro Yihowa hagiidhanno. (Ibiraawoota 6:10 nabbawi.) Yihowa assate heddinoonniri maatiro nafa afanno. Isi, iso magansiꞌrate assineemmorinni hagiirraamma ikkinammoranna harshammi yinammora hasiꞌranno.

17. (a) Yihowa magansiꞌneemmo woyite assineemmoha mito coye assa qarra ikkitunkero maa assa dandiineemmo? (b) “Hagiirrikki Lexxanno Gede Assiꞌri” yitanno saaxinera noori giddo ate kaaꞌlinohehu hiikkonneeti?

¹⁷ Yihowa magansiꞌneemmo woyite assineemmoha mito coye assa, lawishshaho hojju xiinxallo assiꞌra woy soqqansho fula qarra ikkitinonkehalla ikki? Kuri coyibba duucha woyite assinummo kiiro albinni roore assa baxissankera dandiitanno hattono albinni roore hoꞌro afiꞌneemmo. Yihowa magansiꞌrate assineemmore, mite ispoorte loosatenna muuziiqa gana rosiisiꞌrate ledo heewisiisa dandiineemmo. Kuri coyibba saꞌne saꞌne calla assineemmoha ikkiro dandoonke woyyeessiꞌra didandiineemmo. Kayinni hanni kuri coyibba barru baala assate murciꞌnoommo yine hendo. Umo shiima shiima yanna calla rosiisiꞌnanni gedensaanni seeda yanna rosiisiꞌra dandiineemmo. Tenne assate sharramanke dancha guma abbitinota laꞌneemmo woyite, kuri coyibba assineemmo yanna quqquxamme agadhinammoranna addinta banxammora dandiineemmo. Yihowa magansiꞌneemmo woyite assineemmoreno hakko garinni woyyeessiꞌra dandiineemmo.

18. Yihowa hede kalaqinonke garinni heeꞌra dandiineemmohu hiittoonniiti? Tini maa afiꞌneemmo gede assitannonke?

¹⁸ Woꞌmu wodaninkenni Yihowa magansiꞌneemmoha ikkiro isi hede kalaqinonke garinni heeꞌnanni heeꞌnoommo. Tini hagiirraamma ikkineemmonna dancha heeshsho heeꞌneemmo gede hattono hegerera Yihowa magansiꞌrate hexxo afiꞌneemmo gede assitannonke. (Law. 10:22) Yihowa iso magansidhannorira qarru iillannonsa woyite kaaꞌlannonsata anfoommo daafira giddoyidi keeri noonke. (Isa. 41:9, 10) Kalaqamu baalu ‘ayirrisanna guweenya’ aa hasiissannoha baxillaancho iimi Annanke magansiꞌneemmo woyite hagiirraamma ikkineemmo gede assannonkehu ikkadu korkaati noonke!—Aju. 4:11.