Amuuwa—Ewuniqe Lawishshinni Rosse

1-2. (a) Ewuniqe ayeti? Ise qaaqqisera Yihowanna Yesuusi daafira rosiissu woyite qarra ikkinoseri maati? (b) Aaniidi qoolira noo misile maa leellishshanno?

QULLAAWU MAXAAFI Ximootewoosi cuuami woyite ikkinore kulannokkiha ikkirono, isi cuuami woyite amasi Ewuniqe hagiidhitinota heda dandiineemmo. (Law. 23:25) Ise Ximootewoosi cuuamara wayi giddo uurre nooha laꞌe hagiidhitino gara heda dandaatto. Ewuniqe Ximootewoosi ahaahe Loyida mule uurrite muushshi yite no. Ximootewoosi wayi giddo lixita isera afale beꞌe beꞌe yitinose. Hakkiinni Ximootewoosi, muushshi yaanni wayi giddonni fulita ise hagiirru batinyinni wiꞌla hanaffu. Ewuniqe fonqolo ikkannori heeꞌrirono, qaaqqise Yihowanna Beettosi Yesuusi Kiristoosi baxanno gede assite lossiꞌra dandiitino. Ise qaaqqose konni garinni lossiꞌrate hiikkonne qarra dandiite saꞌꞌa hasiissinose?

² Ximootewoosi lophinohu ammaꞌnotenni bebbeehantino maate giddooti. Annisi Giriikichaho; amasinna ahaahesi kayinni Yihudootaho. (Soq. 16:1) Ewuniqenna Loyida Kiristaana ikkinohu Ximootewoosi wedellichu heeꞌreenna ikkikki digatino. Ikkirono annisi Kiristaancho diꞌꞌikkino. Ximootewoosi hiittee ammaꞌno doodha ikka? Isi umisi doorsha doodhanno deerra iillinoha ikkara dandaanno. Isi Kiristaancho ikkinokki annisi wido ikka doodhakka? Anjesinni hanafe rosinoha Yihudu budenso Yesuusi Kiristoosi rosaancho ikka doodhakka?

3. Lawishsha 1:8, 9 kultanno garinni, amuuwu oosonsa Yihowa jaalla ikkitanno gede kaaꞌlate assannore isi ma garinni laꞌꞌanno?

³ Yannankera noori Kiristaana ikkino amuuwino maatensa lowo geeshsha baxanno. Wolu baalunkunni roore insa oosonsa Yihowa ledo muli jaalooma kalaqidhanno gede kaaꞌla hasiꞌranno. Maganinke insa oosonsa kaaꞌlate assannore lowo geeshsha naadanno. (Lawishsha 1:8, 9 nabbawi.) Yihowa, oosonsara halaale rosiisate sharramannore batinye amuuwa kaaꞌlinonsa.

4. Xaa yannara amuuwaho iillannonsa qarri maati?

⁴ Mitte ama, ‘Qaaqqiꞌya Ximootewoosi gede Yihowara soqqama doodhanso giwa ikka?’ yite hedase nooreentilla. Qoleno, annuwunna amuuwu oosonsara tenne Sheexaanu alame giddo lowo fonqoli iillannonsata afino. (1 Phe. 5:8) Hakkiinni saeno batinyu amuuwi oosonsa calluwinsa woy Yihowa Farciꞌraasincho ikkinokki anni ledo lossiꞌranno daafira lowo qarri iillannonsa. Lawishshaho Kiristiinib yinanni rodoo togo yitino: “Minaanniꞌya dancha annaati hattono maatesi baxannoho; ikkollana oosonke Yihowa Farciꞌraasine ikkitanno gede asse lossiꞌreemmata lowo geeshsha giwanno. Oosoꞌya Yihowa magansidhannore ikka dandiitannohu hiittoonniiti yee hedanni lowo diro wiꞌloomma.”

5. Konni birxichira maa ronseemmo?

⁵ Amuuwa, kiꞌneno Ewuniqe gede oosoꞌne Yihowa baxxannonna isira soqqantanno gede assitine lossiꞌra dandiitinanni. Konni birxichira coyidhinannirinninna assitinannirinni oosoꞌne rosiisate Ewuniqe lawishsha harunsa dandiitinanni gara ronseemmo. Qoleno Yihowa kaaꞌlannoꞌnehu hiittoonniitiro laꞌneemmo.

COYIDHINANNIRINNI OOSOꞌNE ROSIISSE

6. Layinki Ximootewoosi 3:14, 15 kultanno garinni Ximootewoosi Kiristaancho ikkinohu hiittoonniiti?

⁶ Ximootewoosi shiimu heeꞌreenna, amasi Yihudu ammaꞌno rosi garinni isira “Qullaawa Borro” rosiisate dandiiture baala assitino. Ise Yesuusi Kiristoosi daafira affinori nookki daafira gari egenno dinose. Ikkirono Ximootewoosi Qullaawa Borronni, Kiristaancho ikkate xinta ikkinore rosino. Kayinni isi Kiristaancho ikkakka? Isi wedellicha ikkinohura Kiristaancho ikka woy ikka hooga doodha dandaanno. Ximootewoosi, Yesuusi daafira kulanno halaale ‘afanno’ gede amasi kaaꞌlitinositi dihuluullissannote. (2 Ximootewoosi 3:14, 15 nabbawi.) Ewuniqe qarra ikkannori heeꞌrirono qaaqqisera Yihowa daafira rosiisa dandiitino daafira lowo geeshsha hagiidhitinoti dihuluullissannote! Addanko Ewuniqe suꞌmise garinni heedhino; suꞌmise “qeela” yitanno tiro afiꞌrinoho.

7. Ewuniqe beettise cuuamihu gedensaanni, ayyaanaamittetenni lophanno gede kaaꞌlate maa assa dandiitanno?

⁷ Ximootewoosi cuuame mitte lowo geeshsha hasiissanno mixo wonshiꞌrino; ikkollana Ewuniqe isi cuuamihu gedensaannino isi daafira yaada diagurtino. Isi hakkuyi gedensaanni hiittoo heeshsho heeꞌra doodha ikka? Busha jaalla kalaqira ikka? Rosoho Ateensi haꞌre Magano magansidhannokki fullahaano rosiissanno roso ammana ikka? Jirote borojjicho ikke, yannasi, wolqasinna wedellimmasi mulla huꞌna ikka? Ewuniqe Ximootewoosi dancha doorsha doodhanno gede giddeessa didandiitanno; kayinni kaaꞌla dandiitanno. Hiittoonniiti? Ise qaaqqise Yihowa lowo geeshsha baxanno gedenna Beettisira noosi galati lexxanno gede agurtukkinni diinaggaabbe kaaꞌla dandiitanno. Hige fonqolo ikkanno coyi iillannonsari ammaꞌnotenni bebbeehantino maate calla diꞌꞌikkitino. Yihowa Farciꞌraasine ikkitino anniranna amara nafa, wedellu oosonsa ammanantinore Yihowa soqqamaano ikkitanno gede kaaꞌla shota ikka hooggansara dandiitanno. Ikkina annuwunna amuuwu Ewuniqe lawishshinni maa rosa dandaanno?

8. Mitte ama Yihowa Farciꞌraasincho ikkino minaannise oosonsara ayyaanaamittete hasiisannore wonshanno gede kaaꞌla dandiitannohu hiittoonniiti?

⁸ Oosoꞌne ledo Qullaawa Maxaafa xiinxalle. Minaamuwa, minaanniꞌne Yihowa Farciꞌraasincho ikkinoha ikkiro, Yihowa minaanniꞌne oosoꞌneta ayyaanaamittete hasatto wonshanno gede kaaꞌlitinasira hasiꞌranno. Tenne assa dandiitinanni doogga giddo mitte ganyitine Maatete Magansiꞌra qixxaawora kaaꞌlamate. Maatete Magansiꞌra daafira danchare hasaabbe; hattono hagiirsiissannota ikkitanno gede maa assa dandiitinanniro hedde. Minaanniꞌne baxxitinota Qullaawu Maxaafi xiinxallo pirogiraame qixxeessanno gedeno kaaꞌla dandiitinanni. Qoleno oosoꞌne giddo mitu, Hegerera Hagiidhitanni Heeꞌra Dandaatto! yaanno maxaafinni Qullaawa Maxaafa xiinxallitanno geeshshire ikkitinoha ikkiro, minaanniꞌne insa xiinxallisanno gede kaaꞌlama dandiitinanni.

9. Yihowa Farciꞌraasincho ikkinokki minaanni noose ama kaaꞌlitanno amaale afiꞌra dandiitannohu hiikkiinniiti?

⁹ Mitu amuuwi, qaaqquullensa calluwinsa lossiꞌranno daafira woy minaanninsa Yihowa Farciꞌraasincho ikkinokki daafira qaaqquullinsara insa Qullaawa Maxaafa xiinxallisanno. Kiꞌne maateno togoota ikkitinoha ikkiro, quwa saꞌine yaaddinoonte. Yihowa kaaꞌlannoꞌne. Isi dirijjitesi widoonni, oosoꞌne rosiissinanni gede qixxeessinoha kaajja uduunne horoonsidhe. Konne uduunne maatete magansiꞌrara danchu garinni horoonsiꞌra dandiitinanni gara kultannoꞌne gede woꞌnaalshu noonsa annuwanna amuuwa amaaꞌla dandiitinanni.c (Law. 11:14) Qoleno Yihowa oosoꞌne ledo danchu garinni hasaabbinanni gede kaaꞌlannoꞌne. Isi oosoꞌne surreranna wodanira noore affinanni gede kaaꞌlaꞌnera huucciꞌra dandiitinanni. (Law. 20:5) Lawishshaho, ‘Rosu mine roore fonqolo ikkannoꞌneri maati?’ yee xaꞌma dancha gede hasaawa hanafate kaaꞌlitaꞌnera dandiitanno.

10. Qaaqquulliꞌne Yihowa daafira rossanno gede kaaꞌla dandiitinanniti wole doogo hiittenneeti?

¹⁰ Oosoꞌnera Yihowa daafira rosiissinanni faro hasidhe. Yihowanna isi assinoꞌnehu batinyu danchu coyi daafira hasaabbe. (Mar. 6:6, 7; Isa. 63:7) Hakko iso oosoꞌne mine ganyitine xiinxallisa dandiitinannikkiha ikkiro hattoore kayissine hasaawaꞌne danchate. Aleenni kulliti Kiristiini togo yitino: “Ayyaanaamitte coye hasaaweemmati gari yanna nooekki daafira afiꞌrumma faro baala horoonsiꞌrate woꞌnaaleemma. Fulle milli yineemmo woyite woy yowolotenni haꞌneemmo woyite Yihowahu dhagge ikkanno kalaqami daafiranna batinyu ayyaanaamittete coye daafira hasaambeemmo. Qaaqquulliꞌya naggi yituta, Qullaawa Maxaafa uminsanni xiinxallitanno gede jawaachishoomma.” Yihowa dirijjitenna ammanate roduuwiꞌne daafira danchare hasaabbe. Songote cimeeyye mishshinoonte. Songote cimeeyye daafira coyidhinanni coyi, oosoꞌne kaaꞌlo hasiissannonsa woyite insa kaaꞌlo xaꞌmidhanno gede woy xaꞌmidhannokki gede assara dandaanno.

11. Yaiqoobi 3:18 kultanno garinni mini giddo keeru heeꞌranno gede assa hasiissannohu mayiraati?

¹¹ Mini giddo keeru heeꞌranno gede asse. Woꞌmanka woyite minaannaꞌnenna oosoꞌne baxxinannita leellishshe. Minaanniꞌne daafira kayissine hasaabbinanni woyite shaqqillunninna iso ayirrissinannita leellishanno garinni hasaabbe; oosoꞌneno hatto assitanno gede qajeelse. Hatto assaꞌne oosoꞌnera Yihowa daafira rosa roore shota ikkitannonsa gede assitanno. (Yaiqoobi 3:18 nabbawi.) Hanni Romaaniyaho baxxino suwisaancho ikke soqqamannohu Yooseefi woꞌnaalsha laꞌno. Isi shiimu noo yannara annisi, isira, amasiranna roduuwisira Yihowara soqqama qarra ikkitannonsa gede assino. Yooseefi togo yiino: “Amaꞌya mini giddo keeru heeꞌranno gede assate lowo geeshsha sharrantanno. Anniꞌya roore kaajjado ikki kiiro amaꞌya roore shaqqado ikkitanno. Ise annanke ayirrisanna isira hajajama qarra ikkitinonketa huwatturo, Efesooni Sokka 6:1-3 nabbabbannonke. Hakkiinni ise anninketa dancha akattanna iso ayirrisa hasiissannonkehu mayiraatiro kultannonke. Konni garinni ise maatenke giddo keeru heeꞌranno gede assitino.”

ASSITINANNIRINNI OOSOꞌNE ROSIISSE

12. Layinki Ximootewoosi 1:5 kultanno garinni Ewuniqe lawishshi Ximootewoosi kaaꞌlinohu hiittoonniiti?

¹² Layinki Ximootewoosi 1:5 nabbawi. Ewuniqe Ximootewoosira dancha lawishsha ikkitino. Ise Ximootewoosira addu ammana loosunni leellisha hasiissannota rosiissusikki digattino. (Yai. 2:26) Ximootewoosi amasi mitto coye assitannohu Yihowara noose baxillinni kaꞌe ikkinota afinoti dihuluullissannote. Ximootewoosi amasi Yihowara soqqamase hagiirraame assitinoseta afino. Ewuniqe lawishshi Ximootewoosi kaaꞌlinosihu hiittoonniiti? Soqqamaasinchu Phaawuloosi, Ximootewoosira amasite gedeeti kaajjado ammana noosita kulino. Kuni hedeweelcho ikkinore diꞌꞌikkino. Ximootewoosi amasi lawishsha laino hattono ise faale haꞌrate kaino. Hatteente gede yannankerano batinyu amuuwi mitto ‘qaaleno’ coyiꞌrikkinni assootinsanni maatensa Yihowara soqqantannore ikkitanno gede kaaꞌla dandiino. (1 Phe. 3:1, 2) Kiꞌneno hatto assa dandiitinanni. Hiittoonni?

13. Mitte ama Yihowa ledo noose jaalooma balaxisiisa hasiissannosehu mayiraati?

¹³ Yihowa ledo noohe jaalooma balaxisiisi. (Mar. 6:5, 6) Batinyu minaamuwi gede atino lowo coye assootta. Qaaqquullikkira maalaamittete hasiisannore wonshate yite yannakkinna woxekki ootta, goxatta yanna nafa agurootta hattono wolere assite kaaꞌlootta. Ikkollana togoo coyi Yihowa ledo noohe jaalooma kaajjishiꞌratta yanna hoogatta gede assahera wodhitooti. Ganyite huuccatto assiꞌrate, Qullaawa Maxaafa xiinxallatenna gambooshshe haꞌrate yanna gaaꞌmi. Konni garinni ayyaanaamittekki kaajjishiꞌra hattono maatekkiranna wolootaho dancha lawishsha ikka dandaatta.

14-15. Liini, Maariyanna Zhawu lawishshinni maa rosootto?

¹⁴ Hanni, amuuwinsa lawishsha harunse Yihowa baxanna iso addaxxa rosinohu mitu wedelli lawishsha laꞌno. Kiristiini qaaqqo Liini togo yitino: “Anninke mine noo woyite Qullaawa Maxaafa xiinxalla didandiineemmo. Kayinni amanke horo gambooshshe dihossanno. Qullaawu Maxaafi daafira gari egenno noonkekkiha ikkirono ise lawishshi kaajjado ammana heedhannonke gede kaaꞌlinonke. Yihowa Farciꞌraasine rosiissanno rosi halaale ikkinota anfoommohu gambooshshe haꞌra hanafammora lowo yanna albaanniiti.”

¹⁵ Maariyanna maatese gambooshshe haꞌranno woyite annise mito woyite qorichishannonsa. Maariya togo yitino: “Egennoommahu lowo geeshsha worbuullu meya roduuwi giddo mitte amaꞌyaati. Qaaqqo noomma waro, mannu mayyaannoe yee waajje mito coye assa giweemma woyiti no. Ikkollana amaꞌya worbanna woꞌmanka woyite Yihowa balaxisiissannota ikkitinota laꞌꞌaꞌya manna waajjeemmakki gede kaaꞌlitinoe.” Zhawu anni maatesi mine ayyaanaamittete coye hasaabbannota hoolanno. Zhawu togo yiino: “Amaꞌya annaꞌya hagiirsiisate yite Yihowara noose baxille agurranna wole baalanka coye agurtanno; tini dhagge ikkitinoe.”

16. Amuuwu lawishshi woloota kaaꞌlara dandaannohu hiittoonniiti?

¹⁶ Amuuwa, kiꞌne lawishshi woloota kaaꞌlannota qaagge. Hiittoonni? Hanni Ewuniqe lawishshi soqqamaasincho Phaawuloosi kaaꞌlino gara laꞌno. Isi Ximootewoositi ‘halaalaancho ammana alba Ewuniqera noota’ coyiꞌrino. (2 Xim. 1:5) Phaawuloosi umo Ewuniqe ammana afinohu mamooteeti? Phaawuloosi Loyidanna Ewuniqe ledo xaadinohu umo misiyoone ikke Lisxira haꞌri woyite ikkikki digatino; insa Kiristaana ikkanno gede kaaꞌlinohuno iso ikkara dandaanno. (Soq. 14:4-18) Hanni tenne hedi: Phaawuloosi Ximootewoosira mitu 15 diri gedensaanni sokka borreessi woyite Ewuniqe ammanatenni assitinore qaagino; hattono ise lawishshi harunsa hasiissannoha ikkinota coyiꞌrino! Ise lawishshi Phaawuloosi lowo geeshsha jawaachishino; hattono umi xibbi diro heeꞌrinoha batinye Kiristaana kaaꞌlinoha ikkara dandaanno. Qaaqquulleꞌne calluwiꞌne woy ammaꞌnotenni bebbeehantino maate giddo lossidhinanni heedhinoonniha ikkiro, danchu lawishshiꞌne woloota jawaachishannotanna loosoho kakkayisannota huluullantinoonte.

17. Qaaqqiꞌne iso qajeelsate sharrantinanni heedhineennanni giwinoha lawiꞌnero maa assa hasiissannoꞌne?

¹⁷ Qaaqqiꞌne iso kaaꞌlate sharrantinanni heedhineennanni giwinohalla lawiꞌne? Qaaqqoꞌne qajeelsate yanna hasiissannota qaagge. Misile leellishshannonte gede, mitto wixa wixxinanni woyite, ‘Kuni wixi lophe guma laala ikka?’ yitine heddinanni woyiti heeꞌrara dandaanno. Lossitinanniri kiꞌne ikka hoogginirono, waa hayikkissinanni wixu lophanno gede injo kalaqa dandiitinanni. (Maq. 4:26-29) Hatteente gede mitte ama mito woyite, “Qaaqqiꞌya Yihowa baxanno gede seekke rosiisoomma ikka?” yite huluullantara dandiitanno. Qaaqquulliꞌne dancha doorsha doodhitanno gede giddeessa didandiitinanni. Ikkollana insa qajeelsate dandiitinire baala assa agura hoogginiro, ayyaanaamittetenni lophitanno faro fantinanninsa.—Law. 22:6.

YIHOWA KAAꞌLANNOꞌNETA ADDAXXE

18. Yihowa oosoꞌne ayyaanaamittetenni lophitanno gede kaaꞌlannonsahu hiittoonniiti?

¹⁸ Hundinni kayise Yihowa batinyu wedelli jaallasi ikkitanno gede kaaꞌlino. (Far. 22:9, 10) Yihowa kiꞌne qaaqquullino hasatto noonsaha ikkiro ayyaanaamittetenni lophitanno gede kaaꞌlannonsa. (1 Qor. 3:6, 7) Oosoꞌne halaalu mininni xeertidhinoha ikkiro nafa, Yihowa insa baxa diaguranno. (Far. 11:4) Insa shiima geeshsha nafa, ‘wodaninsa hegere heeshsho aanno halaali widira dooinota’ leellishshuro Yihowa kaaꞌlannonsa. (Soq. 13:48, NW; 2 Dud. 16:9) Isi oosoꞌnera, macciishsha hasiissannonsa coye maltino yannara coyidhinanni gede kaaꞌlannoꞌne. (Law. 15:23) Woy isi songote giddonni mittu rodii woy rodoo insa kaaꞌlitanno gede kakkayisara dandaanno. Qaaqquulliꞌne lophituhu gedensaanni nafa, anje heedheenna rosiissinoonninsaha mito coye qaagganno gede Yihowa kaaꞌlansara dandaanno. (Yoh. 14:26) Coyidhinannirinninna assitinannirinni lawishsha ikkitine oosoꞌne agurtinikkinni qajeelsitinanniha ikkiro, Yihowa maassiꞌrannoꞌne.

19. Yihowa hagiirsiissinannita addaxxa dandiitinannihu mayiraati?

¹⁹ Oosoꞌne dancha doorsha doodhiturono doodha hooggurono Yihowa kiꞌne baxannoꞌne. Isi kiꞌne baxannoꞌnehu baxxinannisi daafiraati. Qaaqquulleꞌne calluwiꞌne lossidhinanni heedhinoonniha ikkiro, Yihowa qaaqquulliꞌnera Anna kiꞌnera kayinni malannoha woy Agaraancho ikkannota kule qaale eino. (Far. 68:5) Oosoꞌne dancha doorsha doodhitanno gede giddeessa didandiitinanni. Ikkollana Yihowa kaaꞌlo addaxxanna dandiitinire baala assa agurtinannikkiha ikkiro, iso hagiirsiisa dandiitinanni.