Baxillu Waajja Qeelleemmo Gede Kaaꞌlannonkehu Hiittoonniiti?

1. Mitu manni waajjannori maati?

HANNI aante noo woꞌnaalshuwa laꞌno. Nestoorinna minaamasi Maariya sabbakkannori roore hasiissannowa hadhe soqqama hasidhino.b Ikkirono insa tenne assate heeshshonsa gara biddi assiꞌra hasiissinonsa. Kayinni shiimu woxinni heeꞌneemmo heeshsho hagiidhineemmo gede assa hooggankera dandiitanno yite waajjitino. Biiniyaami Yihowa Farciꞌraasincho ikkinohu loosonke gimbanni gobbaraati; isi Maganu manni wido ikkiro dartu iillannosita afino. Tini isi waajjanno gede assitinosi. Kayinni isi roore waajjinohu maateꞌya ammaꞌno soorriroommota affuro mayitannoe yeeti. Vaaleeri buutonnihu kaanserete dhibbi amadinoseta kulloonnise; isera Qullaawu Maxaafi mundeete daafira kulannori ledo sumuu yaanno garinni akkamanno akimicha afiꞌra qarra ikkitinose. Ise reyemma yite waajjitinoti dihuluullissannote.

2. Waajja qeeꞌlate sharrama hasiissannonkehu mayiraati?

² Ateno togoo coyi waajjishe egenninohe? Ninke giddo batinyu waajjine egenninoommo. Waajja qeeꞌlineemmo gara rosa hoongummoro, Yihowa ledo noonke jaalooma hunannoha busha coye assinammora dandiineemmo. Sheexaanu hasiꞌrannoti tenneeti. Sheexaanu waajjine Yihowa seerira hajajammeemmokki gede assankera woꞌnaalanno; tenne hajajo giddo mitte dancha duduwo duduwate. (Aju. 12:17) Sheexaanu bushaho, mararro nookkihonna kaajjadoho. Ikkirono Sheexaanu gawajjo gargadha dandaatto. Hiittoonni?

3. Waajja qeelleemmo gede kaaꞌlannonkeri maati?

³ Yihowa baxannonketanna ledonke noota ammannummoro, Sheexaanu waajjishiishankera didandaanno. (Far. 118:6) Lawishshaho, Faarso 118 borreessino faarsaasinchira mitu lowo geya yaachishanno coyi iillinosi. Isira lowo diinna noosi; kuri giddo gamu lowo silxaane noonsareeti (kiiro 9, 10). Mite yannara iso lowo geeshsha waandoonnisi (kiiro 13). Yihowano kaajjishe seejjinosi (kiiro 18). Ikkirono kuni faarsaasinchi “diwaajjeemmo” yee faarsino. Isi beꞌe yaannokki gede kaaꞌlinosiri maati? Yihowa kaajjishe seejjinosiha ikkirono lowo geeshsha baxannosita afino. Kuni faarsaasinchi iillannosi qarri ikkihano ikkiro, baxillaanchu Maganisi iso kaaꞌlate woꞌmanka woyite qixxaawinoha ikkinota ammanino.—Far. 118:29.

4. Maganu baxannonketa addaxxinummoro hiittoo waajja qeeꞌla dandiineemmo?

⁴ Yihowa ninke mitto mittonka baxannonketa ammana hasiissaanke. Tenne ammananke aane nooha sase rosamino coye waajjineemmokki gede kaaꞌlitannonke; insano: (1) maatenkera hasiisannore shiqisha hoongeemmo yine waajjate, (2) manna waajjate hattono (3) reyo waajjate. Umi gufora kulli manni Maganu baxannonsata ammanino daafira, waajja qeeꞌla dandiino.

MAATENKERA HASIISANNORE SHIQISHA HOONGEEMMO YINE WAAJJA

5. Maatete umo ikkitinore hiitti coyibba yaachishshansara dandiitanno? (Aaniidi qoolira noo misile lai.)

⁵ Kiristaancho ikkinohu maatete umi maatesira maalaamittete hasiisannore shiqisha mulluri gede asse dilaꞌꞌanno. (1 Xim. 5:8) Ati maatete umootiro tenne Koroonu fayya yannara loosoꞌya hoogeemmo yite yaadoottoha ikkara dandaanno. Maateꞌyara hasiissanno sagale shiqishanna minu kira baaxxa hoogeemmo yite yaadoottohano ikkara dandaanno. Qoleno loosoꞌya hoogummoro wole afiꞌra didandeemmo yite waajjoottoha ikkara dandaanno. Woy aleenni kulliri Nestoorinna Maariya gede shiimu woxinni heeꞌra didandeemmo yite waajjoottoha ikkara dandaanno. Sheexaanu konni garinni lowo manna waajjishiisha dandiino.

6. Sheexaanu mayine hendeemmo gede assate woꞌnaalanno?

⁶ Sheexaanu Yihowa ninke mittu mittunku daafira dihedanno yine hattono maatenkera hasiisannore shiqishate sharrammeemmo woyite dikaaꞌlannonke yine hendeemmo gede assate woꞌnaalanno. Hakko daafira loosonke hoongeemmokki gede aye coyeno wole agurina Qullaawu Maxaafihu xintu seeri ledo sumuu yaannokkire assa hasiissannonke yine hendeemmoha ikkara dandaanno.

7. Yesuusi maa buuxisinonke?

⁷ Yihowa baalunkunni roorse afinohu Yesuusi, Maganu ‘hasiisannonkere huucciꞌnummokkinni balaxe’ afinota kulino. (Mat. 6:8) Qoleno Yesuusi Yihowa hasiisannonkere aankera qixxaawinoha ikkinota afino. Kiristaana ikkinoommo daafira ninke Maganu maate miillaati. Yihowa maatete Umo ikkino daafira, 1 Ximootewoosi 5:8 kulloonnihu xintu seeri ledo sumuu yaannore assannota dihuluullammeemmo.

8. (a) Maatenkera hasiisannore shiqisha hoongeemmo yine waajjineemmokki gede kaaꞌlannonkeri maati? (Maatewoosi 6:31-33) (b) Misile leellishshannonte gede, mitte rodoora sagale massanni noo minaanninna minaama lawishsha harunsa dandiineemmohu hiittoonniiti?

⁸ Yihowa ninkeno maatenkeno baxannota ammannummoro, hasiisannonkere hoongeemmo yine diyaandeemmo. (Maatewoosi 6:31-33 nabbawi.) Yihowa hasiisannonkere wonsha baxanno; isi baxillaanchohonna shaqqadoho! Isi uulla kalaqi woyite heeshshote hasiisannore calla kalaqe diagurino. Isi baxillunni uullate aana, hagiidhineemmo gede assannonkeha batinye coye kalaqino. (Kal. 2:9) Mito woyite noonkeri shiima ikkirono hasiisannonkere hoongoommokkita qaaga hasiissannonke. Yihowa hasiisannonkere woꞌmanka woyite aannonke. (Mat. 6:11) Xaa yannara agurreemmohu maalaamittete coyi baalu, baxillaanchu Maganinke xaano ikko albillitte aannonke atoote hendiro garire ikkinokkita qaaga hasiissannonke. Nestoorinna Maariya tenne wodanchino.—Isa. 65:21, 22.

9. Nestoorinna Maariya lawishshinni maa rosootto?

⁹ Nestoorinna Maariya Kolombiyaho qawaaxxaame heeshsho heeꞌrannoreeti. Insa togo yiino: “Heeshshonke bikkunnita assiꞌne soqqanshonke halashshiꞌrate hendoommo; kayinni shiimu woxinni hagiirru noo heeshsho heeꞌra didandiineemmo yine waajjinoommo.” Insa waajja qeeꞌlanno gede kaaꞌlinonsari maati? Yihowa batinye doogganni baxille leellishinonsa gara hiincitino. Yihowa woꞌmanka woyite towaatannonsata addaxxitino daafira lowo woxe baantanninsa looso agurtino. Insa minensa hirte hatte gobbankura sabbakkannori roore hasiissanno qooxeessa hadhino. Insara hatto assansanni mayi macciishshaminonsa? Nestoori togo yiino: “Maatewoosi 6:33 yitannori halaale ikkinota huwantoommo. Maalaamittete hasiisannonkere horo hoonge diegenninoommo. Xa albinni roore hagiirru noo heeshsho heeꞌnanni heeꞌnoommo.”

MANNA WAAJJA

10. Mannu wole manna waajjannoti dhagge ikkitannonkekkihu mayiraati?

¹⁰ Mannu ooso lowo diro mimmito gawajjitanni keeshshitino. (Ros. 8:9) Lawishshaho, gashshaasine silxaanensa garimale horoonsidhanno, jaddo loossannori mancaꞌꞌa coye assitanno, rosu mine wolqa roortinori ledonsa rossannore xontanno hattono waajjishiishshanno; mitu manni isinni mininsa manna nafa beebba assiꞌranno. Mannu wole manna waajjansa dhagge assinannita diꞌꞌikkitino! Ikkina Sheexaanu tenne horoonsiꞌre gawajjankera woꞌnaalannohu hiittoonniiti?

11-12. Sheexaanu manna waajjineemmo gede asse gawajjannonkehu hiittoonniiti?

¹¹ Sheexaanu manna waajjine Yihowara ammanammeemmokki gedenna sabbaka agurreemmo gede assate woꞌnaalanno. Sheexaanu xixxiiweennansa gashshaano loosonke agabbanno hattono darammeemmo gede assitanno. (Luq. 21:12; Aju. 2:10) Sheexaanu alame giddo noohu batinyu manni Yihowa Farciꞌraasine daafira gara ikkinokkire woy kapho ikkino coye tareessanno. Konne kapho ammananno manni qacifatankera wole agurina gawajjankera dandaanno. (Mat. 10:36) Sheexaanunnita xagarrote hayyo dhagge assiꞌra hasiissaanke? Dihasiissannonke. Isi tenne hayyo umi xibbi dirono horoonsiꞌrino.—Soq. 5:27, 28, 40.

¹² Sheexaanu horoonsiꞌranno hayyo gashshaasine gibbannonketa waajjineemmo gede assa calla diꞌꞌikkitino. Mitootu mannu gane gawajjannonsantenni roore Yihowa Farciꞌraasine ikkinummoro maatenke mayitannonke yite waajjitanno. Insa fiixansa lowo geeshsha baxxanno; hattono fiixinsa Yihowa afaranna baxara hasidhanno. Insa fiixinsa halaalaanchu Maganinna soqqamaanosi daafira ayirrinye xeinore coyiꞌranna macciishshitanno woyite, xissiisidhanno. Ikkirono mito woyite umi qara giwinonsa fiixi gedensoonni halaalu minira daara dandaanno. Ikkina Yihowa Farciꞌraasine ikkinoommo daafira maatenke miilla horo gambolla gibbunke? Hakka woyite maa assineemmo?

13. Maganu baxannonketa ammananke maatenke miilla gibbannonketa dandiine heeꞌneemmo gede kaaꞌlitannonkehu hiittoonniiti? (Faarso 27:10)

¹³ Faarso 27:10 nooti kaajja hedo sheshifachishshannonke. (Qummeeshsha nabbawi.) Yihowa lowo geeshsha baxannonketa qaangummoro mannu giwinkerono beꞌe diyineemmo. Qoleno isi cincinoommo daafira baꞌraasannonketa dihuluullammeemmo. Yihowa heeshshote hasiisannore baalankare aannonke, wodanaaꞌmineemmonna hagiidhineemmo gede kaaꞌlannonke; hattono isiwa shinqeemmo gede assannonke! Aleenni kullihu Biiniyaami tenne wodanchino.

14. Biiniyaami lawishshinni maa rosootto?

¹⁴ Biiniyaami buutote darti iillannosita afinoha ikkirono Yihowa Farciꞌraasincho ikkino. Hanni isi Yihowa baxannosita afasi waajja qeeꞌlanno gede kaaꞌlitinosihu hiittoonniitiro laꞌno. Isi togo yiino: “Hedoommohunni aleenni buutote darti iillinoe. Gashshaasine xiibbannoentenni roore maateꞌya gibbannoeta waajjoommo. Yihowa Farciꞌraasincho ikkummoro anniꞌya dadillanno hattono maateꞌya gibbannoe yee waajjoommo.” Ikkirono Biiniyaami Yihowa baxannonsare woꞌmanka woyite towaatannonsata ammanino. Isi togo yiino: “Yihowa wolootu miinju qarra, mulla kaꞌne gimbanninsata hattono darte dandiite heedhanno gede kaaꞌlinonsa gara hiincoommo. Yihowa cuꞌmiꞌre heeꞌrummoro isi maassiꞌrannoeta afoommo. Duucha hinge usurroonnie hattono ganne gawajjinoonnie; tenne yannara Yihowa isira ammanamme heeꞌnummo geeshsha kaaꞌlannonke gara laoommo.” Yihowa Biiniyaamira Anna ikkinosi; Yihowa manni kayinni maatesi ikkino.

REYO WAAJJA

15. Reyo waajja nooreentilla yineemmohu mayiraati?

¹⁵ Qullaawu Maxaafi reyo diina ikkitinota kulanno. (1 Qor. 15:25, 26) Reyote daafira hendeemmo woyite yaandeemmoha ikkara dandaanno; banxeemmo manni woy ninke buuto dhiwammoommoha ikkiro reyo roore waajjinammora dandiineemmo. Reyo waajjineemmohu mayiraati? Korkaatuno Yihowa hegerera heeꞌrate hasatto oye kalaqinonke. (Ros. 3:11) Reyo quwa saꞌnummokki waajja heeshshonke gatissara dandiitanno. Lawishshaho tini, fayyimmankera kaaꞌlitanno sagale doorre inteemmo gedenna fayyimmanke agadhate ganyine ispoorte loonseemmo gede kakkayisannonke; hattono dhiwammummoro akkaꞌmineemmo gedenna heeshshonke gawajjannore qorophineemmo gede assitankera dandiitanno.

16. Sheexaanu reyo waajjineemmo gede asse gawajjankera woꞌnaalannohu hiittoonniiti?

¹⁶ Sheexaanu lubbote heeꞌra banxeemmota afino. Hakko daafira isi heeshshote heeꞌrate yine baalanka coye wole agurina Yihowa ledo noonke jaalooma nafa agurreemmota coyiꞌrino. (Iyo. 2:4, 5) Sheexaanu lowo geya soꞌrino! Sheexaanu “reyote aana roorre afiꞌrinoha” ikkino daafira reyo waajjine Yihowa agurreemmo gede assate woꞌnaalanno. (Ibi. 2:14, 15) Mito woyite Sheexaanu wido ikkitinori, Yihowa soqqamaano ammanansa agura gibburo shitannonsata kulte waajjishiishshannonsa. Qoleno buuto dhiweennanke hedeweelcho xagisiꞌra hasiissannonkeha ikkara dandaanno; Sheexaanu tenne faro horoonsiꞌre ammananke shoshshoggishara woꞌnaalanno. Akimootu woy maatenke miilla mundee adhineemmo gede xixxiibbankera dandiitanno; mundee adha qole Maganu seera diigate. Woy mitu manni Qullaawa Borro ledo sumuu yitannokkite wole doogganni xagisiꞌneemmo gede xixxiiwankera dandaanno.

17. Roomu Sokka 8:37-39 kultanno garinni reyo waajja hasiissannonkekkihu mayiraati?

¹⁷ Reya hasiꞌneemmokkiti egennantinote; ikkirono reyinummoro nafa Yihowa baxa agurannonkekkita anfoommo. (Roomu Sokka 8:37-39 nabbawi.) Yihowa jaallasi reyituro lubbote noori gede asse qaagannonsa. (Luq. 20:37, 38) Isi insa kayisate quqquxamanno. (Iyo. 14:15) Yihowa ‘hegere heeshsho afiꞌneemmo gede’ lowo waaga baatino. (Yoh. 3:16) Yihowa lowo geeshsha baxannonketanna towaatannonketa anfoommo. Hakko daafira dhiwammeemmo woyite woy shinankera waajjishiinshanninke woyite Yihowa agurantenni, shesho, hayyonna jawaante afiꞌrate iso addaxxa hasiissaanke. Vaaleerinna minaannise hatto assino.—Far. 41:3.

18. Vaaleeri lawishshinni maa rosootto?

¹⁸ Vaaleeri 35 diriti heedheenna buuto waadannohu kaanserete dhibbi amadinose. Hanni ise baxillu waajja qeeꞌlitanno gede kaaꞌlinosehu hiittoonniitiro laꞌno. Ise togo yitino: “Kaanserete dhibbi nooeta kullieta aninna minaanniꞌya baasa mansoommo. Darre akkammannieta kulloonnie. Batinye akime amaaꞌloommaha ikkirono insa kayinni mundee nookkiha diakkammeemmohe yitinoe. Lowo geeshsha waajjoomma; ikkirono Maganu seera diige mundee adha dihasiꞌroomma! Heeshshoꞌya diro baala Yihowa lowo geya baxaaeta leellishinoe. Xa anino iso baxeemmata leellisheemma faro afiꞌroomma. Akimootu dhibbiꞌya daafira bushare kultue kiiro, albinni roore Yihowa hagiirsiisatenna Sheexaane irraawisate murciꞌreemma. Gedensoonni mundee adhummakkinni xaginsoonnie. Xaano dhiwa agurinoekkiha ikkirono Yihowa woꞌmanka woyite hasiisannonkere wonshannonke. Lawishshaho kaanserete dhibbi amadinoeta kullaera albaanni, songote gambooshshiwa ‘Xaa Yannara Iillannonke Qarra Worbimmatenni Dandee Saꞌꞌa’ yaanno birxicho xiinxallinoommo.c Kuni birxichi lowo geya sheshifachishinonke. Konne birxicho hinge hinge nabbamboommo. Togoo birxicho nabbawankenna ayyaanaamittete coye ganyine assanke aninna minaanniꞌya giddoyidi keere afiꞌneemmo gede, wodanaaꞌmineemmo gedenna dancha doorsha doodhineemmo gede kaaꞌlitinonke.”

WAAJJA QEEꞌLA

19. Muli yannara mayi ikkanno?

¹⁹ Alamete doyichora noori Yihowa Farciꞌraasine fonqolo ikkannonsa coye qeelanna Sheexaane giwa dandiitino. (1 Phe. 5:8, 9) Atino dandaatto. Muli yannara Yihowa, Yesuusinna ledosi gashshitannori ‘Daawuloosi looso diigganno’ gede hajajanno. (1 Yoh. 3:8) Hakkuyi gedensaanni uullate aana Maganoho soqqantannori, ‘waajjitannonna massanno gede assannonsari diheeꞌranno.’ (Isa. 54:14; Mik. 4:4) Hakka geeshsha kayinni waajja qeeꞌlate sharrama hasiissannonke.

20. Waajja qeeꞌlate kaaꞌlannonkeri maati?

²⁰ Yihowa soqqamaanosi baxannotanna agarannonsata albinni roore addaxxa hasiissannonke. Yihowa alba soqqamaanosi agarino gara hiincankenna wolootaho hasaawanke tenne assineemmo gede kaaꞌlitannonke. Qoleno isi yaachishanno coyi iillinke yannara kaaꞌlinonke gara qaaga hasiissannonke. Yihowa kaaꞌlonni waajja qeeꞌla dandiineemmo.—Far. 34:4.