Yihowa Uulla Gannate Assannota Buuxisinonke

1. Masaalaanchu Isayyaasi Israeelete hiittenne sokka kulinonsa?

MASAALAANCHU Isayaasi Yihowa ‘halaalaancho Magano’ ikkinota xawisino. “Halaalaancho” yaanno qaale noo gedeenni tirriro “hamiiꞌni” yaate. (Isa. 65:16) “Hamiiꞌni” yaa qole “ikkona” woy “addinta” yaate. “Hamiiꞌni” yaanno qaale Qullaawu Maxaafi giddo horoonsiꞌnoonnihu Yihowanna Yesuusi coyidhannori woy assitannori halaale ikkinota kulateeti. Hakko daafira Isayyaasi Israeelete dagara kulara hasiꞌrino sokka diteeꞌlitinote; Yihowa balaxe kulinori woꞌmanka woyite addaxxinannireeti. Isi einoha mitto mittonka qaale wonshe tenne leellishino.

2. Yihowa albillittete yanna daafira uyino hexxo addaxxa dandiineemmohu mayiraati? Hiikkuri xaꞌmuwa xiinxallineemmo?

² Ninkeno Yihowa albillittete yanna daafira kulino hexxo addaxxa dandiineemmoyya? Isayaasi Yihowa daafira coyiꞌrihunni 800 diro meddi yitanno yanna gedensaanni, soqqamaasinchu Phaawuloosi Yihowa uyino hexxo woꞌmanka woyite addaxxinannita ikkitinohu mayiraatiro xawisino. Phaawuloosi, ‘Maganu kapha dandaannokkita’ kulino. (Ibi. 6:18) Mitte buicho giddonni xalalu wayino maxinaamu wayino fulannokkinte gede halaalu Buicho ikkinohu Yihowano kapha didandaanno. Hakko daafira Yihowa yaannore baala lawishshaho albillittete yanna daafira uyino hexxo woꞌmunni woꞌma addaxxa dandiineemmo. Konni birxichira aante noo xaꞌmuwa xiinxallineemmo: Yihowa albillittete yanna daafira uyinonke hexxo maati? Yihowa eino qaali woꞌmannota buuxisinonkehu hiittoonniiti?

YIHOWA EINO QAALI MAATI?

3. (a) Maganu soqqamaano lowo geeshsha baxxanno hexxo hiittenneeti? (Yohaannisi Ajuuja 21:3, 4) (b) Tenne hexxo daafira kulleemmonsa woyite mitu manni mayyaanno?

³ Konni birxichira xiinxallineemmo hexxo alamete doyichora nooti Maganu soqqamaano lowo geeshsha baxxannote. (Yohaannisi Ajuuja 21:3, 4 nabbawi.) Yihowa, “reyo woy dadillu woy wiꞌla woy shetto kunni kaꞌa [heedhannokki]” yanna daggannota kule qaale eino. Ninke giddo batinyu sabbankeemmo woyite Gannatete giddo heeshsho hiittoota ikkitannoro kulannoha konne lowo geeshsha hagiirsiisanno qummeeshsha mannaho kulleemmo. Tenne hexxo kulleemmonsa woyite mitu manni mayyaanno? “Tini hexxo woꞌmitannota ikkitoommero danchate” yaanno.

4. (a) Yihowa uulla Gannate assate qaale ei woyite balaxe afino coyi maati? (b) Yihowa qaale einotano agurranna wolere ma assino?

⁴ Hige Yihowa, soqqamaasinchu Yohaannisi Gannatete giddo heeshsho hiittoota ikkitannoro borreessanno gede ayyaanisinni kakkayisisi woyite, Maganu Mangiste sokka sabbankeemmo woyite tenne hexxo wolootaho kulleemmota afino. Qoleno Yihowa ‘albillitte ikkannoha’ konne coye ammana batinyu mannira qarra ikkitannonsatano afino. (Isa. 42:9; 60:2; 2 Qor. 4:3, 4) Ikkina Yohaannisi Ajuuja 21:3, 4 kulloonni atooti daannoha ikkinota wolootahono uminkerano buuxisa dandiineemmohu hiittoonniiti? Yihowa tenne hagiirsiissanno hexxo kulinonkeha calla ikkikkinni tenne hexxo addaxxineemmo gede assitannonketa ammansiissanno tajeno kulinonke. Isi kulinonke taje maati?

YIHOWA, ISI EINO QAALI WOꞌMANNOHA IKKINOTA BUUXISINONKE

5. Maganu uulla Gannate assara eino qaale addaxxineemmo gede assitannonke taje hiittenneeti? Tenne taje afiꞌra dandiineemmohu mamiinniiti?

⁵ Qummeeshshu hakkiinni aane kulannori Yihowa Gannatete daafira uyino hexxo woꞌmitannota ikkitinota addaxxineemmo gede assannonke. Qummeeshshu togo yaanno: “Ayirradu barcimira ofollinohu, ‘Kune, ani baalanka coye haaro asseemmo’ yii. Ledeno, ‘Kuni qaali hawaqiꞌnannihonna halaalehona borreessi!’ yiie. Hakkunni gedensaanni, ‘Kune woꞌmino! Umihunna goofimarchunnihu, albihunna gedensihu aneeti.’”—Aju. 21:5, 6a.

6. Yohaannisi Ajuuja 21:5, 6 kulloonniri Maganu uulla Gannate assate eino qaale albinni roore addaxxineemmo gede assannonkehu mayiraati?

⁶ Tini Qullaawu Maxaafi sokka Maganu eino qaale albinni roore addaxxineemmo gede assitannonkehu mayiraati? Ajuuja—Jawa Gumulose Iillitino yaanno maxaafi konni qummeeshshi daafira kulanni togo yaanno: “Kuni albillitte afiꞌneemmo atooti woꞌmikki gatannokkita buuxisate Yihowa umisi furma ganinohu gedeeti.”b Maganu eino qaale Yohaannisi Ajuuja 21:3, 4 kulloonni. Kayinni kiiro 5 nna 6te noo hedo, Yihowa coyiꞌrino qaali halaalaancho ikkasi leellishshanno taje gedeeti. Hanni Yihowa uyino hexxo woꞌmitannota buuxisate horoonsiꞌrino qaalla seekkine laꞌno.

7. Yohaannisi Ajuuja 21:5te coyiꞌra hanafinohu ayeti? Tini hedo baxxitinota ikkitinohu mayiraati?

⁷ Maganu uyino taje kultanni kiiro 5 “Ayirradu barcimira ofollinohu” yite hanaffanno. (Aju. 21:5a) Ajuujate maxaafira Yihowa xaaddote coyiꞌrinohu sasu bayichi giddo mittu konneeti. Hakko daafira konne addaxxinanni qaale coyiꞌrinohu Yihowa umosiiti ikkinnina wolqaataamo sokkaasincho woy reyotenni kainoha Yesuusa nafa diꞌꞌikkino! Tini, isi hakkiinni aane yiinore woꞌmunni woꞌma addaxxineemmo gede assitannonke. Hatto yineemmohu mayiraati? Korkaatuno Yihowa ‘kapha’ dandaannokki daafiraati. (Tit. 1:2) Hakko daafira Yohaannisi Ajuuja 21:5, 6 kulloonni qaali woꞌmunni woꞌma addaxxinanniho.

“KUNE, ANI BAALANKA COYE HAARO ASSEEMMO”

8. Yihowa isi eino qaali woꞌmikkinni gatannokkita luphi asse kulinohu hiittoonniiti? (Isayaasi 46:10)

⁸ Hanni aanchine “Kune” yaanno qaale laꞌno. (Aju. 21:5) “Kune” yine tirroonniha Giriikete Afii qaale Ajuujate maxaafi giddo duucha hinge horoonsiꞌnoonni. Mitte borro kuni qaali “nabbawanno manchi aane nabbawannore afate quqquxamanno gede assannoho” yitino. “Kune” yaanno qaalinni aane Maganu mayino? Isi, “Ani baalanka coye haaro asseemmo” yiino. Addaho, Yihowa albillitte biddi assanno coyi daafira kulanni no; isi uyino hexxo woꞌmitannota afino daafira hundihu Giriikete qaalinni tenne yaatto xawinsoonnihu woꞌmitanni noohu gede assineeti.—Isayaasi 46:10 nabbawi.

9. (a) “Baalanka coye haaro asseemmo” yitanno yaatto Yihowa assannoha hiikkonne lame coye leellishshanno? (b) Xa noo ‘gordinna baatto’ ma ikkitanno?

⁹ Hanni Yohaannisi Ajuuja 21:5 noota aante noo hedo laꞌno; qummeeshshu, “Baalanka coye haaro asseemmo” yaanno. Tini fooliishsho Yihowa assannoha lame coye yaano riqiwannohanna haaroonsannoha kultanno. Umihunni, Yihowa riqiwanno coyi maati? Yohaannisi Ajuuja 21:1 “Umi gordinna umi baatto saꞌino” yitanno. “Umi gordi” Sheexaanunna agaanintesi massaggannoha poletiku gashshoote riqiwanno. (Mat. 4:8, 9; 1 Yoh. 5:19) Qullaawu Maxaafi giddo ‘baatto’ yaanno qaale baattote aana heeꞌranno manna kulateno horoonsiꞌnoonni. (1 Dud. 16:31) Hakko daafira “umi baatto” yaanno qaali xaa yannara nooha busha manna riqiwanno. Yihowa xa noo ‘gordonna baatto’ biddi asse calla diaguranno; isi insa woꞌmunni woꞌma hunanno. Isi ‘albi gordonna albi baatto’ haaru gordinninna haaro baattonni yaano haaru gashshootinninna haaru dagoominni riqiwanno.

10. Yihowa haaro assanno coyi maati?

¹⁰ Yohaannisi Ajuuja 21:5 aantete Yihowa haaro assanno coyi daafira kultanno. Yihowa “Ani haaro coye kalaqeemmo” yiinokkita wodanchi. Hatteentenni isi “Ani baalanka coye haaro asseemmo” yiino. Hakko daafira Yihowa uullanna mannu ooso guuta ikkitanno gede asse haaroonsanno. Isayyaasi balaxe masaalinonte gede woꞌma uulla biifado Gannate gedeeta ikkitanno. Qoleno Yihowa ninke mitto mittonka woꞌmunni woꞌma hurse haaro assannonke. Hatte yannara naafootu, ballootunna danqootu hurtanno; wole agurina reyitinori nafa reyotenni kaꞌanno.—Isa. 25:8; 35:1-7.

“KUNI QAALI HAWAQIꞌNANNIHONNA HALAALEHO . . . KUNE WOꞌMINO!”

11. Yihowa Yohaannisi ma assanno gede hajajinosi? Hiittenne taje kulinosiyya?

¹¹ Maganu isi eino qaali woꞌmannota buuxisate wolere mayino? Yihowa Yohaannisira, “Kuni qaali hawaqiꞌnannihonna halaalehona borreessi!” yiino. (Aju. 21:5) Yihowa Yohaannisira konne qaale ‘borreessanno’ gede calla kule diagurino. Borreessanno gede assannosi korkaatano kulinosi. Isi, “Kuni qaali hawaqiꞌnannihonna halaaleho” yiinosi; hatto yaa Maganu coyiꞌrinori addaxxinannihonna halaaleho yaate. Yohaannisi “borreessi!” yine hajanjoonnisitera hajajamasi hagiirsiissannote. Korkaatuno Maganu abbeemmo yee qaale eino Gannate daafira nabbawanna albillitte afiꞌneemmohu dhagge ikkanno atooti daafira hiinca dandiineemmo.

12. Yihowa “Kune, woꞌmino!” yiinohu mayiraati?

¹² Maganu hakkiinni aane mayino? “Kune woꞌmino!” yiino. (Aju. 21:6) Yihowa aleenni Gannatete daafira kulli hexxo baala woꞌmitinohu gede asse coyiꞌrino. Isi assara hedinore hoola dandaannohu nookki daafira woꞌminohu gede asse coyiꞌra dandaanno. Yihowa isi eino qaale woꞌmunni woꞌma wonshannota addaxxineemmo gede assannonkeha wole coyeno kulinonke. Kuni coyi maati?

“ALBIHUNNA GEDENSIHU ANEETI”

13. Yihowa, “Albihunna Gedensihu aneeti” yiinohu mayiraati?

¹³ Aleenni qummi assininte gede, Yihowa Yohaannisi laino ajuujara sase hige coyiꞌrino. (Aju. 1:8; 21:5, 6; 22:13) Tenne sasente yannara Yihowa “Albihunna Gedensihu aneeti” yiino. Yihowa “Albihunna Gedensihu aneeti” yaasi, isi mitto coye hanafihu gedensaanni hakku coyi danchu garinni gumulamanno gede assannota leellishshanno.

14. (a) Yihowa ‘Albiha’ ikkinohu mamooteetironna ‘Gedensiha’ ikkannohu mamooteetiro leellishanno lawishsha kuli. (b) Kalaqama 2:1-3 noo hedo maa buuxissannonke?

¹⁴ Yihowa Addaaminna Heewani kalaqihu gedensaanni mannu oosoranna uullate hedinore kulinonsa. Qullaawu Maxaafi Maganu togo yee maassiꞌrinonsata kulanno: “Ille ilamme, sirchiꞌne baatto woꞌmo; baattono kiꞌne gashshitinannita ikkito.” (Kal. 1:28) Hatte yannara Yihowa ‘Albiha’ ikkinota coyiꞌrinohu gedeeti. Isi assara hedinore xawise kulino: Guutanna hajajantannore ikkitinori Addaaminna Heewani ooso uulla woꞌmitannotinna uulla Gannate assitanno yanna daggannota leellishannore coyiꞌrino. Albillitte Yihowa hedinori woꞌmanno woyite isi ‘Gedensiha’ ikkinota coyiꞌrinohu gedeeti. Yihowa “gordonna baatto” hattono “giddose noore baala” kalaqihu gedensaanni isi hedinori woꞌmannota leellishannore coyiꞌrino. Isi coyiꞌrinori Kalaqama 2:1-3 no. (Qummeeshsha nabbawi.) Yihowa lamalki barra maassiꞌre baxxinoha assiꞌrino. Hatto yaa mayyaate? Yihowa mannu oosoranna uullate hedinore wonshikki gatannokkita buuxisino. Isi hedinori konni lamalki barri jeefora woꞌmunni woꞌma gumulamanno.

15. Maganu mannu oosora assara hedinore, Sheexaanu hoolinoha lawara dandaannohu mayiraati?

¹⁵ Addaaminna Heewani finqilihu gedensaanni cubbaataamma ikkino; hattono cubbonna reyo sirchinsara sayisino. (Rom. 5:12) Hakko daafira Sheexaanu, Maganu guuta ikkitinorinna hajajantannori mannu ooso uulla woꞌmitanno gede assannota hoolinoha lawara dandaanno. Sheexaanu Yihowa hedinori woꞌmannokki gede assa dandaanno? Sheexaanu, xaate Maganu asse afannori gariri dino yee hedinoha ikkara dandaanno. Maganu mannu oosora hedinore wonshate Addaaminna Heewani shee guuta ikkitinore wole minaannanna minaama kalaqa dandaanno. Kayinni Yihowa hatto assoommero, Daawuloosi iso kaphaanchoho yee kassasara dandaanno. Mayira? Korkaatuno Yihowa Kalaqama 1:28 Addaamiranna Heewanira sirchinsa uulla woꞌmannota kulinonsa.

16. Sheexaanu, ‘eino qaale wonsha didandaannoho’ yee Yihowa kassasara hedinohu mayira ikkara dandaanno?

¹⁶ Sheexaanu, Maganu wolere maa assanno yee hedinoha ikkara dandaanno? Sheexaanu, “Maganu Addaaminna Heewani ooso iltanno gede fajjansara dandaanno; kayinni insa horonta guuta ikka didandiitanno” yee hedinoha ikkara dandaanno. (Ros. 7:20; Rom. 3:23) Hatto ikkiro Daawuloosi ‘coyiꞌrinore assa didandaannoho’ yee Yihowa kassasannoti egennantinote. Mayira? Korkaatuno tinino Yihowa hedinori woꞌmanno gede diassitannote; isi hedinori Gannate ikkitino uullara guutunna hajajamannohu Addaaminna Heewani sirchi woꞌmanno gede assate.

17. Sheexaanu hattono Addaaminna Heewani finqiltinoha ikkirono Yihowa hedinore wonshate maa assino? Tini mayi guma abbituyya? (Misileno lai.)

¹⁷ Sheexaanu hattono Addaaminna Heewani finqilinoha ikkirono Yihowara hedinore wonshannoti baalantenni woyyitino doogo noosi; Sheexaanu Yihowa assara hedinore horo afa didandaanno. (Far. 92:5) Yihowa, Addaaminna Heewani ooso iltanno gede fajje isi coyiꞌrinori kapho ikkikkinni halaale ikkinota leellishino. Qoleno Yihowa mitto coye assate qaale eiro eino qaale wonshannotanna hoolasira dandaannohu nookkita leellishino. Isi hajajantannore Addaaminna Heewani ooso gatisanno ‘sircho’ qixxeesse hedinore wonshannota leellishannore assino. (Kal. 3:15; 22:18) Kuni sirchi mannu ooso gatisate heeshshosi wodo asse aanno; tini Sheexaanu horo dihedinote! Mayira? Korkaatuno wodote kakkalo Yihowa umosi calla baxannokkiha ikkinota leellishshannote. (Mat. 20:28; Yoh. 3:16) Sheexaanu qole umosi calla baxannoha ikkino daafira togoo akati dinosi. Ikkina wodote qixxaawo mayi ikkanno gede assitino? Kumu Diri Gashshooti jeefora guutunna hajajamannohu Addaaminna Heewani sirchi Maganu umo hedino garinni Gannate ikkitino uullara heeꞌranno. Yihowa hatte yannara ‘Gedensiha’ ikkinohu gedeeti.

YIHOWA UULLA GANNATE ASSATE EINO QAALE ALBINNI ROORE ADDAXXA DANDIINEEMMOHU HIITTOONNIITI?

18. Maganu eino qaale wonshannota buuxisinoti sase taje hiittenneeti? (“Yihowa Eino Qaale Addaxxineemmo Gede Assitannota Sase Taje” yitanno saaxineno lai.)

¹⁸ Konni birxichira ronsummonte gede, Maganu uulla Gannate assate eino qaali woꞌmannota huluullamanno mannira maa buuxisa dandiineemmo? Umihunni, qaale einohu Yihowa umosiiti. Yohaannisi Ajuuja maxaafi, “Ayirradu barcimira ofollinohu ‘Kune, ani baalanka coye haaro asseemmo’ yii” yaanno. Isira eino qaale wonshate hayyo, wolqanna hasatto noosi. Layinkihunni, Yihowa eino qaali woꞌmannoha ikkino daafira isi albaanni woꞌminohu gedeeti. Isi, “Kuni qaali hawaqiꞌnannihonna halaaleho . . . Kune woꞌmino!” yiino. Sayikkihunni, Yihowa mitto coye hanafiro hakko coye gumulannokki gede assasira dandaannori dino; isi “Albihunna Gedensihu aneeti” yiinohu iseraati. Tini Sheexaanu kaphaancho ikkinotanna Yihowa assara hedinore hoola dandaannokkita leellishshanno.

19. Mannu, Maganu uulla Gannate assate eino qaale wonshannota huluullamanno woyite maa assa dandaatto?

¹⁹ Maganu uyino hexxo woꞌmitannota soqqanshonniwa mannaho kulitto kiiro ate umikki ammana kaajjitannota qaagi. Ikkina, Yohaannisi Ajuuja 21:4 noota albillitte uulla Gannate ikkitannota kultannota hagiirsiissanno hexxo mannaho kulteenna, mannu “woꞌmitannota ikkitoommero dancha hexxooti” yiihero maa assa dandaatto? Kiiro 5 nna 6 nabbabbe xawisse kulattonsara dandaatto. Lawishshu yaattonni Yihowa umisi furma gane tini hexxo woꞌmitannota buuxisino gara leellishinsa.—Isa. 65:16.