Umonke Calla Banxeemmore Ikkineemmokki Gede Qorophino
ALAMETE aana noohu batinyu manni baxxitino qoosso woy ayirrinyi hasiisannonsahu gede asse hedannota wodanchootto? Kuni manni noonsa coyi ikki geeshshihano ikkiro lede afiꞌra hasiissannonsahu gede asse hedanno. Konni garinni hedanno manni umonsa calla baxannoho hattono afiꞌrino coyira digalatannoho; Qullaawu Maxaafi goofimarchu barruwara heeꞌranno manni togooha ikkannota kulanno.—2 Xim. 3:2.
Mannu umonsa calla baxa haaro coye diꞌꞌikkitino. Addaaminna Heewani danchanna busha uminsanni doodhate murciꞌrino; tini qolte buutote qarra abbitino. Lowo xibbi diri gedensaanni Yihudu Moote Ooziya qullaawu mini giddo hixaana wiliishsha hasiissannosihu gede asse hedino; kayinni isi lowo geya soꞌrino. (2 Dud. 26:18, 19) Hattono Farisootunna Saduqootu Abirihaami sircho ikkitino daafira calla Maganu wolu manniwiinni roorse laꞌꞌannonke yite heddino.—Mat. 3:9.
Heeꞌnoommohu umonsa calla baxannohunna wolootuwiinni roorannohu gede asse hedanno manni batiꞌrino alameraati; kuni akati ninkeno hunankera dandaanno. (Gal. 5:26) Mite qoosso woy baxxino ayirrinye afiꞌra hasiissannonkehu gede assine heda hananfammora dandiineemmo. Togoo hedo qoropha dandiineemmohu hiittoonniiti? Balanxe Yihowa togoo hedo ma garinni laꞌꞌannoro huwata hasiissannonke. Tennera lamu Qullaawu Maxaafihu xintu seeri kaaꞌlannonke.
Afiꞌra hasiissannonke coyi maatiro murannohu Yihowaati. Hanni mito lawishsha laꞌno.
Maatete giddo minaama minaannase ayirrisa hasiissannose; minaanni qole minaamasi baxa hasiissannosi. (Efe. 5:33) Adhantinori meyatenna labbaahu mereero heeꞌranno baxille leellisha hasiissannonsahu galtensara callaati. (1 Qor. 7:3) Ooso annuwinsaranna amuuwinsara hajajama hasiissannonsa; annuwunna amuuwu qolte oosonsa baxanna hasiisannonsare wonsha hasiissannonsa.—2 Qor. 12:14; Efe. 6:2.
Songote giddo diinaggaabbe loossanno cimeeyye ayirrisa hasiissannonke. (1 Tes. 5:12) Ikkirono insara ammanate roduuwinsara annatate qoosso dinonsa.—1 Phe. 5:2, 3.
Maganu, gashshootu aana noorira gashshitino manniwiinni qaraxonna hasiisannonsa ayirrinye afiꞌrate qoosso uyinonsa.—Rom. 13:1, 6, 7.
Yihowa baxillunni hasiisannonkerinni aleenni aannonke. Cubbaataamma ikkinoommo daafira hasiissannonketi reyo callate. (Rom. 6:23) Ikkirono Yihowa bagamannokki baxillisinni lowo atoote aannonke. (Far. 103:10, 11) Yihowawiinni afiꞌneemmohu mittu mittunku atooti woy qoosso isi uyinonke eltooti.—Rom. 12:6-8; Efe. 2:8.
UMONKE CALLA BAXANNA WOLOOTUWIINNI ROORROOMMOHU GEDE ASSINE HEDA QOROPHINEEMMO GARA
Alamete noo manni hedanno garinni hendeemmokki gede qoropha. Qoropha hoongummoro wolootu afidhannohunni roorsine afiꞌra hasiissannonkehu gede assine heda hananfammora dandiineemmo. Yesuusi mitte diinaare baantoonninsa loosaasine lawishsha horoonsiꞌre konni garinni heda hananfammora dandiineemmota coyiꞌrino. Mite loosaasine soodo guto hanaffe barra woꞌma arrishshote loossanni hossino; wolootu kayinni mitte saate calla loossino. Looso umo hanaffuri loossino loosira lowo waaga baantanninke yite heddino. (Mat. 20:1-16) Yesuusi konne lawishsha horoonsiꞌre haꞌrunsaanosi Maganu aannonsa coyinni kassi yaa hasiissannonsata rosiisino.
Barra woꞌma loosanni hosino manni lowo waaga baantanninke yee hedino
Galattinannire ikke; wolootuwiinni lowore agadhitinoonte. (1 Tes. 5:18) Soqqamaasinchu Phaawuloosi lawishsha haꞌrunse; isi Qorontoosi songora noori ammanate roduuwisi maalaamittetenni hasiisannosire assite kaaꞌlitannosi gede xaꞌmiꞌrate qoosso noosiha ikkirono hatto diassino. (1 Qor. 9:11-14) Afiꞌnoommoha mitto mittonka atoote naada hasiissannonke hattono wolootuwiinni lowore agadha qoropha hasiissannonke.
Soqqamaasinchu Phaawuloosi maalaamittete hasiisannosire assine kaaꞌlinasira dixaꞌmiꞌrino
Umoꞌne heeshshi assitinannire ikke. Mittu manchi umisi daafira calla hedannoha ikkiro, noosirinni roorinore afiꞌra hasiissannosihu gede asse hedara dandaanno. Togoote gawajjitanno hedora nyaau xagichi umo heeshshi assate.
Masaalaanchu Daanieeli umo heeshshi assannoha ikkino daafira Yihowa lowo geeshsha baxannosi
Umo heeshshi assate masaalaanchu Daanieeli kaajja lawishsha ikkannonke. Isira lophino maate, danisi, egennosinna dandoosi baxxino ayirrinyi woy qoosso hasiissannoe yee hedanno gede assitasira dandiitannote. (Dan. 1:3, 4, 19, 20) Ikkirono Daanieeli umosi heeshshi asse heeꞌrino; hattono kuni akati Maganu lowo geeshsha baxannosi gede assino.—Dan. 2:30; 10:11, 12.
Tenne alamera noohu rooru manni leellishannoha umonke calla baxatenna wolootuwiinni roorroommohu gede assine hedate akata gimbo. Hatteentenni Yihowa eltosinni uyinonkehu mittu mittunku atootinni woꞌmanka woyite hagiidhino.