Keeshshittokkinni Cuuami

1. Cuuammeemmo gede kakkayisannonkehu mitu korkaati hiikkonneeti?

DANCHA ELTO baala wole agurina, heeshsho uyinohe Magano Yihowa baxatto? Iso baxattota leellisha hasiꞌratto? Tenne assa dandaattoti baalanta roortanno doogo heeshshokki isira sayisse aatenna mannu albaanni wayinni cuuante leellishate. Kuri coyibba Yihowa maate wido ikkatto gede assitannohe. Hakko daafira iimi Annikkinna Jaalikki isiha ikkootto daafira massagannohe hattono towaatannohe. (Far. 73:24; Isa. 43:1, 2) Qoleno heeshshokki Yihowara sayisse aanna cuuama hegere heeshsho hexxo heedhannohe gede assitannohe.—1 Phe. 3:21.

2. Konni birxichira maa ronseemmo?

² Cuuamate hobbi ruxxi yaatto gede assanni noohe coyi no? Hatto ikkiro togoori tuncu yiinohehu ate calla diꞌꞌikkootto. Lowo miliyoone ikkanno manni cuuamate ikkadda ikkate amanyootensanna hedonsa biddi assiꞌra hasiissinonsa. Xa kuni manni Yihowara hagiirrunni diinaggaawe soqqamanni no. Umi xibbi diro cuuaminohu mitu manni lawishshinni maa rosatto? Hanni insara guficho ikkinonsa coyenna insa lawishshinni maa ronseemmoro laꞌno.

SAMAARIYU MANNI CUUAMINO

3. Mitu Samaariyu mannira cuuamannokki gede guficho ikkinonsari maa ikkara dandaanno?

³ Samaariyu manni Yesuusi yannara heeꞌrinoho ammaꞌno noonsa gaamooti; kuni manni heeꞌrinohu Yihudaho aliyyeenni noohu hundi Sekeemiranna Samaariyu qooxeessiraati. Samaariyu manni cuuamara albaanni Maganu Qaalita woꞌma egenno afiꞌra hasiissannonsa. Insa qullaawu ayyaaninni borreessantinoti umiti onte Qullaawu Maxaafi maxaaffa, yaano Kalaqamunni Marrote geeshsha nootella yite ammantanno; Iyyaasu maxaafano hatto yite ammantannoha ikkara dandaanno. Ikkirono insa Maganu Marro 18:18, 19 uyino hexxo garinni Buuraminohu daannota ammantanno. (Yoh. 4:25) Samaariyu manni cuuamate ikkadda ikkate Yesuusi daanno yine qaale eꞌnoonniha Buuraminoha ikkinota ammane adha hasiissannonsa. “Lowohu Samaariyu manni” tenne ammanino. (Yoh. 4:39) Mitu Samaariyu mannira qole hundinni adhe dayinoha Ayihudete manna mulla kae giwate rosicho qeeꞌla hasiissinonsaha ikkara dandaanno.—Luq. 9:52-54.

4. Soqqamaasinete Looso 8:5, 6, 14 kultanno garinni mitu Samaariyu manni Filiphoosi rosiisinsata maa assino?

⁴ Samaariyu manni cuuamanno gede kaaꞌlinonsari maati? Wongeelaawichu Filiphoosi ‘Kiristoosi daafira rosiisinsata mitu Samaariyu manni Maganu qaale adhino.’ (Soqqamaasinete Looso 8:5, 6, 14 nabbawi.) Filiphoosi Ayihudicha ikkirono insa iso macciishsha digibbino. Insa Maganu mallaadannokkita kultanno qummeeshshuwa qaagginoha ikkara dandaanno. (Mar. 10:17-19) Insa Filiphoosi Kiristoosi daafira coyiꞌrinore ‘hixamanyite macciishshitino’; hattono Maganu Filiphoosi kaaꞌlanni noosita leellishannota xabbe leeltanno taje huwattino. Filiphoosi batinye maalale loosino; lawishshaho isi dhiwantinore hursino hattono agaaninte fushshino.—Soq. 8:7.

5. Samaariyu manni xaggenni maa rosootto?

⁵ Yihudu manna mulla kae giwa woy egennote anje Samaariyu manni ayyaanaamittetenni lophannokki gede assitara dandiitannoha ikkirono, insa tini guficho ikkitansara diwodhitino. Samaariyu manni Filiphoosi rosiisinonsari halaale ikkinota ammanihu gedensaanni keeshshikkinni cuuamino. Qullaawu Maxaafi tenne daafira kulanni togo yaanno: “Maganu Gashshootiha dancha duduwonna Yesuusi Kiristoosi suꞌma duduwanni noohu Filiphoosi kulinonsare ammane meya labbaahu cuuami.” (Soq. 8:12) Maganu Qaali halaale ikkinotanna Yihowa Farciꞌraasine manna mulla kaꞌe gibbannokkita hattono mimmitoho addu Kiristaana bande anfanni gede assannoha addu baxille leellishate sharrantannota ammanatto? (Yoh. 13:35) Ammanattoha ikkiro, Yihowa maassiꞌrannoheta addaxxite hobbi ruxxi yiittokkinni qaafo adhi.

6. Ruubeni woꞌnaalshi kaaꞌlannohehu hiittoonniiti?

⁶ Jarmanete heeꞌrannohu Ruubeni lophinohu halaalu mineeti. Ikkirono isi wedellichu heeꞌre Yihowa nooha ikkinota huluullama hanafi. Isi huluullo qeeꞌlinohu hiittoonniiti? Ruubeni tenne daafira gari egenno noosikkita wodanchiti lede rosate murciꞌrino. Isi togo yiino: “Hojju xiinxallo assiꞌre huluullo qeeꞌla hasiissinoe. Suutu soorro daafira kulanno birxicho duucha hige xiinxalla hasiissinoe.” Isi, Ate Daafira Hedanno Kalaqaanchi No? yaanno maxaafa nabbawino. Kuni maxaafi Ruubeni lowo geeshsha kaaꞌlinosi. Ruubeni isiniitira ‘Hayi hoola! Yihowa addinta noo Maganooti’ yiino. Qoleno Ruubeni qara biiro daaꞌꞌatiti alamete doyichoha mittimma nooha roduuwu maamaranke albinni roore naadino. Isi Jarmane higiti 17 dirisinni cuuamino. Rosoottori daafira huluullo kalaqantuhero huluullo qeeꞌlate borruwanke seekkite xiinxalli. “Gara ikkitino egenno” heedhunkero huluullo qeela dandiineemmo. (Efe. 4:13, 14) Qoleno alamete doyichora noohu Yihowa manni mereero noo baxillenna mittimma leellishanno woꞌnaalsha macciishshatto woyitenna songokkirano tenne leellishshanno taje laꞌꞌatto woyite, alamete doyichora nooha roduuwu maamaranke albinni roore naadatto.

XERSEESI MANCHI SAAOOLI CUUAMINO

7. Saaooli hiittoo hedo biddi assiꞌra hasiissinosi?

⁷ Hanni Xerseesi manchi Saaooli lawishsha laꞌno. Isi Ayihudete ammaꞌno seera dancha gede rosinoho; hattono egennamino Ayihudicha ikkino. (Gal. 1:13, 14; Fil. 3:5) Hatte yannara batinyu Ayihudete manni Kiristaana kaadaasinete gede asse laꞌꞌanno; konnira Saaooli Kiristaana buuto qarrisanno. Isi Maganu fajjo assanni noommo yee hedino. (Soq. 8:3; 9:1, 2; 26:9-11) Saaooli Yesuusa ammanatenna cuuame Kiristaancho ikkate, isi umisi dartu iillannosita ammane adha hasiissannosi.

8. (a) Saaooli cuuamanno gede kaaꞌlinosiri maati? (b) Soqqamaasinete Looso 22:12-16 kultanno garinni, Hanaaniya Saaooli kaaꞌlinohu hiittoonniiti? (Misileno lai.)

⁸ Saaooli cuuamanno gede kaaꞌlinosiri maati? Ayirrinye adhinohu Moote Yesuusi leellisita Saaooli ille ballino. (Soq. 9:3-9) Isi sase barra woꞌma mittoreno diꞌꞌitino; hattono tuncu yiinosi coye hiincinoti dihuluullissannote. Addanko, Saaooli Yesuusi Buuraminoha ikkinotanna rosaanosi addu ammaꞌno haꞌrunsitannore ikkitinota ammanino. Saaooli Isxifaanoosi shini woyite kaaꞌlamino daafira, lowo geya gaabbinoti dihuluullissannote! (Soq. 22:20) Sayikki barra Hanaaniya yinanni rosaanchi Saaooliwa daye, illesi faninosi hattono keeshshikkinni cuuamanno gede jawaachishinosi. (Soqqamaasinete Looso 22:12-16 nabbawi.) Saaoolino umosi heeshshi asse Hanaaniya coyiꞌrinore macciishshino hattono cuuamino.—Soq. 9:17, 18.

9. Saaooli xaggenni maa rosa dandaatto?

⁹ Saaooli xaggenni ronseemmo rosi no. Isi naaxxanna manna waajja cuuamannokki gede assitasira diwodhino. Saaooli Kiristoosi daafira kulanno halaale ammane adhiti, umosi heeshshi asse heeshshosi biddi assiꞌrino. (Soq. 26:14, 19) Isi dartu iillannosita afinoha ikkirono, Kiristaancho ikkate maahoyye yiino. (Soq. 9:15, 16; 20:22, 23) Saaooli cuuamihu gedensaanni, iillannosiha addi addi qarra dandee saꞌꞌanno gede Yihowa kaaꞌlannosita addaxxa diagurino. (2 Qor. 4:7-10) Cuuante Yihowa Farciꞌraasincho ikkootto daafira ammanakki fonqolannori woy qarru iillahera dandaanno; kayinni Yihowa kaaꞌlannohe. Maganunna Kiristoosi woꞌmanka woyite kaaꞌlitannoheta addaxxa dandaatto.—Fil. 4:13.

10. Ana lawishshi kaaꞌlannohehu hiittoonniiti?

¹⁰ Ana lophitinohu Soojjaati Awuroppiraati. Amase cuuantuhu gedensaanni Ana annise fajjeennase 9 diriti heedhe Qullaawa Maxaafa xiinxalla hanaffino. Ikkollana fiixise ise Qullaawa Maxaafa xiinxallitanni noota afiti lowo geya giwinose. Fiixise, mittu manchi annuwasi ammaꞌno agura shollinyeho yee hedanno. Ana 12 diriti heedhe cuuantanno gede fajjasera annase xaꞌmidhu. Annise ise hatto yitinohu umisenni kaꞌeetironna wolu manni xixxiiweennaseetiro afa hasiꞌrino. Ise “Yihowa baxeemma” yite kultusi. Hakkiinni annise cuuantara fajjise. Hakkunni gedensaanni Ana qacifantoonnise hattono beebba assiꞌnoonnise. Fiixise giddonni mittu togo yiinose: “Yihowa Farciꞌraasincho ikkattantenni amanyoote baꞌino heeshsho heeꞌrittaronna sijaara agittaro woyyanno.” Ana tenne dandiite saꞌinohu hiittoonniiti? Ise “Yihowa jawaante uyinoe hattono anniꞌyanna amaꞌya lowo geeshsha kaaꞌlinoe” yitino. Ana heeshshose giddo Yihowa kaaꞌlinose yanna borreessite amaxxitanno. Ise Yihowa kaaꞌlinose gara habbannokki gede yannate kiiro borreessite amaxxitinore laꞌanno. Mannu giwannoheta waajjattoha ikkiro Yihowa ateno kaaꞌlannoheta qaagi.—Ibi. 13:6.

QORNELEWOOSI CUUAMINO

11. Qornelewoosi cuuamate hobbi ruxxi yaanno gede assasira dandaannori maati?

¹¹ Qullaawu Maxaafi Qornelewoosi lawishshano kulannonke. Isi Roomunnite ‘xibbe olanto hajajaanchooti.’ (Soq. 10:1) Hakko daafira isi dagoomu giddo ayirradoho hattono lowo silxaane noosiho. Isi “buxanete danchare assannoho.” (Soq. 10:2) Yihowa isira dancha duduwo kulanno gede soqqamaasincho Pheexiroosi soyino. Qornelewoosira noosi silxaane isi cuuamikki keeshshanno gede assitinosi?

12. Qornelewoosi cuuamanno gede kaaꞌlinosiri maati?

¹² Qornelewoosi cuuamanno gede kaaꞌlinosiri maati? Qullaawu Maxaafi “Isi minisi manni baalu ledo . . . Magano waajjanno” mancho ikkinota kulanno. Qoleno woꞌmanka woyite Magano eeggifate huucciꞌranno. (Soq. 10:2) Pheexiroosi Qornelewoosira dancha duduwo kulita, isinna maatesi Kiristoosa ammante adhite bayichonkonni cuuantino. (Soq. 10:47, 48) Qornelewoosi maatesi ledo Yihowa magansiꞌrate biddi assiꞌra hasiissannosiha aye coyeno biddi assiꞌrate maahoyye yiinoti dihuluullissannote.—Iya. 24:15; Soq. 10:24, 33.

13. Qornelewoosi xaggenni maa rosootto?

¹³ Saaoolinte gede Qornelewoosirano noosi silxaane Kiristaancho ikkannokki gede guficho ikkitasira dandiitanno. Kayinni isi, silxaane Kiristaancho ikkannokki gede assitasira diwodhino. Halaale macciishshootto daafira heeshshokki giddo lowore biddi assiꞌra hasiissinohe? Hatto ikkiro Yihowa kaaꞌlannohe. Isi Qullaawu Maxaafihu xintu seeri ledo sumuu yaanno garinni isira soqqamate assattore maassiꞌrannohe.

14. Suyooshi lawishshi kaaꞌlannohehu hiittoonniiti?

¹⁴ Jaappaanete heeꞌrannohu Suyooshi cuuamate ikkado ikkate loosanno looso soorrira hasiissinosi. Isi awawa qixxeessinanni gara rosiinsannihu egennaminohu Ikonobo yinanni rosi minihu qaru sooreessira kaaꞌlaanchoho. Kuni sooreessi awawa qixxeesse madaarsha haaꞌre haꞌre Budistete ammaꞌno amanyoote wonshanno; isi haꞌra dandaannokkiha ikkiro kayinni Suyooshi isi bayicho haꞌre hatto assanno. Suyooshi reyote daafira halaale rosita kayinni kuni assooti cuuamannokki gede guficho ikkinosi. Isi konne assoote agurate murciꞌrino. (2 Qor. 6:15, 16) Suyooshi sooreessaho tenne daafira kulino. Tini mayi guma abbituyya? Suyooshi konne Budistete ammaꞌno rosichira karsama agurino; ikkirono isi loososi dihoogino. Qullaawa Maxaafa xiinxalla hanafihunni mittu diri gedensaanni isi cuuamino.a Magano hagiirsiisate loosokki soorrira hasiissannoheha ikkiro, Yihowa ateranna maatekkira hasiisannore wonshannota huluullantooti.—Far. 127:2; Mat. 6:33.

QORONTOOSI HEEꞌRANNO MANNI CUUAMINO

15. Qorontoosi heeꞌranno mannira cuuamannokki gede guficho ikkinonsari maati?

¹⁵ Hunda Qorontoosi katamira heeꞌranno manni maalaamittete jiro shorrannoho, hattono amanyoote baꞌino heeshsho heeꞌrannoho. Hakko heeꞌrannohu batinyu manni Magano hagiirsiissannokki heeshsho heeꞌranno. Togoo katamira heeꞌranno mannira dancha duduwo macciishshe adha qarra ikkitannonsati dihuluullissannote. Ikkirono soqqamaasinchu Phaawuloosi hakko katama mare Kiristoosi daafira dancha duduwo kulinsata, “batinyu Qorontoosi manni ammane cuuami.” (Soq. 18:7-11) Hakkiinni Mootichu Yesuusi Kiristoosi Phaawuloosira ajuujatenni leelle, “Konni katami giddo lowo manni nooe” yiinosi. Hakko daafira Phaawuloosi hakko katamira mitto dironna darate sabbakanni keeshshino.

16. Qorontoosi heeꞌrannohu mitu manni cuuamate guficho ikkinonsare qeelanno gede kaaꞌlinonsari maati? (2 Qorontoosi 10:4, 5)

¹⁶ Qorontoosi heeꞌranno manni cuuamanno gede kaaꞌlinonsari maati? (2 Qorontoosi 10:4, 5 nabbawi.) Maganu Qaalinna qullaawu ayyaani insa heeshshonsa giddo lowore biddi assidhanno gede kaaꞌlinonsa. (Ibi. 4:12) Kiristoosi daafira kulloonninsaha dancha duduwo macciishshe adhinohu Qorontoosi heeꞌranno manni busha rosicho lawishshaho, dimba, mooranna foora agurino.—1 Qor. 6:9-11.b

17. Qorontoosi heeꞌrino manni xaggenni maa rosootto?

¹⁷ Qorontoosi heeꞌrannohu mitu manni rumuxxinoha busha rosichonsa qeeꞌla hasiissannonsaha ikkirono, kuni manni Kiristaana ikka lowo geeshsha qarrissannote yee hedinokkita qaagi. Insa hegere heeshshowa massitannote ruukkashsho doogora haꞌrate diinaggaabbe sharrantino. (Mat. 7:13, 14) Cuuamate ikkado ikkate busha rosicho woy amanyoote qeeꞌlate sharrantanni nootto? Hexxo mudhite sharrama agurtooti! Yihowa gara ikkinokkire assatto gede xixxiiwannohere qeelate qullaawa ayyaanasi aannohe gede eeggifatte huucciꞌri.

18. Moniika lawishshi kaaꞌlannohehu hiittoonniiti?

¹⁸ Joorjiyaho heedhannoti Moniika, cuuamate ikkado ikkate amanyoote bainore coyiꞌranna busha boohaarsha boohaara agurate sharrantino. Ise togo yitino: “Anje noomma yannara wolqa ikkitannoeti huuccattote. Yihowa gara ikkinore assa hasiꞌreemmata afino hattono woꞌmanka woyite kaaꞌlinoe qoleno massaginoe.” Moniika 16 dirisenni cuuantino. Yihowara isi hasiꞌranno garinni soqqamate agura hasiissannohe rosichi no? Biddi assiꞌra hasiissannohere biddi assiꞌratto gede wolqa aahera iso ganyite huucciꞌri. Yihowa qullaawa ayyaanasi shaqqillunni aannohe.—Yoh. 3:34.

AMMANAꞌNE ILAALA BAYICHUNNI KAYISSARA DANDIITANNO

19. Guficho ikkannoheha ilaalu geeshshi qarra qeelatto gede kaaꞌlannoheri maati? (Misileno lai.)

¹⁹ Cuuamattokki gede guficho ikkannohe coyi ikkihano ikkiro Yihowa baxannohetanna maatesi wido ikkattora hasiꞌrannota huluullantooti. Yesuusi umi xibbi diro rosaanosira togo yiino: “Halaale yeemmoꞌnena, lenteetu gumi geeshshi ammana heedhuꞌnero, konne ilaala ‘Kawiinni kaꞌe kaꞌa haꞌri’ yitiniro haꞌranno; dandiitinannikkiri mitturino diheeꞌranno.” (Mat. 17:20) Yesuusi coyiꞌrinore macciishshino manni isi ledo heeꞌra hanafinku boode diro calla ikkino daafira xaara ammanansa hakkeya dikaajjitino. Ikkollana Yesuusi, insa ammanansa kaajjishidhuro Yihowa guficho ikkannonsaha ilaalu geeshshi qarra qeeltanno gede kaaꞌlannonsata buuxisinonsa. Yihowa ateno kaaꞌlannohe!

20. Konni birxichira kulloonnihu umi xibbi diro heeꞌrinohunna yannankera noo Kiristaani lawishshi ma assatto gede kakkayisinohe?

²⁰ Cuuamattokki gede guficho ikkannohe coyi noota wodanchittoro konne coye qeelate keeshshittokkinni qaafo adhi. Umi xibbi diro heeꞌrinohunna yannankera noo Kiristaani lawishshinni sheshonna jawaante afiꞌri. Insa lawishshi jawaachishaheranna heeshshokki Yihowara sayise uyite cuuamatto gede kakkayisahera dandaanno. Doodhatto doorsha baala rooranno doorshi konneeti!