XIINXALLOTE BIRXICHO 34
FAARSO 3 Wolqanke, Hexxonkenna Irkonke
Yihowa Gatona Yaannoheta Ammani
“Cubboꞌya baala aguroottoe.”—FA. 32:5.
GUULCHO HEDO
Yihowa gatona yaannonketa ammana hasiissannonkehu mayiraatironna Qullaawu Maxaafi Yihowa maaro eꞌannore gatona yaannonsata buuxisannohu hiittoonniitiro ronseemmo.
1-2. Cubbo loosse maaro eꞌannori maa addaxxa dandiitanno? (Misileno lai.)
MOOTE Daawiti bashsho loonsoommo cubbinni kainohunni ninkeneeto bushiinsheemmo woyite hiitto ikkineemmoro afino. (Fa. 40:12; 51:3) Isi mite jawa soꞌro loosino. Ikkirono, addinta maaro eino daafira Yihowa gatona yiinosi. (2 Sa. 12:13) Hakko daafira Daawiti Yihowa maarinosita huwatiti fooliishsho afiꞌrino.—Fa. 32:1.
2 Daawiti gede ninkeno Yihowa maarinkero fooliishsho afiꞌra dandiineemmo. Yihowa loonsoommo cubbi jawa ikkiro nafa addinta maaro eꞌnummoro, cubbonke kullummoronna galagalle soꞌro loosa hoogate dandiinummore baala assinummoro, gatona yaankera qixxaawinoha ikkinota afa lowo geeshsha sheshifachishshannote! (Law. 28:13; Soq. 26:20; 1 Yo. 1:9) Qoleno isi woꞌmunni woꞌma gatona yiiro, cubbo horo loonsoonnikkihu gede asse kiirannota afa lowo geya jawaachishshannote!—Hiz. 33:16.
Moote Daawiti Yihowa maaro leellishshannota batinye faarso borreessino (Gufo 1-2 lai)
3-4. Mitte rodoo cuuantuhu gedensaanni mayi macciishshaminose? Konni birxichira maa ronseemmo?
3 Ikkirono mito woyite, mitu mannira Yihowa gatona yiinonsata ammana qarra ikkitansara dandiitanno. Hanni halaalu mine lophitinote Jeniferi yinanni rodoo woꞌnaalsha laꞌno. Ise wedellitte heedhe amanyoote bainore assitanno hattono lamu gari heeshsho heedhanno. Lowo diri gedensaanni ise Yihowawa higgino hattono gedensoonni cuuantino. Togo yitino: “Bashsho woxe calla baxeemmate, fooreemmate, ago quwa sae ageemmate hattono hanqe boolaqiꞌreemmate. Yihowa gatona yaannoe gede eeggifate huucciꞌrummaronna maaro eummaro Kiristoosi kakkalo keereensitannoeta afoomma. Kayinni Yihowa gatona yiinoeta ammana qarra ikkitinoe.”
4 Alba loosootto soꞌrora Yihowa gatona yiinoheta ammana qarra ikkite egentinohe? Yihowa Daawiti gede gatona yiinonketa addaxxinammora hasiꞌranno. Konni birxichira, Yihowa gatona yaannonketa ammana hasiissannonkehu mayiraatironna tennera kaaꞌlannonkeri maatiro ronseemmo.
YIHOWA GATONA YAANNONKETA AMMANA HASIISSANNONKEHU MAYIRAATI?
5. Sheexaanu mayine ammannammora hasiꞌranno? Lawishsha kuli.
5 Yihowa gatona yaannonketa ammanne Sheexaanu woshshaado giddo umbeemmokki gede qoropha dandiineemmo. Sheexaanu Yihowara soqqama agurreemmo gede assate dandiire baala assannota qaagi. Isi hedinore wonshate, loonsoommo cubbi gatona yinanniha diꞌꞌikkino yine ammanneemmo gede assate woꞌnaalanno. Hanni foorino daafira songotenni fushshinoonnihu Qorontoosi heeꞌrino manchi woꞌnaalsha laꞌno. (1 Qo. 5:1, 5, 13) Sheexaanu, kuni manchi maaro eihu gedensaanni songote giddo noori iso gatona yaanna anga fante haaꞌra gibbara hasiꞌrino. Qoleno Sheexaanu, kuni manchi cubboꞌya gatona diyinoonnie yee hedara hasiꞌrino; kuni manchi hatto yee hediro ‘quwa sae dadille hexxo mudhe’ Yihowara soqqama aguranno. Sheexaanu xaano mixosinna hayyosi disoorrino. Ninke kayinni “isi xagarro anfoommo.”—2 Qo. 2:5-11.
6. Bashsho loonsoommo soꞌronni kainohunni ninkeneeto bushiinshanni heeꞌnoommoha ikkiro maa assa hasiissannonke?
6 Bashsho loonsoommo soꞌronni kainohunni ninkeneeto bushiinshanni heeꞌnoommoha ikkiro, Yihowa gatona yaannonketa ammana hasiissannonke. Cubbo loonsummoro ninkeneeto bushiisha nooreentilla. (Fa. 51:17) Tini bunshe diafidhino. Tiiꞌꞌinke assootenke biddi assiꞌrate qaafo adhineemmo gede kakkayisankera dandaanno. (2 Qo. 7:10, 11) Ikkirono, loonsoommo cubbira maaro eꞌnummohu gedensaannino ninkeneeto bushiinsheemmoha ikkiro, hexxo mudhinammora dandiineemmo. Yihowa maaro ammanneemmoha ikkiro, ninkeneeto bushiisha agurreemmo. Hakkiinni, Yihowara isi hasiꞌranno garinni yaano keeraanchu tiiꞌꞌinninna lowo hagiirrinni soqqama dandiineemmo. (Qol. 1:10, 11; 2 Xi. 1:3) Ikkina Maganu gatona yaannonketa addaxxa dandiineemmohu hiittoonniiti?
YIHOWA GATONA YAANNONKETA AMMANNEEMMO GEDE KAAꞌLANNONKERI MAATI?
7-8. Yihowa Musera isiniiti daafira mayino? Tini maa addaxxineemmo gede assitannonke? (Fulo 34:6, 7)
7 Yihowa isiniiti daafira yiinore hiinci. Hanni lawishshaho, Yihowa Siini Ilaalira Musera mayinoro laꞌno.a (Fulo 34:6, 7 nabbawi.) Yihowa baxissannoti batinye akatta noosiha ikkirono, Musera isi ‘maarannohanna mararannoha’ ikkinota kula doodhino. Togoo Magani, loosino cubbira addinta maaro eino soqqamaanchosi gatona yaa giwannoni? Digiwanno! Gatona yaa giwannoha ikkiro, Yihowa maarannokkihonna kaajjadoho yaate; isira qole togoo akatta dinosi.
8 Yihowa halaalaancho Magano ikkino daafira maareemmo yiiro maarannota addaxxa dandiineemmo. (Fa. 31:5) Hakko daafira isi coyiꞌrannore ammana dandiineemmo. Alba loosootto cubbira ateneeto bushiisha agura qarra ikkitinoheha ikkiro, ateneeto togo yite xaꞌmi: ‘Yihowa addinta mararannohanna maarannoha hattono cubbo loose maaro eannoha aye manchono gatona yaa giwannokkita ammaneemmo? Ikkina aneno maarinoeta ammana dihasiissannoe?’
9. Cubbonke agurroonni yaa mayyaate? (Faarso 32:5)
9 Yihowa qullaawu ayyaanisinni massageennansa Qullaawa Maxaafa borreessituri maarosi daafira mayitinoro hiinci. Hanni lawishshaho Qullaawu Maxaafi borreessaanchi Daawiti Yihowa maaro daafira coyiꞌrinore laꞌno. (Faarso 32:5 nabbawi.) Daawiti, “Atino cubboꞌya baala aguroottoe” yiino. “Agura” yine tirroonnihu Ibiraawootu afii qaali, “kayisa,” “haaꞌre hoola,” woy “duqqa” yitanno tirono afiꞌrinoho. Yihowa Daawiti gatona yii woyite, cubbosi aanisinni haaꞌre hoolinohu gedeeti. Hakkiinni Daawiti duqqino duhinni fooliishsho afiꞌrino yaano isonooto bushiisha agurino. (Fa. 32:2-4) Ninkeno fooliishsho afiꞌra dandiineemmo. Cubbinkera addinta maaro eꞌnummo gedensaanni, Yihowa ninkewiinni haaꞌre hoolino cubbo duqqine heeꞌra dihasiissannonke.
10-11. ‘Cubbo agurattoho’ yitanno yaatto Yihowa daafira maa rosiissannonke? (Faarso 86:5)
10 Faarso 86:5 nabbawi. Konni qummeeshshira Daawiti Yihowa ‘cubbo agurannoha’ ikkinota coyiꞌrino. Tenne yaatto xawissanni mitte borro Yihowa daafira togo yitino: “Isi gatona yaannoho; tini ayimmasiiti.” Hatto yineemmohu mayiraati? Qummeeshshunniti aante noo hedo, “Woshshidhannoherira baalaho bagamannokkiha baxillekki leellishattonsa” yitanno. Sai birxichira ronsummonte gede, Yihowa baxxannosirira bagamannokki baxille leellishannotanna horo tuge agurannonsakkita kule qaale eino. Bagamannokki baxilli Yihowa maaro eꞌannori baalu ‘cubbo aguranno’ gede kakkayisannosi. (Isa. 55:7) Maganu gatona yaannoheta ammana qarra ikkituhero, ateneeto togo yite xaꞌma dandaatto: ‘Yihowa cubbo loosse maarannonsa gede isiwa raartannore baala gatona yaate qixxaawinoha ikkinota ammaneemmo? Ikkina isi maarannoe gede raareemmo woyite gatona yaannoeta ammana dihasiissannoe?’
11 Yihowara guuntete xeꞌne noonkere ikkinoommoti woꞌmunni woꞌma leeltannosita afanke sheshifachishannonke. (Fa. 139:1, 2) Daawiti wole faarsora borreessinori tenne seekke xawisanno; tini qolte Yihowa gatona yaannonketa ammanneemmo gede kaaꞌlitannonke.
YIHOWA HAWANNOKKIRE KIꞌNE HABBINOONTE
12-13. Faarso 103:14 kultanno garinni Yihowa ninke daafira hawannokkiri maati? Tini isi ma assanno gede kakkayissannosi?
12 Faarso 103:14 nabbawi. Daawiti, Yihowa ‘bushsha ikkanke hawannokkita’ coyiꞌrino. Daawiti tenne hedo coyiꞌri woyite, Yihowa cubbo loosse maaro eꞌanno soqqamaanosi gatona yaate qixxaawinoha ikkinohu mayiraatiro leellishannoha mitto korkaata kulino; Yihowa cubbaataamma ikkanke woꞌmanka woyite qaaganno. Hanni tenne roore huwatate Daawiti coyiꞌrinore seekkine xiinxallino.
13 Daawiti Yihowa “mayinni kalaqinonkero isi afino” yiino. Yihowa Addaami, “baattote aaninni bushsha haaꞌre” seekkino; qoleno guuta ikkitinori mannu ooso sagale ita, goxanna foola hasiissannonsata seekke afino. (Kal. 2:7) Ikkollana Addaaminna Heewani cubbo loossino daafira, bushshunni kalaqammoommo yitanno yaatto, guuntete xeꞌne noonkehura laanfe noonkere ikkinoommotano leellishshanno. Ninkeno insa sircho ikkinoommo daafira gara ikkinokkire assineemmo gede xixxiiwannonke cubbo ragiꞌnoommo. Yihowa cubbaataamma ikkanke afinoha calla ikkikkinni Daawiti, Yihowa cubbaataamma ikkinoommota ‘hawannokkitano’ coyiꞌrino. Hakko daafira Yihowa woꞌmanka woyite mararannonke. Daawiti coyiꞌrino hedo afidhino tiro konni garinni xaphi assa dandiineemmo: Yihowa mito woyite soꞌro loonseemmota afino; togoo woyite addinta maaro eꞌnummoro isi maarannonke hattono gatona yaannonke.—Fa. 78:38, 39.
14. (a) Daawiti Yihowa maaro mageeshshitero xawisinohu hiittoonniiti? (Faarso 103:12) (b) Daawiti coyiꞌrino lawishshi Yihowa woꞌmunni woꞌma gatona yaannota leellishannohu hiittoonniiti? (“Yihowa Maarannonkenna Cubbonke Hawanno Gara” yitanno saaxineno lai.)
14 Yihowa maaro mageeshshite? (Faarso 103:12 nabbawi.) Daawiti, Yihowa gatona yaanno woyite “Soojjaati galchimiwiinni fafinohu geeshsha, . . . ninkewiinni cubbonke fafisanno” yiino. Soojjaati galchimiwiinni heda dandiineemmohura aleenni fafanno; lamunku ragi horo dixaadanno. Tini Yihowa gatona yaanno cubbi daafira maa kultannonke? Mitte borro tenne lawishshunni kultanni togo yitanno: “Cubbu ninkewiinni konni garinni xeertiꞌrannoha ikkiro, foolesi nafa horo anfeemmokkita woꞌmunni woꞌma addaxxa dandiineemmo.” Mittu coyi fooli hakkonne coye qaangeemmo gede assanno. Yihowa cubbonke gatona yiihu gedensaanni ninkewiinni xeertisanno daafira, mittu coyino hakkonne cubbo qaaganno gedenna hakko cubbira qorichishannonke gede diassannosi.—Hiz. 18:21, 22; Soq. 3:19.
15. Bashsho loonsoommo soꞌronni kainohunni ninkeneeto bushiisha agura qarra ikkitunkero maa assa dandiineemmo?
15 Faarso 103 Daawiti coyiꞌrinori Yihowa gatona yaannonketa ammanneemmo gede kaaꞌlannonkehu hiittoonniiti? Alba loonsoommo soꞌronni kainohunni ninkeneeto bushiisha agura qarra ikkitinonkeha ikkiro, ninkeneeto togo yine xaꞌma dandiineemmo: ‘Yihowa hawannokkire yaano isi cubbaataamma ikkinoommota qaagannotanna ane gede cubbo loose maaro eannoha gatona yaannota hawoommokka? Qoleno, Yihowa ane gatona yaatenna qorichisha hoogate doodhino cubbo qaaganni noommokka?’ Yihowa bashsho loonsoommo cubbo diꞌꞌillachishanno. Ninkeno illachisha dihasiissannonke. (Fa. 130:3) Yihowa gatona yaannonketa ammanneemmoha ikkiro, bashsho loonsoommo cubbira ninkeneeto gatona yaanna alba hinge qaafa dandiineemmo.
16. Alba loonsoommo cubbira ninkeneeto bushiisha agura hooga gawajjitanno gara leellishanno lawishsha kuli. (Misileno lai.)
16 Hanni mitto lawishsha laꞌno. Alba loonsoommo soꞌro calla hendanni ninkeneeto bushiisha, makeena oonfanni badheenni noore leellishshannota makeenu hincilaallo laꞌnanni keeshshate gedeeti. Saꞌne saꞌne hincilaallo laꞌꞌa qarra diafidhino; hatto assa badhenkeenni nooha gawajjankera dandaanno coye anfeemmo gede kaaꞌlitannonke. Kayinni mitturino gawajjinkekkinni alba hinge haꞌrate albankeenni noo doogo illachisha hasiissannonke. Hatteente gede saꞌne saꞌne alba loonsoommo soꞌro qaaga kaaꞌlitankera dandiitanno; tini loonsoommo soꞌronni ronse hatte soꞌro galagale loosa hoogate albinni roore murciꞌneemmo gede kaaꞌlitannonke. Ikkollana alba loonsoommo soꞌro calla illachinsheemmoha ikkiro, xa Maganoho soqqamate dandiinummore baala assa qarra ikkitankera dandiitanno. Hatteentenni albankeenni noo doogo calla illachisha hasiissannonke. Maganu abbara qaale einote haaro alame massitannote heeshshote doogora haꞌnanni heeꞌneemmo; haaro alamera sainoha busha coye “horonta diqaanganni.”—Isa. 65:17; Law. 4:25.
Makeena oofanno manchi badhesiinni noore leellishshanno hincilaallonni roore albasiinni noo doogo illachisha hasiissannosinte gede, ninkeno alba loonsoommo soꞌronni roore albillitte afiꞌneemmo atoote illachisha hasiissannonke (Gufo 16 lai)
YIHOWA BAXANNOꞌNETANNA GATONA YAANNOꞌNETA AMMANA AGURTINOONTE
17. Yihowa baxannonketanna gatona yaannonketa woꞌmanka woyite ammana hasiissannonkehu mayiraati?
17 Yihowa baxannonketanna gatona yaannonketa woꞌmanka woyite ammana hasiissannonke. (1 Yo. 3:19) Mayira? Korkaatuno Sheexaanu Yihowa dibaxannonke woy gatona diyaannonke yine hendeemmo gede assate sharrama diaguranno. Isi mixo ninke Yihowara soqqama agurreemmo gede assate. Sheexaanu gattinosi yanna shiima ikkitinota afino daafira, albinni roore sharramannota anfoommo. (Aju. 12:12) Isi qeelankera wodha dihasiissannonke!
18. Yihowa baxannohetanna gatona yaannoheta ammanate maa assa dandaatto?
18 Yihowa baxannoheta albinni roore ammanate sai birxichira kulli roso loosu aana hosiisi. Yihowa gatona yaannoheta ammanate isi umisi daafira mayinoro hiinci. Qullaawu ayyaani massageennansa Qullaawa Maxaafa borreessituri maarosi daafira mayitinoro hiinci. Isi guuntete xeꞌnekki afinotanna gatona yaannoheta deꞌooti. Qoleno isi gatona yaannohu woꞌmunni woꞌma ikkinota qaagi. Hatto ikkiro, atino Daawiti gede Yihowa gatona yaannoheta ammante, ‘Yihowa cubboꞌya baala aguroottoena galaxxeemmohe’ yaa dandaatto!—Fa. 32:5.
FAARSO 1 Yihowa Akatta
a Onkoleessa 1, 2009 Agarooshshu Shaera (Amaaru Afoo) nooha “Maganunniwa Shiqqi Yii—Yihowa Akattasi Xawisanno Woyite” yaanno birxicho lai.