7 AMANYOOTU SEERINNI HEEꞌRA

HATTO YAA MAYYAATE?

Amanyootu seeri, heeꞌneemmo heeshshonni harunsineemmo biddishshaati. Lawishshaho, woꞌmunku coyira ammanamoottoha ikkate sharramatto? Hatto ikkiro, oosokkino konni amanyootu seeri garinni heedhanno gede qajeelsa hasiꞌrattoti egennantinote.

Hakkiinni saeno, danchu amanyootu seerinni heeꞌranno manchi chaachaaraho, dimallaadannoho, hattono wolootu daafira hedannoho. Oosoꞌne togoo akatta noonsare ikkitanno gede roore kaaꞌla dandiitinannihu, anje heedheenna rosiissinanninsaha ikkirooti.

QULLAAWU MAXAAFI BIDDISHSHA: “Oosote heedhanno gara rosiinsiro, lophite nafa hattenne dihabbanno.”—Lawishsha 22:6.

HASIISSANNOHU MAYIRAATI?

Tenne tekinooloje baasa lophitino yannara, amanyootu seeri lowo geeshsha hasiisanno. Kaareni yinanniti mitte ama togo yitino: “Baalante mobayilenni busha coye aye yannarano laꞌꞌa dandiinanni.” Ise ledde togo yitino: “Oosonke mulenke ofolte heedhe nafa silkensanni bushare laꞌara dandiitanno!”

QULLAAWU MAXAAFI BIDDISHSHA: “Kaajjado sagale hasiissannohu danchanna busha bade afate rosi noonsarira lowiddaannu manniraati.”—Ibiraawoota 5:14.

Wolootu daafira hedano lowo geeshsha hasiissannote. Manna “ballo” woy “galateemmohe” yaa nafa hattono manna ayirrinseemmota leellishannore wolere assa dancha amanyooteeti. Tini alame mulensa noo manninni roore elektirooniksete uduunnensa roorsiꞌranno manni batiꞌrinota ikkitino daafira, togoo amanyooti bashile diyaanno.

QULLAAWU MAXAAFI BIDDISHSHA: “Mannu kiꞌnera assaꞌnera hasidhinannire baala kiꞌneno insara assensa.”—Luqaasi 6:31.

MAA ASSA DANDIITINANNI?

Harunsitinanni biddishsha oosoꞌnera xawissine kullensa. Lawishshaho, xiinxallaano yitannonte gede, wedellootu adhammikkinni siimu xaadooshshe assa soꞌro ikkitinota balanxe seekkine kullinsaro togoohu bushu amanyootiwiinni roore xeertidhanno.

KAAꞌLITANNO AMAALE: Oosoꞌne ledo amanyootu seeri daafira hasaawa kayisate, muli yannara ikkinore horoonsidhe. Lawishshu gedera, jaddo loosino mannire kultanno odoo macciishshitiniro, togo yaa dandiitinanni: “Mannu hanqiro manna assannoti farrittote! Mannu togoo jaddo mayira loosannoha lawannohe?”

“Ooso gara ikkinorenna ikkinokkire badde afa hoogguro, bushanna dancha bada roore qarra ikkitannonsa.”—Birandeni.

Wolootu daafira heddannore ikkitanno gede rosiissensa. Shiimmaaddu qaaqquulli nafa manna “ballo” woy “galateemmohe” yitanno gedenna manna ayirrissanno gede rosiisa dandiinanni. Paarentingi Wizawut Bordersi yinanni maxaafi togo yaanno: “Ooso uminsa daafira calla ikkikkinni, maatensara, rosu mine xaaddanno manniranna dagoomaho heda hasiissannonsata huwatturo, shaqqillunni woloota kaaꞌlannore assate roore kaꞌanno.”

KAAꞌLITANNO AMAALE: Ooso manna kaaꞌlannore assa hasiissannota huwattanno gede kaaꞌlate, qaete woy mine mitore loossanno gede asse.

“Oosonke mine woy qaete loonsannire xa loosa rossuro, mine baxxite fultanno woyite dimassanno. Mayira yiniro, wonanni insa loosa hasiissannonsare affe kaꞌino.”—Taara.