Duuchu Manni Mitto Coye Doodhannohu Maa Harunseeti?

Rooru manni, mitu assooti woꞌmunni woꞌma gara ikkinota mitu assooti kayinni woꞌmunni woꞌma gara ikkinokkita ammananno. Lawishshaho lubbo shaa, giddeesse seyatanna qaaqquulle bushiisha duuchawa gimbanni coyeeti; taashsho, shaqqille leellishanna marara kayinni banxanni coyeeti. Ikkollana batinyu manni siimu xaadooshshe assate, halaale coyiꞌrate, woy ooso lossiꞌrate daafira, tini garaho tini kayi digaraho yinanniri dino yee ammananno. Insa baxxu doorsha doodhiturono qarru nookkihu gede assite heddanno. Duucha woyite mannu mitto coye assannohu, insara lawinonsare woy wolu manni yaannore kaima assiꞌreeti. Kayi tini woꞌmanka woyite dancha guma abbitanno?

NINKERA LAWINONKERE DOODHA

Duucha woyite mitto coye doodhineemmohu ninkera lawinonke garinni, yaano tiiꞌꞌinke kulinonke garinniiti. (Roomu Sokka 2:14, 15) Qaaqquullu nafa garanna gara ikkinokkire badde afa dandiitanno; mito woyite isinni gara ikkinokkire assituro tiiꞌꞌinsa bushiishannonsa. Gale hose kayinni tiiꞌꞌinke loosannohu maatenkewiinni, jaallankewiinni, rosiisaanonkewiinni, olliinke manniwiinni, ammaꞌnonkenninna budinkenni ronsoommo coyi garinniiti. Mitto coye assineemmo woyite tiiꞌꞌinke doodhinoommo doorshi ronsoommo coyi ledo sumuu yaannohoronna teꞌee kulannonke.

Garanna gara ikkinokki coyi daafira noonke lao woloota mararreemmo gede, galanteemmo gede, gara ikkinore assineemmo gedenna shaqqille leellinsheemmo gede assitannonke. Qoleno tini banxeemmo manna gawajjara dandaannore assineemmokki gede hattono saalleemmo woy ninkeneeto bushiinsheemmonna gaabbineemmo gede assanno coye qorophineemmo gede assitannonke.

Ninkera lawinonkere assa woꞌmanka woyite dancha guma abbitanno? Gaariki wedellichu noo waro, “Baxummota ikka dandeemmo” yee hakko garinni heeꞌra hanafino. Ikkirono isira lawinosire assasi dancha guma abbitinokkita huwatino. Isi heeꞌrino heeshsho daafira kulanni togo yiino: “Amanyoote bainore assanni, jingilli assitanno xagga adhanni, dimbanninna lowo jaddo loosanni heeꞌroommo daafira heeshshoꞌya umo lekkicho baꞌinote.”

MITTO COYE WOLE MANNA LAꞌNE ASSA

Ninkera lawinonkereno agurranna, duucha woyite mitto coye doodhineemmohu wole manna laꞌneeti. Tini insa woꞌnaalshinninna hayyonni horo afiꞌneemmo gede assitankera dandiitanno. Maatenke, olliinke manninna jaallanke insa garaho yite heddannore assineemmoha ikkiro ayirrissannonke.

Mitto coye wole manna laꞌne assa woꞌmanka woyite kaaꞌlitanno? Pirisilla yinanni mancho wedellitte noo waro, batinye jaallase assitannonte gede mine assidhukkinni hasidhuhu baalu ledo foora hanaffino. Ikkirono wolootu garaho yite heddanno coye assase hagiirraame ikkitanno gede assitinosekkita huwattino. Ise togo yitino: “Batinyu manni assannore assaꞌya hagiirraame ikkeemma gede diassitinoe. Tini gowwimmatenni aneneeto gawajjanno coye asseemma gede assitinoe.”

WOLE WOYYITINO DOOGO NOOYYA?

Mitto coye garaho woy digaraho yaate, ninkera lawinonkeri woy wolootu yitannori kaaꞌlankera dandaanno. Kayinni tini woꞌmanka woyite dancha guma abbitanno yaa diꞌꞌikkino. Coye halashshine heda hoongammora, lawishshaho doodhineemmo coyi ninkera woy wolootaho abbanno gawajjo afa hoongammora dandiineemmo. (Lawishsha 14:12) Qoleno ninke woy wolootu garaho yinoommo coyi yinummo gedeeha ikka hoogara woy isinni soorramara dandaanno. Bashsho digaraho yinanni coye xa batinyu manni gara ikkinohu gede asse laꞌꞌanno; hattono bashsho garaho yinanni coye xa gara ikkinokkihu gede asse laꞌꞌanno.

Garanna gara ikkinokkire bade afate kaaꞌlannonkehu roore woyyino biddishshi nooyya? Lowo diri gedensaanni nafa irraawisannokkihu xaa yannara harunsa dandiineemmohu amanyootu seeri no?

Baalankawa heeꞌranno mannira kaaꞌlannohu soorramannokkihunna addaxxinannihu amanyootu biddishshi no; tini hagiirsiissannote! Aananno birxichira, garanna gara ikkinokkire bade afate kaaꞌlannoha addaxxinanni biddishsha afiꞌra dandiineemmohu hiikkiinniitiro laꞌneemmo.