12 Mixo Fushshiꞌra

HATTO YAA MAYYAATE?

Mixo fushshiꞌrate yaa mitto coye halcha calla diꞌꞌikkitino. Mixo fushshiꞌniro balanxe maꞌla, taashshiꞌra hasiissannori tuncu yiiro taashshiꞌranna fushshiꞌnoonni mixo wonshiꞌrate diinaggaawe loosa hasiissanno.

Mixo, harancho yannata (mito geeshshi barra woy lamala), mereerima yannatanna (mito geeshshi agana), seeda yannata (mitto diro woy hakkuyi ale) ikkitara dandiitanno. Seeda yanna mixo wonshiꞌrate, mereeroho wole addi addi mixo wonshiꞌra hasiissannonkeha ikkara dandaanno.

HASIISSANNOHU MAYIRAATI?

Fushshiꞌrootto mixo wonshiꞌrittoro roore worba ikkatto, wolootu ledo noohe jaaloomi lexxanno hattono roore hagiirraamo ikkatto.

Worba ikka: Harancho yanna mixo fushshidhe hattenne wonshiꞌrakki, seeda yanna mixono wonshiꞌra dandaattota ammanatto gede assitannohe. Qoleno darawokki barru barrunku gara ikkinokkire assatto gede xixxiibbannohe woyite, roore worba ikkatto gedenna tennera qeelamattokki gede kaaꞌlitannohe.

Jaalooma kaajjishiꞌra: Duuchu manni quwa saꞌinokki mixo noonsa manni ledo yaano maa hasiꞌrannoro bade afe hasattonsa wonshiꞌrate diinaggaawe loosanno manni ledo jaalooꞌma baxanno. Qoleno mittu gari mixo wonshiꞌrate mitteenni diinaggaawe loosa jaalooma kaajjishshanno.

Hagiirraamo ikka: Mixo fushshidhe hattenne mixo wonshiꞌratto woyite, mitto dancha coye assakkinni tashshi yaannohe.

“Mixo fushshiꞌra baxeemmo. Mixo fushshiꞌraꞌya woꞌmanka woyite looseemmori woꞌmannoe gedenna mitto coye wonshiꞌrate sharrameemmo gede kaaꞌlitannoe. Qoleno mixokki woꞌmitanno woyite, lowo geeshsha hagiidhite ‘Hashshuꞌya ane! Hedoommori woꞌminoe!’ yaatto.”—Kiristooferi.

QULLAAWU MAXAAFI BIDDISHSHA: “Bubbete raga galaalchannohu diwixiꞌranno; gomicho laꞌꞌannohu dimixxanno.”—Rosiisaancho 11:4.

MAA ASSA DANDIITINANNI?

Mixo fushshiꞌratenna hattenne mixo wonshiꞌrate aane noo coye assi.

Hasiꞌroottore badde afi. Fushshiꞌra dandaattota addi addi mixo borreessite wodhi; hakkiinni hiittee balaxisiisattoro heddanni aante aantensanni borreessiꞌri.

Soma fushshiꞌri. Mitte mittente mixora aane noore assi:

• Seekkite hedde mixokki wonshiꞌratto yanna muri.

• Maa maa assa hasiissannohero hedi.

• Ataawe ikkahera dandaannori maatironna qeelte saꞌꞌa dandaattohu hiittoonniitiro balaxxe hedi.

Loosoho kai. Mixokki wonshiꞌra hanafate, baalunkuri woꞌmahe geeshsha agartooti. Ateneeto, ‘Mixoꞌya wonshiꞌrate balaxe assa hasiissannoe coyi maati?’ yite xaꞌmi. Hakkiinni hakkonne coye assi. Assoottohu mittu mittunku coyi abbino guma keenate woꞌnaali.

QULLAAWU MAXAAFI BIDDISHSHA: “Jawaatu manchi hedo jirotenni xaadissanno; muddamaanchu kayinni buximate uwanno.”—Lawishsha 21:5.