Ayyaanaamittete Mixo Fushshiꞌranna Wonshiꞌra Dandiineemmo Gara

1. Hiikkuri ayyaanaamittete mixo fushshiꞌra dandiineemmo?

ADDU Kiristaana ikkinoommo daafira Yihowa lowo geeshsha banxeemmo. Yihowara soqqamate dandiinummore baala assa hasiꞌneemmo. Tenne assate ayyaanaamittete mixo fushshiꞌra hasiissannonke; lawishshaho, Magano hagiirsiissanno akatta lossiꞌra, kaaꞌlitanno dandoo rosanna woloota kaaꞌlineemmo doogga hasiꞌra hasiissannonke.b

2. Ayyaanaamittete mixo fushshiꞌranna wonshiꞌrate diinaggaawa hasiissannonkehu mayiraati?

² Ayyaanaamittetenni lopha hasiꞌneemmohu mayiraati? Tenne assa hasiꞌneemmohu qaru coyi, baxillaancho iimi Annanke hagiirsiisa hasiꞌneemmo daafiraati. Yihowa dandoonke woꞌmunni woꞌma isira soqqamate horoonsiꞌnanna laꞌꞌanno woyite lowo geeshsha hagiidhanno. Qoleno ayyaanaamittetenni lopha hasiꞌneemmohu ammanate roduuwanke albinni roore kaaꞌla hasiꞌneemmo daafiraati. (1 Tes. 4:9, 10) Halaalu mine keeshshinoommo diri ikki geeshshihano ikkiro, baalunku ayyaanaamittetenni lopha dandiineemmo. Hanni tenne assa dandiineemmohu hiittoonniitiro laꞌno.

3. Umi Ximootewoosi 4:12-16 kultanno garinni soqqamaasinchu Phaawuloosi Ximootewoosi ma assanno gede jawaachishinosi?

³ Soqqamaasinchu Phaawuloosi Ximootewoosira umi sokka borreessi woyite, Ximootewoosi wedellicha ikkirono woꞌnaalshu noosi cimeessaati. Ikkirono Phaawuloosi Ximootewoosi ayyaanaamittetenni lopha agurannokki gede jawaachishinosi. (1 Ximootewoosi 4:12-16 nabbawi.) Phaawuloosi Ximootewoosira soyino sokka seekkine hendummoro, isi Ximootewoosi lame doogonni lophara hasiꞌrinota huwanteemmo. Umihunni, baxillenna ammana lossiꞌranno gede hattono minshe nookkiha ikke heeꞌranno gede amaalinosi. Layinkihunni, wolootaho nabbawate, amaalatenna rosiisate dandoosi woyyeessiꞌranno gede amaalinosi. Hanni Ximootewoosi lawishsha wodanaho wodhine, wonshiꞌra dandiineemmo mixo fushshiꞌra ayyaanaamittetenni lophineemmo gede kaaꞌlitannonke gara laꞌno. Qoleno soqqanshonke halashshiꞌra dandiineemmota mite doogga ronseemmo.

MAGANO HAGIIRSIISSANNO AKATTA LOSSIDHE

4. Filiphisiyusi Sokka 2:19-22 kultanno garinni Ximootewoosi worba Yihowa soqqamaancho ikkanno gede kaaꞌlinosiri maati?

⁴ Ximootewoosi worba Yihowa soqqamaancho ikkanno gede kaaꞌlinosiri maati? Isira kaajja Maganu baxanno akatta noosi. (Filiphisiyusi Sokka 2:19-22 nabbawi.) Phaawuloosi coyiꞌrinorinni Ximootewoosi umosi heeshshi assannoha, ammanaminoha, chaachaara hattono ammaꞌninanniha ikkinota huwata dandiineemmo. Isi baxillaanchoho hattono ammanate roduuwisira godowinta hedannoho. Hakko daafira Phaawuloosi Ximootewoosi lowo geeshsha baxannosi; hattono isira shota ikkinokkiha loosu qeecha eeggo uyinosi. (1 Qor. 4:17) Hatteente gede ninkeno Maganu baxanno akatta lossiꞌneemmoha ikkiro, Yihowa baxannonke hattono songo albinni roore kaaꞌlineemmo.—Far. 25:9; 138:6.

5. (a) Maganu baxanno akata lossiꞌrate mixo fushshiꞌra dandaattohu hiittoonniiti? (b) Misile leellishshannonte gede, mitte wedellitte rodoo woloota albinni roore mararate fushshidhino mixo wonshiꞌrate sharrantanni noohu hiittoonniiti?

⁵ Woyyeessiꞌra hasiꞌratto akata doorte mixo fushshiꞌri. Huuccatto assidhe hiikkonne akata woyyeessiꞌra hasiissannohero hedi. Hakkiinni woyyeessiꞌrattora hedootto akata doodhi. Lawishshaho albinni roore woloota mararate woy ammanate roduuwakki kaaꞌlate hasattokki lexxitanno gede assiꞌra dandaatto? Woy albinni roore keere kalaqattohanna gatona yaattoha ikka dandaatto? Maa woyyeessiꞌra hasiissannohero kulannohe gede mitto ammanatto jaalakki amaaꞌla dandaatto.—Law. 27:6.

6. Mitto akata woyyeessiꞌrate fushshiꞌrootto mixo wonshiꞌrate sharrama dandaattohu hiittoonniiti?

⁶ Mixokki wonshiꞌrate sharrami. Tenne assa dandaattohu hiittoonniiti? Tenne assa dandaatto doogga giddo mitte woyyeessiꞌra hasiꞌrootto akati daafira xiinxallate. Hanni woloota albinni roore gatona yaa hasiꞌrootto yine hendo. Woloota mulla gatona yiinohunna yiinokkihu Qullaawu Maxaafi giddo kulloonni manni lawishsha nabbabbenna hiincite hanafa dandaatto. Hanni Yesuusi lawishsha laꞌno. Isi woloota mulla gatona yiino. (Luq. 7:47, 48) Qoleno soꞌronsa agure dancha akatansa illachishino. Hatte yannara noo Farisooti kayinni ‘manna mishshanno.’ (Luq. 18:9) Kuri lawishshuwa hiincittohu gedensaanni ateneeto togo yite xaꞌmi: ‘Woloota ma garinni laeemmo? Hiikkonne akatansa illachisheemmo?’ Mitto mancho gatona yaa qarra ikkitinoheha ikkiro, hakko manchita dancha akatta borreessate woꞌnaali. Hakkiinni ateneeto togo yite xaꞌmi: ‘Yesuusi konne mancho laꞌꞌannohu ma garinniiti? Isi gatona yaannosi?’ Konni garinni xiinxallanke hedonke biddi assiꞌneemmo gede kaaꞌlitannonke. Koffi assinonke mancho gatona yaa umi qara qarra ikkitankera dandiitanno. Ikkollana akatanke woyyeessiꞌrate sharrama agura hoongummoro gatona yaa roore shota ikkitanni hadhannonke.

KAAꞌLITANNO DANDOO ROSSE

7. Lawishsha 22:29 kultanno garinni Yihowa xaa yannara dandoo noonsa loosaasine horoonsiꞌranni noohu hiittoonniiti?

⁷ Kaaꞌlitanno dandoo rosateno mixo fushshiꞌra dandiineemmo. Beeteelete minna, Jajjabbu Gambooshshi Addaraashenna Gambooshshu Addaraashe minate lowo roduuwi hasiissannota qaagi. Konne looso loossannori giddo batinyu roduuwi dandoo afidhinohu woꞌnaalshu noonsa roduuwi ledo loosseeti. Misile leellishshannonte gede roduuwu Jajjabbu Gambooshshi Addaraashenna Gambooshshu Addaraashe gatamarranni gara rossanni no. “Hegere Moote” Maganu Yihowanna “mootoollete Mootichi” Yesuusi Kiristoosi kuri dandoo noonsa roduuwa horoonsidhe dhagge ikkanno looso loossanni no. (1 Xim. 1:17; 6:15; Lawishsha 22:29 nabbawi.) Dandoonke woyyeessiꞌrate diinaggaambe loonseemmohu uminke ayirrinyira ikkikkinni Yihowa ayirranno gede assateeti.—Yoh. 8:54.

8. Mitte dandoo rosate mixo fushshiꞌra dandaattohu hiittoonniiti?

⁸ Rosa hasiꞌratto dandoo doorte mixo fushshiꞌri. Hiittee dandoo woyyeessiꞌra hasiꞌratto? Woyyeessiꞌra hasiissannohe dandoo kultannohe gede songokki cimeeyye xaꞌmi woy woradu aliidi laꞌꞌaanchono xaꞌma dandaatto. Lawishshaho insa coyiꞌratenna rosiisate dandoo woyyeessiꞌra hasiissannoheta kultuhero, ma garinni woyyeessiꞌra dandaattoro badde kultannohe gede xaꞌmi. Hakkiinni dandookki woyyeessiꞌrate kaaꞌlannohere assi. Tenne assa dandaattohu hiittoonniiti?

9. Mitte dandoo rosate fushshiꞌrootto mixo wonshiꞌra dandaattohu hiittoonniiti?

⁹ Mixokki wonshiꞌrate sharrami. Hanni rosiisate dandookki woyyeessiꞌra hasiꞌrootto yine hendo. Nabbawatenna Rosiisate Dandiittore Baala Assi yitanno biroshere seekkite xiinxalla dandaatto. Kiristaanu Heeshshonna Soqqansho Gambooshshira kifile shiqishatto gede kullihero, mittu woꞌnaalshu noosi rodii kifile shiqishattora albaanni shiqishatto gara lae woyyeessiꞌra hasiissannohere kulannohe gede xaꞌmiꞌra dandaatto. Dandoo nooheha calla ikkikkinni chaachaaranna ammaꞌninanniha ikkite danchu suꞌmi heeꞌrannohe gede assiꞌri.—Law. 21:5; 2 Qor. 8:22.

10. Mitte dandoo sunu sununni woyyeessiꞌra dandiinanni gara leellishanno lawishsha kuli.

¹⁰ Woyyeessiꞌrate mixo fushshiꞌrootto coyi qarrissannohehalla ikki? Hatto ikkiro hexxo mudhitooti! Mittu Geerii yinanni rodii dancha gede nabbawa didandaanno. Isi songote gambooshshiwa huurosi naggi asse nabbawate woꞌnaalanno woyite lowo geeshsha saalannota coyiꞌrino. Kayinni isi dandoosi woyyeessiꞌrate sharrama diagurino. Xa isi qajeelino daafira songote gambooshshiwa, woradu gambooshshiwanna qoqqowu gambooshshiwa lallawo shiqisha dandiinota coyiꞌrino!

11. Ximootewoosi gede uyinanninkeha wole looso lende adhate kaaꞌlannonkeri maati?

¹¹ Ximootewoosi dancha gede coyiꞌrannoha woy worba rosiisaancho ikka dandiino? Tenne daafira Qullaawu Maxaafi kulannori dino. Ikkirono isi Phaawuloosi amaalinosi amaale harunse gale hose uyinoonnisi looso dancha gede loosannoha ikkinoti dihuluullissannote. (2 Xim. 3:10) Hatteente gede ninkeno dandoonke woyyeessiꞌneemmoha ikkiro, uyinanninkeha wole loosono adhate ikkadda ikkineemmo.

WOLOOTA KAAꞌLITINANNI FARO HASIDHE

12. Wolootu loossanno loosi kaaꞌlinohehu hiittoonniiti?

¹² Ninke baalunku wolootu loossanno loosinni horo afiꞌneemmo. Dhiwamme akimete minira haꞌnummoro, Hospitaalete Ledo Xaadissanno Komite giddo woy Dhiwantinore Laꞌanno Gaamo giddo soqqantanno cimeeyye dagge laꞌunkero hagiidhineemmo. Heeshshonke giddo qarru iilleennanke mittu shaqqadu cimeessi yanna gaaꞌme qarranke hasaaphinanna macciishshinkeronna sheshifachishinkero tashshi yaannonke. Qoleno Qullaawa Maxaafa xiinxallisate kaaꞌlo hasiissunkero mittu woꞌnaalshu noosi suwisaanchi ledonke xiinxallise woyyeessiꞌra hasiissannonkere kulinkero hagiidhineemmo. Kuri baalunku roduuwi ninke kaaꞌlitino daafira tashshi yaannonsa. Ninkeno roduuwanke kaaꞌlate ninkeneeto shiqinshummoro togoo hagiirre afiꞌra dandiineemmo. Yesuusi “Adhannonkunni aannohu baꞌraaꞌrinoho” yiino. (Soq. 20:35) Tenne woy wole doogganni soqqanshokki halashshiꞌra hasiꞌrittoro mixokki wonshiꞌrate mayi kaaꞌlannohe?

13. Mixo fushshiꞌneemmo woyite maa qaaga hasiissannonke?

¹³ Leeltinokki mixo fushshidhooti. Lawishshaho, ‘Songote giddo albinni roore soqqama hasiꞌreemmo’ yite hedattoha ikkara dandaanno. Ikkollana togoo mixo wonshiꞌra dandaatto gara hattono tenne mixo wonshiꞌroottotanna teꞌee afa qarra ikkitahera dandiitanno. Hakko daafira leeltino mixo fushshiꞌri. Mixokkinna tenne mixo wonshiꞌrate hedoottohu hiittoonniitiro borreessite nafa amaxxa dandaatto.

14. Fushshiꞌnoommo mixo biddi assiꞌra hasiissannonkehu mayiraati?

¹⁴ Fushshiꞌnoommo mixo biddi assiꞌra hasiissannonke woyiti heeꞌrara dandaanno. Mayira? Korkaatuno heeshshonke giddo iillannonke coye woꞌmunni woꞌma hooꞌla didandiineemmo. Lawishshaho soqqamaasinchu Phaawuloosi Teselonqe katamira haaro songo xintantanno gede kaaꞌlino. Qoleno isi hakko heeꞌre haarote Kiristaana ikkitinore kaaꞌlate mixo fushshiꞌrinoti dihuluullissannote. Kayinni iso giwanno manni katamunni fule haꞌranno gede giddeessinosi. (Soq. 17:1-5, 10) Phaawuloosi hakko keeshshoommero, ammanate roduuwisi qarru giddo ubbanno. Ikkollana Phaawuloosi hexxo dimudhino. Hatteentenni isi iillinosi coye dandee saino. Gedensoonni isi, Teselonqe heedhannore haarote Kiristaana ikkitino roduuwa ayyaanaamittetenni kaaꞌlanno gede Ximootewoosi hakkiira soyino. (1 Tes. 3:1-3) Ximootewoosi kaaꞌlo hasiissannowa haꞌre soqqamate isonooto shiqishino daafira Teleselonqe heeꞌranno Kiristaani lowo geeshsha hagiidhiinoti dihuluullissannote!

15. Heeꞌnoommo gari soorramanno woyite mixonke soorrantannohu hiittoonniiti? Lawishsha kuli.

¹⁵ Phaawuloosi, Teselonqe noo yannara iillinosirinni ronseemmori no. Mitte soqqanshote qoosso afiꞌrate sharrammanni heeꞌnoommoha ikkara dandaanno; kayinni wolqankera aleenni ikkino coyi iillinonke daafira tenne qoosso afiꞌra didandiinoommo. (Ros. 9:11) Aterano togoori iillinoheha ikkiro wonshiꞌra dandaattota wole mixo fushshiꞌri. Teedinna Heyidi yinanni minaanninna minaama hatto assino. Insa giddo mitto dhiwanni waadino daafira Beeteeletenni agurte fultino. Ikkollana Yihowara noonsa baxilli insa soqqanshonsa halashshidhannota wole doogga hasidhanno gede kakkayisinonsa. Insa umo, woꞌma yanna suwisaano ikkitino. Gedensoonni baxxitino suwisaano ikkitino; qoleno Teedi riqiwaancho woradu aliidi laꞌꞌaancho ikkanno gede qajeelsinisi. Hakkiinni kayinni woradu aliidi laꞌꞌaano soqqanshonsa uurrissanno diro soorrini. Hakko daafira Teedinna Heyidi xaate tenne soqqansho soqqama dandaannokkita huwati. Insa dadillitinoha ikkirono Yihowara wole doogganni soqqama dandiitannota huwattino. Teedi togo yiino: “Mittu gari soqqansho calla illachisha hasiissannonkekkita huwantoommo.”

16. Galatiyu Sokka 6:4​tenni maa ronseemmo?

¹⁶ Heeshshonke giddo iillannonkere woꞌmunni woꞌma hooꞌla didandiineemmo. Hakko daafira Yihowa albaanni noonke waaga noonkete soqqanshote qoossonni keena woy noonke qoosso wolootunnite ledo heewisiisa dihasiissannonke. Heyidi togo yitino: “Kiꞌne heeshsho wolootunnite ledo heewisiisa hanaffiniro hagiirriꞌne baꞌꞌanno.” (Galatiyu Sokka 6:4 nabbawi.) Hakko daafira Yihowara soqqama dandiineemmo faro hasiꞌra danchate.c

17. Uyinannihete soqqanshote qoossora ikkado ikkate maa assa dandaatto?

¹⁷ Heeshshokki bikkunnita assidhe hattono hasiisannokki asali giddora ea qorophite Yihowara albinni roore soqqamate qixxaawa dandaatto. Seeda yanna mixo wonshiꞌrate kaaꞌlitannoheta harancho yanna mixo fushshiꞌri. Seeda yanna mixokki woꞌma yanna suwisaancho ikke soqqama ikkituro agurittokkinni kaaꞌlaancho suwisaancho ikkite soqqama dandaatto? Mixokki songote soqqamaancho ikkite soqqama ikkituro, albinni roore qanchoho soqqamanna songokkira noore dhiwantinore woy geerra roduuwa xaꞌma dandaatto? Konni garinni soqqante afiꞌratto woꞌnaalshi albillitte wole qoosso afiꞌratto faro fanahera dandaanno. Uyinannihe looso baala diinaggaabbe loosate murciꞌri.—Rom. 12:11.

18. Misile leellishshannonte gede Biverilii lawishshinni maa rosootto?

¹⁸ Diru akkalle amaddunkerono ayyaanaamittete mixo fushshiꞌranna wonshiꞌra dandiineemmo. Hanni 75 diro ikkannosete rodoo Biverilii woꞌnaalsha laꞌno. Ise qaafa hoꞌlannohu buutote dhibbi waadannose. Ikkirono ise Qaagooshshu Ayyaani zamachira dancha gede soqqama halchitino. Hakko daafira ise mixo fushshidhino. Biverilii konni zamachira soqqamate fushshidino mixo wonshidhuti lowo geeshsha hagiidhitino. Ise assitinori wolootuno diinaggaabbe soqqantanno gede kakkayisinonsa. Geerru roduuwinke albi geeshsha soqqama dandiitannokkiha ikkirono, Yihowa loosonsa naadanno.—Far. 71:17, 18.

19. Fushshiꞌra dandiineemmoti mite ayyaanaamittete mixo hiitteeti?

¹⁹ Wonshiꞌra dandaatto mixo fushshiꞌri. Yihowa baxannohe gede assitanno akatta lossiꞌri. Maganinkeranna dirijjitesira albinni roore soqqamate kaaꞌlitannohe dandoo rosi. Roduuwakki albinni roore kaaꞌla dandaatto doogga hasiꞌri.d Hatto assittoro Ximootewoosi gede Yihowa kaaꞌlonni, “Lophakki mannu baalu afanno.”—1 Xim. 4:15.