Maganu Addi Addi Kalaqo Kalaqa Hanafi

NOONKEHU danchurichchi baalunku Maganu kalaqinoho. Barra xawaabba uyitannonke gede arrishsho, hashsha shiimu jilbinni xawaabba afiꞌneemmo gede agananna beeddahe kalaqino. Qoleno, ise aana heeꞌneemmo gede uulla kalaqinonke.

Ikkollana Maganu umo kalaqinohu arrishsho, agana, beeddahenna uulla diꞌꞌikkino. Umo kalaqinohu maatiro afootto? Maganu umo asse iso labbannore kalaqino. Magano laꞌꞌa dandiineemmokkinte gede kuriuuno laꞌꞌa didandiineemmo. Qullaawu Maxaafi insa, sokkaanote yaanno. Maganu sokkaano kalaqinohu iima isi ledo heedharaati.

Maganu umo kalaqino sokkaanchi horonta baxxinoho. Isi Maganoho bayira Beettosiiti; qoleno Annisi ledo loosino. Wole baalankare kalaqate Magano kaaꞌlino. Arrishsho, agana, beeddahenna uullanke kalaqate kaaꞌlinosi.

Hakkawaro uulla marichcho labbanno? Umo uullate aana ayino heeꞌra didandiino. Uulla woꞌmanta amadino waa agurranna woluri mitturino dino. Ikkollana Maganu uullate aana mannu heeꞌrara hasiꞌri. Konni daafira mannaho hasiisannore qixxeessa hanafi. Maa maa qixxeessi?

Umo uullate xawaabbu hasiisannose. Konni daafira Maganu, uulla arrishshotewiinni xawaabba afidhanno gede assi. Konne assinohuno hashshano barrano xawaabbu heeꞌranno gedeeti. Gedensaannino Maganu, baatto guggushshe amadinose wayira iimaanni fulte leeltanno gede assi.

Umo baattote aana mitturino dino. Hatte yannara baatto tenne laꞌꞌatto misile aana noo gedeete. Hakkawaro daraaro, haqqe woyi saada dino. Uulla woꞌmino wayi giddo qulxuꞌme nafa dino. Uulla saadatenna mannaho heeꞌrate biiffinota assate Maganoho lowo loosi gatinosi.