XAGGE 2
Biifado Kaashshu Base
KUNEETI baatto lai! Baalunkuri hiitto biifino! Hayiisso, haqqe, daraaro, saadano baalanta lai. Daaniichchonna doobbiyo badde kula dandaatto?
Tini biifado kaashshu base qixxaabbinohu hiittoonniiti? Maganu uulla ninkera hiitto asse qixxeessinoro hanni laꞌno.
Umo, Maganu hayisso kalaqe uulla amaddanno gede assi. Qoleno duuchchu danita shiimmaadda muꞌro, citanna haqqe kalaqi. Uulla biifisinori kuriuuti. Ikkollana tini muꞌro hakkiinni saꞌino horo afidhino. Batinynye muꞌro lowo geeshsha coommitanno sagale ikkitanno.
Gedensaannino Maganu waa daakkanno gede qulxuꞌme, iima buubbanno gede cea kalaqi. Qoleno woshsha, basurroota, farado, hattono jajjabbanna shiimmaadda saada kalaqi. Qachchiꞌnera hiitti saada heedhanno? Maganu kuriuu baala ninkera kalaqino daafira hagiidha dihasiissannonke?
Jeefoteno Maganu uullanniha mitto gafa bade baxxitino base asse qixxeessi. Tenne basera Edenete kaashshu base yee suꞌma fushshi. Tini base lowo geeshsha biifadote. Hakko noori baalunku biifadoho. Qoleno Maganu woꞌma uulla, tenne isi biifise kalaqino base gedeeta ikkitara hasiꞌranno.
Ikkollana hanni tenne kaashshu base misile galagalte lai. Maganu kalaqikki gatinori noota afino; kuni maatiro afootto? Hanni laꞌno.
Kalaqo 1:11-25; 2:8, 9.