Qaensanni Fushshininsahu Mayiraati?

HANNI ikkanni noore lai. Addaaminna Heewani biifado Edenete kaashshi base giddonni fushshinanni heeꞌnoonni. Mayiraatiro afootto?

Korkaatuno busha coye assitinohuraati. Konni daafira Yihowa qorichchishanni noonsa. Addaaminna Heewani assitinoha busha coye afootto?

Maganu assitinoonte yiinore assitino. Maganu kaashshu basera noo haqqenni guma ita dandiitannota kulinonsa. Ikkollana mitte haqqichchowiinni ittannokki gedenna gibbe itturo kayinni reyitannota kulinsa. Hatti haqqichcho isiniitira wodhinote. Qoleno mannirichcho adha soꞌro ikkitinota anfoommo; dihattooti? Addaaminna Heewani ma assituyya?

Mitto barra kaashshu basera Heewani callase heedheenna hamashshu coyiishiishise. Xagge ikkanno coyeeti! Heewani Maganu ittinoonte yiino haqqichchonni ittanno gede kulise. Yihowa hamashsho kalaqinohu coyiꞌrannokki gede asseeti. Konni daafira konne hamashsho coyiꞌranno gede assinosihu wolu no yaate. Hakku ayeeti?

Addaami diꞌꞌikkino. Konni daafira, Yihowa uulla kalaqara albaanni balaxe kalaqinori giddo mitto ikka noosi. Insano sokkaanote; ninke sokkaano laꞌꞌa didandiineemmo. Tenne sokkaano giddo mittu lowo geeshsha naaxxaleessa ikki. Maganu gede mootichcha ikka hasiissannoe yee heda hanafi. Qoleno mannu Yihowara agure isira hajajamannosi gede hasiꞌri. Hamashsho coyiꞌranno gede assinohu konne sokkaanchooti.

Kuni sokkaanchi Heewani doga dandiino. Hoolloonni guma itturo Maganu gedeeta ikkitannota kulise wote ammantino. Konni daafira hattee haqqichcho guma ittu; Addaamino iti. Addaaminna Heewani Maganoho dihajajantino; biifado kaashshu base giddonni fushshininsahu iseraati.

Ikkollana Maganu barrunni mitto barra woꞌma uulla Edenete kaashshi base gede biifado assanno. Atino konni loosira kaaꞌlo assa dandaattohu hiittoonniitiro albaange laꞌneemmo. Xa kayinni Addaamiranna Heewanira mayi iillinsaro laꞌno.