Biꞌre Gannatete Giddo Heeshsho Hiittoote?

Yihowa Addaamiranna Heewanira batinynye dancha coye uyinonsa. Kalaqo 1:28

Yihowa umi meyaata Heewani kalaqe, galtesi ikkitanno gede Addaamira uyisi. —Kalaqo 2:21, 22.

Yihowa insa xeꞌne nookkire asse guuta surrenna guuta mannimma oye kalaqinonsa.

Insa heedhanno Gannate Edenete kaashshu base yaamantanno; hatti base wayi lagga, guma laaltanno haqqenna saada woꞌmitinota ikkitinohura lowo geeshsha biifadote.

Yihowa insa coyishiishinonsa; qoleno rosiisinonsa. Iso macciishshituro uullate aana biiffino Gannatera hegerera heedhanno.

Maganu haqqete giddonni mittichcho haqqichcho guma ittinoonte yiinonsa. Kalaqo 2:16, 17

Sokkaanote giddo mittu Maganoho finqili. Kuni bushu sokkaanchi Sheexaane Daawuloosiiti.

Yihowa Addaamiranna Heewanira mitte guma laaltanno haqqichcho leellishensa hatte haqqichcho ittannokki gedenna itturo kayinni reyitannota kulinonsa.

Sheexaanu, Addaaminna Heewani Yihowara hajajantara dihasiꞌrino. Konni daafira hamashsho horoonsiꞌre ‘hatte haqqichcho guma itittaro direyatta, hatteentenni Maganu gedeeta ikkatta’ yee Heewanira kulise. Hatto yaasi kayinni kaphphoho.—Kalaqo 3:1-5.