Worba Mancho

UULLATE aana mannu kiiro lexxitanni hadhuta, batinynyu manni Qayeeli gede bushare assannoha ikki. Ikkollana kurinni baxxinohu mittu manchi no. Kuni manchi Heenookiiti. Heenooki bareeda manchooti. Qooxeessisira noo manni baalunku bunshe assannoha ikkirono, Heenooki kayinni Maganoho soqqamino.

Kuni manni bunshe calla assannohu mayiraatiro afootto? Hanni qaagi; Addaaminna Heewani Maganoho hajajantannokki gedenna Maganu ittinoonte yiino haqqichcho guma ittanno gede assihu ayeeti? Garaho; tenne assinohu busha sokkaanchooti. Qullaawu Maxaafi iso Sheexaaneho yaanno. Isi mannu baalu busha ikkanno gede assate woꞌnaalanno.

Mitto barra Maganu Yihowa, Heenooki mannootu macciishshate baxxannokkire kulannonsa gede assi. Heenooki togo yiinsa: ‘Maganu mitto barra busha manna baala gudaraati.’ Mannootu tenne macciishshitu wote kawoote lowo geeshsha hanqitino. Heenooki shitara nafa hasidhukki digattino. Konni daafira Heenooki, Maganu abbannore dagate kulate worba ikka hasiissinosi.

Maganu, Heenooki konni bushu manni ledo lowo diro heeꞌrara dihasiꞌrino. Heenooki 365 diro calla heeꞌrino. Heenooki “365 diro calla” heeꞌrino yineemmohu mayiraati? Korkaatuno hakkawari manni xaahunni roore jawaatanna roore diro heeꞌrannoha ikkinohuraati. Heenooki beetti Matusaali isinni 969 diro heeꞌrino!

Heenooki reyihu gedensaanni, mannootu roore bushshanni hadhu. Qullaawu Maxaafi, ‘wodaninsa giddo noo hedo baalanti busha ikkitinota,’ qoleno ‘uulla finqilletenni woꞌmitinota’ coyiꞌranno.

Hatte yannara kageeshshi bunshe uullate aana woꞌmitinohu mayiraatiro afootto? Korkaatuno Sheexaanu mannu bushare assanno gede wole doogo kalaqirinohuraati. Xa tenne hajore ronseemmo.