Umi Magani-Seemo

NOHINNA maatesi markaawete fultu gedensaanni Nohi balaxe maa assinoro afootto? Maganoho kakkalo shiqishino. Woroonni misilete aana Nohi kakkalo shiqishanna lai. Nohi tenne saadate kakkalo shiqishinohu Maganu maatesi baote wayinni gatisino galatiraati.

Nohi shiqishino kakkalonni Yihowa hagiidhinoha lawannohe? Ee, hagiidhino. Konni daafira, alame layinkita wayinni horonta dihuneemmo yee Nohira qaale ei.

Baatto woꞌmanti hakkawotenni mooltu; Nohinna maatesino markaawete gobbaanni haaro ikkite heeꞌra hanaffu. Maganuno insa, ‘Batinynye ooso ille. Mannu uulla woꞌma geeshsha kiirotenni batidhe’ yee maassiꞌrinsa.

Ikkollana, gedensaanni ilamanno manni baote wayire macciishshiro, hattoohu baote wayi galagale daannoha laweennansa waajjara dandaanno. Konni daafira Maganu, woꞌma uulla baote wayinni dihuneemmo yee eino qaale mannaho qaagiissanno malaate wori. Mayi malaate worinoro afootto? Magani-seemo worino.

Magani-seemo duuchcha wote xeena gane kaeenna arrishsho fulturo iima leeltanno. Magani-seemo batinynye biifado kuula afidhino. Ati ise laꞌe egennootto? Koye misilete aana noota laitto?

Maganuno, ‘Baalunku mannino saadano baote wayinni layinkimeeshsho horonta digooffanno yee qaale eoommo. Magani-seemo gomichchu aana woreemmo. Magani-seemo fultanno wote ise lae eoommo qaale qaageemmo’ yii.

Konni daafira magani-seemo laꞌꞌatto wote marichcho qaaga hasiissannohe? Eewa, baote wayinni alame layinkimeeshsho dihuneemmo yee Maganu eino qaale qaaga hasiissannohe.