Settu Manni Gate Saino

Nohi, minisi manninna addi addi saada markaawete giddora eꞌu. Hakkiinni Yihowa markaawete saanqa cufeenna xeena gana hanafi. Lowo xeena ganino daafira markaawe wayi duhi. Gedensaanni wayi baatto gudise diwi. Markaawete giddora einokkihu bushu manni baalu reyi. Nohinna minisi manni kayinni markaawete giddo noo daafira ikkinori dino. Insa Yihowa asse yiinore assitino daafira, mageeshshi geeshsha hagiidhitinoha lawannohe?

Xeena 40 barranna 40 hashsha ganino; hakkiinni xeenu birri. Uullate aana woꞌmino wayino xeanni xeanni haꞌri. Wayi xeanni haꞌrita markaawe ilaalu aana uurritu. Ikkirono, uullate aana wayi woꞌme noo daafira Nohinna minisi manni markaawete giddonni fula didandiino.

Sunu sununni wayi goofita uulla mooltu. Nohinna minisi manni markaawete giddo keeshshino yanna mitto diro saꞌanno. Yihowa insa ‘Xaate markaawete giddonni fulle’ yiinsa; insa fultanno woyite gobba wole gobba labbanno. Insa Yihowa gatisinonsa daafira iso galaxxitino; konni daafira Isira kakkalo shiqishshino.

Yihowa insa shiqishshino kakkalo hagiidhe adhino. Isi ‘Layinkita uullate aana noore baala gudate baote waa diabbeemmo’ yiino. Yihowa baote waa abbannokkita leellishate gordoho magani-seemo fultanno gede assino. Magani-seemo laꞌe egennootto?

Hakkiinni Yihowa Nohinna minisi manni ooso ile uulla woꞌmanno gede kulinsa.