Yaaqoobi Maate Gibitse Hadhu

YOOSEEFI xa cinca hoogi. Soqqamaanosi baala mininni fulle yii. Isi callisi roduuwisi ledo gate, wiꞌla hanafi. Roduuwisi mayira wiꞌlannoro affinokki daafira, mageeshsha jajjartinoro heda dandiineemmo. Hakkiinnino Yooseefi, ‘Ani Yooseefiiti. Anniꞌya lubbote no?’ yiinsa.

Roduuwisi masse coyiꞌra hooggu. Lowo geeshsha waajjitu. Ikkollana Yooseefi, ‘Anewa shiqqi yiiyye’ yiinsa. Shiqqi yitu gedensaanni, ‘Ani Gibitsete hirtinie rodooꞌne, Yooseefiiti’ yiinsa.

Yooseefi shaqqillunni lede, ‘Hirtinoonnie daafira saalfattinoonte. Mannu lubbo gatisate ane Gibitse soyinoehu Maganoho. Feeriooni ane tenne gobbara nugusa assinoe. Konni daafira rakkine martine tenne anniꞌyara kulle. Koye daye heeꞌranno gedeno kullesi’ yiinsa.

Hakkunni gedensaanni, Yooseefi roduuwasi mitto mittonka hanqafe sunqinsa. Feeriooni Yooseefi roduuwi dagginota macciishshiti, Yooseefi, ‘Roduuwikki farashshu gaare massite annansanna ayiddensa haadhe higgona. Anino Gibitsete gobbara doorantino base eemmonsana’ yii.

Yooseefi roduuwino yinoonninsata assitu. Kuneeti Yooseefi annasi woꞌma maatesi ledo Gibitse dayeenna daae yaanna lai.

Yaaqoobi maate halaꞌlado ikkitino. Maatesi Gibitse hadhu wote, oososinna oosote oososi mitteenni gamba yite 70 ikkitanno. Ikkollana meentinsanna lowo soqqamaanono no. Kuni manni baalu Gibitse haꞌri. Maganu Yaaqoobi suꞌma Isiraeeli yee soorrino daafira, insa, Isiraeelete gosa yinanni. Isiraeelete gosa Maganoho baxxitino daga ikkitino; tenne albaange ronseemmo.