Yooseefi Roduuwisi Gibbusi

BEETTU yaadinonna hexxo mudhino gara lai. Kuni beetti Yooseefiiti. Roduuwisi kuri Gibitse hadhanno mannootira hirte kaꞌinosi. Yooseefi hakko massite borojjichcho assitaraati. Yooseefi ledo amatenni xaaddannokki roduuwisi rodiinsara tenne bunshe assituhu mayiraati? Korkaatuno Yooseefi hinaassinohuraati.

Anninsa Yaaqoobi, Yooseefi lowo geeshsha baxannosi. Konni daafira, biifado uddano gowisiisisi. Yooseefiri 10 bayiruuddu roduuwi Yaaqoobi baxannosi gara laꞌuti, Yooseefi hinaassunna gibbu. Ikkollana Yooseefi gibbinohu konnira calla diꞌꞌikkino.

Yooseefi lame haaqe haaqiirino. Lamente haaqera roduuwisi sagaddannasi laino. Yooseefi roduuwisira tenne kulinsata, roore gibbusi.

Mitto barra, Yooseefiri bayiruuddu roduuwi anninsa gereewo allaaltanni noowa, roduuwisi noo gara laꞌꞌanno gede Yaaqoobi Yooseefi fushshe soyi. Roduuwisi isi daanna laꞌuti, gamu, ‘Amme shinona!’ yitu. Bayiru rodiinsa Roobeeli kayinni, ‘Deeꞌni, hatto assitinoonte!’ yii. Insano shaa agurte, dukke wayi nookki balera tuggu. Hakkunni gedensaanni, hiitto assitannoro amaalamate ofoltu.

Amaalantanni heedheenna, Isimaeelete manni haꞌranni dayi. Yihuda isi ledo amatenni xaaddannokki roduuwasi togo yii: ‘Amme Isimaeelete mannira hirrona.’ Insano isi yii gede assitu. Yooseefi 20 birrira hirtu. Togo assansa lowo geeshsha kaajjillu woꞌmino assooteeti!

Tini ooso anninsara mayitaraati? Meichcho gorrite Yooseefita biifado uddano mundeetenni marro marro qolte cuuꞌu. Hakkiinnino cuuꞌino uddano anninsa Yaaqoobiwa massite, ‘Tenne anfoommo; Yooseefiteronna teꞌee hanni lai’ yitu.

Yaaqoobino uddano Yooseefita ikkitinota afi. ‘Yooseefi kawoote moyichchulla itino,’ yee wiꞌli. Yooseefi roduuwino anninsa hatto yee hedara hasidhino. Yaaqoobi lowo geeshsha xissiisiri. Lowo barrano wiꞌli. Ikkollana Yooseefi direyino. Massinisi gobbara mayi iillisiro hanni laꞌno.