Muse Kincho Gani

DIRU diru aana lexxanni haꞌri; 10 diro, 20 diro, 30 diro, 39 diro ikki! Isiraeele xaano halallaholla no. Ikkollana Yihowa mannasi konne diro woꞌma towaatino. Ittanno gede menna dirrisinonsa. Qoleno barra gomichchunni, hashsha kayinni giirate xawaabbinni massaginonsa. Kageeshshi diro baala uddanonsa digooffino; lekkansano dimadidhino.

Isiraeele Gibitsetenni fultunku 40 dironna mitto agana ikkino. Insa xaano Qaadeesi hadhu. Kuni bayichchi 40 meddi yaanno diri albaanni 12 qotaano Kanaꞌꞌaani gobba qottanno gede sonki yannara Isiraeele noowaati. Muse rodoo Maariyaami Qaadeesi reyitu. Bashshonte gede kowiichcho qarru kalaqami.

Mannu waa horonta hoogi. Konni daafira togo yee Musera gungumi: ‘Reyinoommoro woyyannonkenka. Gibitsetenni fushshite tenne loosiꞌneenna mitturi fulannokkita busha gobba mayira abbittonke? Intanniri gidu, belese, woyinenna roomaane dino. Woliri gateenna anganni wayi nafa dino.’

Musenna Aarooni huuccatto assidhara xaadooshshu dunkaana martuta, Yihowa Muse togo yii: ‘Manna gamba assi. Hakkiinnino albansaanni hakko noo kinchira coyiꞌri. Kinchu giddonnino mannahonna saadansara ikkanno wayi fulannona.’

Hakkiinnino Muse manna gamba asse, ‘Kiꞌne Maganunni addaxxitinannikki manna macciishshe! Aarooninna ani kiꞌnera kinchu giddonni waa fushsha hasiissannonke?’ yii. Hakkunni gedensaanni Muse siqqotenni kincho lame hige gani; lowo wayino kinchu giddonni lolahi. Mannahono saadateno ikkanno wayi fuli.

Yihowa kayinni Museranna Aaroonira hanqi. Mayira hanqinoro afootto? Korkaatuno Musenna Aarooni kinchu giddonni waa fushshitannori insa ikkitinota coyidhino. Ikkollana waa fushshinohu Yihowaati. Konnira Musenna Aarooni tenne xawisse kultinokki daafira, Yihowa insa qorichchishannota kuli. ‘Mannaꞌya haadhine Kanaꞌꞌaani dieꞌinanni’ yiinsa.

Mulenni Isiraeele Qaadeesinni fultu. Shiima yanna gedensaanni Hoori Ilaala iillitu. Hakkiichchono ilaalaho guunxote Aarooni reyi. Isira reyi wote 123 diro ikkinosi. Isiraeeleno lowo geeshsha dadillite, 30 barra baalunku Aaroonira wiꞌlitu. Beettisi Alaazaari Isiraeelete dagara annisinni aane kakkalaanote biilo ikki.