Iyyaasu Massagaancho Ikki

MUSE Isiraeelete manni ledo Kanaꞌꞌaani gobba eara hasiꞌrino. Konni daafira, ‘Yordaanoosi Laga tayise sae, dancha gobba laeemmo gede fajjie’ yee Yihowa xaꞌmiri. Yihowa kayinni, ‘Layinkita konne coye kayissootie!’ yiisi. Yihowa togo yiinohu mayiraatiro afootto?

Muse siqqotenni kincho gani wote ikkinorinniiti. Hakkawote isinna Aarooni Yihowara ayirrinynye uyitinokkita qaagi. Kinchu giddonni waa fushshanni noohu Yihowa ikkinota mannaho dikultino. Konni korkaatinni Yihowa insa Kanaꞌꞌaani eꞌara difajjino.

Aarooni reyihunni shiima yanna gedensaanni Yihowa Muse, ‘Iyyaasu haadhe kakkalaanchu Alaazaarinna Isiraeelete manni albaanni uurranno gede assi. Insa baalunku albaanni, haaru massagaanchi Iyyaasu ikkinota woꞌmunkura kuli’ yiisi. Misilete aana laꞌꞌattonte gede, Museno Yihowa yiinosi gede assi.

Hakkiinnino Yihowa Iyyaasu togo yiisi: ‘Bareeda ikki; waajjitooti. Aammonsara qaale eoommota Kanaꞌꞌaani gobba Isiraeele massagge eessatto; anino ledokki ikkeemmo.’

Gedensaannino Yihowa, Muse Moaabi gobbara heeꞌrannoha Naabawu Ilaala giddanno gede kulisi. Museno hakko guunxote heeꞌre Yordaanoosi Laga widoogise biifado Kanaꞌꞌaani gobba lai. Yihowano, ‘Abirahaami, Yisaaqinna Yaaqoobi oosora aammora qaale eoommo gobba tenneeti. Atino laꞌꞌattora fajjoommohe; hakka eattora kayinni difajjeemmohe’ yiisi.

Muse Naabawu ilaalira heeꞌrenni reyi. Isira reyi wote 120 diro ikkinosi. Reyi barri geeshsha jawaataho; qoleno illesi dijaanjurtino. Muse reyita mannu lowo geeshsha dadille wiꞌli. Iyyaasu haaro massagaanchonsa ikkita kayinni hagiidhi.