Raabi Qotaano Maaxxu

KURI mannooti buuto qarrantino. Noowiinni xooqa hasiissannonsa; xooqa hoogguro mannu shaansaraati. Insa Isiraeelete qotaanooti; insa kaaꞌlitanni noo mancho Reaabiiti. Reaabi konni Iyyaarkote katami gimbe ledo xaadino minira heedhanno. Kuri mannooti qarrantinohu mayiraatiro hanni laꞌno.

Isiraeelete manni Yordaanosi Laga tayise sae Kanaꞌꞌaani gobba eate qixxaawe no. Ikkollana mannu haꞌrara albaanni, Iyyaasu lame qotaano soyi. ‘Hadhine gobbanna Iyyaarkote katama qotte’ yiinsa.

Qotaanono Iyyaarkote katama martuti, Reaabi minira eꞌu. Ikkollana mannu Iyyaarkote nugusira, ‘Lamu Isiraeelete manni gobba qottara techcho hashsha daggino’ yee kuli. Nugusuno tenne macciishshe, Reaabiwa manna soyi; insano dagge, ‘Minekki noo manna fushshi!’ yituse. Reaabi kayinni qotaano minise hiꞌri giddo maaxxe kaꞌino. Iseno, ‘Mannu wote miniꞌyara dayino; ikkeennano hiikkiinni dayinohoro diafoomma. Hashshara siphphi yaanna, katamu saanqa cunfikki fulte hadhino. Jawaattiniro iillitinanni!’ yitu. Mannootuno hordoffanni hadhu.

Mannootu hadhu gedensaanni, Reaabi minise giddo qotaano maaxxinowa rakke martu. Iseno qotaano, ‘Yihowa tenne gobba aannoꞌneta afoomma’ yitunsa. Qolteno togo yitunsa: ‘Yihowa kiꞌne Gibitsetenni fushshi wote Duumo Baara hiitto asse mooshshinoro macciishshinoommo; hattono Sewooninna Aagi yinanni nugussa shitinoonni garano macciishshinoommo. Ani kiꞌnera dancha assummaꞌnente gede, kiꞌneno anera dancha assate eeggatena qaale eꞌe. Annaꞌyanna amaꞌya, seennenna labballo roduuwaꞌya gatisseꞌꞌe.’

Qotaanono ise yitinore assate qaale eꞌu; ikkollana Reaabi mittore assa hasiissannose. Qotaano togo yituse: ‘Tenne duume siiwo haadhe, maskootekkira usuri; qoleno baalanka fiixakki minikkira gamba assi. Iyyaarkote katama adhate baalinke dangeemmo wote, maskootekkira wodhootta siiwo laꞌne minekki nooha mittono dishineemmo.’ Qotaano Iyyaasuwa higguti ikkinore baala kultusi.