Reaabi Qotaano Maaxxu

Israeelete qotaano Iyyaarko hadhu yannara, Reaabi yinanni mancho mine galtara eꞌino. Iyyaarkote moote tenne macciishshe Reaabi minira olanto soyi. Reaabi lamenta qotaano qaaxoho maaxxe, olanto wole ragaanni higge hadhanno gede assitu. Ise qotaanote togo yitino: ‘Yihowa ledoꞌne nootanna tenne gobba qeeltine adhitinannita afoomma daafira kaaꞌleemmaꞌne. Kayinni eeggaꞌneetina, anenna fiixaꞌya shitinannikki gede xaarreꞌꞌe.’

Qotaano Reaabi togo yitu: ‘Minekki nooha mitto manchono dishineemmo. Duume siiwo maskootete aana usuri; fiixikkino gatanno.’

Reaabi, qotaano maskootete rarraansoonni siiwo cuꞌmidhe eela higge dirritanno gede assitu. Insa Iyyaasuwa higgukkinni ilaalaho maaxante sase barra keeshshitino. Hakkiinni Israeele Yordaanoosi Laga tayisse saꞌe Iyyaarkote katama adhate qixxaabbu. Israeele umo qeelte adhitino katami Iyyaarkote. Yihowa insa ‘Lewu barri geeshsha barrunni mitte mitte higgine katamu huxxa doyiyye’ yiinsa. Insa lamalki barra katama lamala higge doyitino. Hakkiinni kakkalaano xurumba ufuuffu, hattono olanto huuronsa naggi assite qeexaaꞌlitu. Hakkiinni katamunnihu kinchu huxxi diigami! Huxxunniwa gamba yee noohu Reaabi mini kayinni didiigamino. Reaabinna fiixise Yihowa ammanino daafira direyino.