Yordaanoosi Laga Tayise Saꞌꞌa

KUNEETI lai! Isiraeele Yordaanoosi Laga tayisse saꞌanni no! Kayinni wayi hiikkiyya? Hatte wogga lowo xeena ganannota ikkitino daafira, lagu shiimu daqiiqi albaanni woꞌme no. Xa kayinni lagaho hili wayino dino! Isiraeele albaanni Duumo Baara tayisse saꞌunte gede, konne lagano moola baatto kaxxite saꞌino! Woꞌme noo wayi hiikka higi? Hanni tenne hajore ronso.

Isiraeelete manni Yordaanoosi Laga tayise saꞌꞌanno yanna iillituta, Yihowa Iyyaasu mannaho togo yee kulanno gede assi: ‘Kakkalaano gondooru taawoota haadhe albankee hadhona. Insa lekkansanni Yordaanoosi Laga qacce kaddanno wote, wayi daada aguranno.’

Konni daafira kakkalaano gondooru taawoota dukke mannaho albaanni hadhu. Yordaanoosi iillituti, wayi giddora eꞌu. Wayino woꞌme iima haꞌranni no; qoleno lowo geeshsha diimete. Insa lekkansanni waa kaddanni heedheenna wayi daada aguri! Tini maalalete! Yihowa daadanni noo waa kofe badhera higanno gede assino. Konni daafira, hakkawontenni lagu mooli!

Gondooru taawoota dukkino kakkalaano moolino lagira mereero martu. Insa misilete aana laitto? Insa mereeroho uurriteenna, woꞌmunku Isiraeelete manni Yordaanoosi Laga moola baatto kaxxe fuli!

Baalunku manni laga tayise saita, Yihowa Iyyaasu tonaalamu jawaatu mannira togo yee kulanno gede assi: ‘Gondooru taawoota dukkino kakkalaano noowa lagu giddora marre. Tonaalame kincho haadhine baaliꞌne techcho hashsha galtinanniwa duunne. Konni kaꞌaanni oosoꞌne tenne kinna mayira worroonnitero xaꞌmituꞌnero, Yihowahu gondooru taawooti Yordaanoosi tayise sai wote lagu daada agurinota kultinanninsa. Tini kinna tenne maalale qaagiissitannoꞌne!’ Qoleno Iyyaasu kakkalaano uurritinowa lagu mereero 12 kincho uurrisi.

Gedensaannino Iyyaasu gondooru taawoota dukkino kakkalaano, ‘Yordaanoosinni fulle’ yiinsa. Insa fultanni heedheenna lagu bashshonte gede daada hanafi.