Daawitinna Goliyaadi

FILISXEEME Isiraeele qassara galagalte daggu. Sasu bayiruuddu Daawiti roduuwi Saaooli wottaaddara ikkite no. Konni daafira Isseyi mitto barra Daawiti togo yee soyi: ‘Roduuwikkira gidenna tima haadhe haꞌri; noo garano lai.’

Daawiti wottaaddaru noowa iilliti, roduuwasi laꞌꞌara olu base dodi. Hakkiinnino Filisxeemete jigeessi Goliyaadi Isiraeele qacifatara dayi. Goliyaadi 40 barra soodono hawarrono togo qacifatanni keeshshino. Togo yee booꞌni: ‘Ane ledo qasamannoha mitto mancho doorre. Hakku manchi qeelieronna shiiero, ninke borojjeꞌne ikkineemmo. Ani qeelummosironna shuumosiro kayinni, kiꞌne borojjenke ikkitinanni. Ledoꞌya qasamanno mancho uyitinannie gede hasiꞌreemmo.’

Daawiti wottaaddaru giddonni mitoota, ‘Konne Filisxeemete mancho shee, Isiraeele konni saalinni fushshannohura ma uyinanni?’ yee xaꞌmi.

Mittu wottaaddarchi, ‘Saaooli lowo woxe aannosi. Qoleno ilino beettosi galte ikkitasira aannosi’ yee qoli.

Goliyaadi jigeessa ikkino daafira, Isiraeele baalanti lowo geeshsha waajjitino. Goliyaadi hojja 6 cigile (3 meetire) saꞌꞌanno; qoleno wonqosi duhannohu wolu wottaaddari noosi.

Wottaaddaru giddonni mitootu marte Saaoolira Daawiti Goliyaadi ledo qasama hasiꞌranno yite kultusi. Saaooli kayinni Daawiti, ‘Konni Filisxeemete manchi ledo qasama didandaatto. Ati qaaqqoho; isi kayinni anjesinni hanafe wottaaddaraho’ yiisi. Daawitino togo yee qoli: ‘Anniꞌya gereewo ittara dagginore dibinna doobbiichcho shoommo. Konne Filisxeemete manchono insa gede asseemmo. Yihowa kaaꞌlannoe.’ Konni daafira Saaooli, ‘Harixa, Yihowa ledokki ikkona’ yiisi.

Hakkiinnino Daawiti laga dirre onte qunqumadda kinna haare ogorisira wodhi. Hakkunni gedensaanni, corqayesi adhe jigeessu manchi ledo qasamara haꞌri. Goliyaadi iso laiti, xagge assiri. Daawiti shaa hakkeeshsha diqarrissanno yee hedino.

Goliyaadino, ‘Hanni shiqqi yii; maalakki ceatenna moyichchoho eemmona’ yiisi. Daawiti kayinni, ‘Ati anewa bise, qalacconna urde adhite dawootto; ani kayinni Yihowa suꞌminni dawoommohe. Techcho barra Yihowa ate angaꞌyara sayise aanno; anino goowakki gorreemmo’ yii.

Hakkiinnino Daawiti Goliyaadiwa hige dodi. Ogorisinni kincho haare corqayesira wore, wolqasi geeshsha oli. Kinchu Goliyaadi sammo gane kareenna reyi! Filisxeemete daga worbinsa reyinota affuti, baalunku xooqqu. Isiraeeleno insa shorritanni hadhe, ola qeeltu.