Daawitinna Gooliyaadi

Yihowa Saamueeli togo yii: ‘Isseyi minira hadhe oososi giddonni mitto Israeelenniha layinki moote assite buuri.’ Konni daafira Saamueeli Isseyi minira haꞌri. Saamueeli Isseyi ooso giddonni bayiriidi beetto lae, ‘Yihowa doorinohu konneeti’ yee hedi. Yihowa kayinni togo yiisi: ‘Ani dooroommohu dikonneeti. Ani dananna uurrinsha ikkikkinni wodana laeemmo.’

Isseyi wole lee oososi Saamueeliwa abbi. Saamueeli kayinni togo yii: ‘Yihowa kuri giddonni mittono didoorino. Oosokki kageeshshaatilla?’ Isseyi qole, ‘Maaꞌniidi beettiꞌya Daawiti gate no. Isi geꞌreewo allaalara haꞌre no’ yii. Daawiti minira dayita, Yihowa Saamueelira “Dooroommohu konneeti” yii. Hakkiinni Saamueeli Daawiti umira zayite dune albillitte Israeelete moote ikkanno gede buurisi.

Shiima yanna gedensaanni, Israeele Filisxeemete daga ledo olantu; Filisxeemete Gooliyaadi yinannihu jigeessu olamaanchi noonsa. Gooliyaadi Israeele barru baala mishanno. Isi Israeele togo yiino: ‘Ane ledo olamannoha mitto mancho doortine sokke. Isi ane shiiro ninke kiꞌne borojje ikkineemmo. Ani iso shuummoro kayinni kiꞌne ninke borojje ikkitinanni.’

Daawiti olantanni noo roduuwisira sagale haaꞌre, Israeelete olanto noowa mari. Isi Gooliyaadi boolaqiꞌranna macciishshe, “Ani mare isi ledo olameemmo!” yii. Moote Saaooli kayinni ‘Ati qaaqqoho’ yiisi. Daawiti kayinni ‘Yihowa kaaꞌlannoe’ yii.

Saaooli Daawitira olu uduunne uyisi; Daawiti kayinni ‘Rosoommokki daafira kuri uddiꞌre olame diafeemmo’ yii. Daawiti corqaayye adhe laga dirri. Onte qunqumadda kinna haaꞌre ogorisira wodhi. Hakkiinni Daawiti Gooliyaadiwa mari. Kuni jigeessu manchi, ‘Hanni anewa shiqqi yii. Maalakki allaattetenna moyichoho eemmona’ yiisi. Daawiti kayinni bashshi nafa diassino. Isi Gooliyaadi togo yii: ‘Ati bisenna urde adhite dayootto. Ani kayinni Yihowa suꞌminni dayoommo. Ati olantanni noottohu ninke ledo ikkikkinni Maganu ledooti. Koye noori baalunku Yihowara bisenna urde roortanno wolqa noosita affanno. Isi kiꞌne baalanka angankera sayise aanno.’

Daawiti ogorunni mitto kincho fushshe corqaayyete giddo wore wigidiide oli. Daawiti Yihowa kaaꞌlinosi daafira, kinchu Gooliiyaadi alba gane dhoosi. Kuni jigeessu manchi alba hige gombisame uwe reyi. Hakkiinni Filisxeeme lubbonsa adhite xooqqu. Ati Daawiti gede Yihowa addaxxatto?