Hayyichcha Nugusa Salamooni

SALAMOONI nugusa ikki yannara qaaqqoho. Isi Yihowa baxanno; qoleno annisi Daawiti uyinosi amaale haꞌrunsino. Yihowa Salamooni baxino daafira mitto hashsha haaqetenni, ‘Salamooni, ma aammohera baxatto?’ yiisi.

Hakkiinnino Salamooni, ‘Maganoꞌya Yihowa, qaaqqo ikkoommo daafira manna hiitto asse gashsheemmoro diafoommo. Konni daafira mannakki garunni gashsheemmo gede hayyo uyie’ yee qoli.

Yihowa Salamooni xaꞌmirinori hagiirsiisisi. Konni daafira togo yiisi: ‘Lowo diro heeꞌra woyi jiro xaꞌmira agurte hayyo xaꞌmiroottohura, ayino afiꞌrinokki hayyo eemmohe. Xaꞌmiroottokkire jironna ayirrinynye nafa lede eemmohe.’

Shiima yanna gedensaanni lame meenti lowo geeshsha qarrame Salamooniwa mari. Lamente giddo mitte togo yite qarransa kultu: ‘Tini manchonna ani mitto mine heeꞌneemmo. Ani labbaa qaaqqo ilumma; ani ilummahunni sayikkita iseno labbaa qaaqqo iltu. Hakkiinnino mitto hashsha ise qaaqqi reyi. Ani goxe heeꞌreenna, iseha reyino qaaqqo ane mule worte aneha adhitu. Goxoommawiinni baqqi yee reyino qaaqqo laeemma wote, dianeho.’

Tiꞌi mancho qoltannoti, ‘Deeꞌni! Lubbote noo qaaqqi aneho; reyinohu iseho!’ yitu. Umo coyidhuti kayinni, ‘Deeꞌni! Reyinohu ateho; lubbote noohu aneho!’ yite qoltu. Lamenti hatto yaanni heewisami. Xa Salamooni ma assakka?

Salamooni bise abbinasira soyi; bise abbinita, ‘Lubbote noo qaaqqo lamewa murtine, lamentera beekke’ yii.

Qaaqqu ama qoonqose gotti assite, ‘Deeꞌni! Eeggatena qaaqqo hanni shii. Isera uyi!’ yitu. Tiꞌi mancho kayinni, ‘Lamentera uyitooti; lamewa murte beehinke’ yitu.

Goofimarchohono Salamooni, ‘Qaaqqo shitinoonte! Umo coyidhu manchora uyiyye. Qaaqqu ama iseetina’ yii. Salamooni tenne afinohu, qaaqqu ama qaaqqose lowo geeshsha baxxinohura reyannokki gede wole manchora uyinanni gede coyiꞌrasenniiti. Mannu Salamooni konne qarra tirino gara macciishshiti, togooha hayyichcha nugusa afiꞌransanni hagiidhi.

Salamooni gashshooti waro, baatto lowo sindenna hayixe, woyinenna belese hattono wole sagale fushshitanno gede asse Maganu manna maassiꞌri. Hakkawaro mannu dancha uduunne uddiꞌranno; danchu minirano galanno. Mittu mittunku manchira danchuri baalunku woꞌme noosi.