Yihowa Magansiꞌnanniha Qullaawa Mine

Selemooni Israeelete moote ikki gedensaanni Yihowa iso, “Maa aammohera hasiꞌratto?” yee xaꞌmisi. Selemooni togo yee qoli: ‘Ani qaaqqoho. Gashshinanni garano diegennoommo. Ballo mannakki danchu garinni gashsheemmo gede egenno uyie.’ Yihowa togo yiisi: ‘Egenno huucciꞌrootto daafira, uullate aana noo manninni roore egennaamo asseemmohe. Qoleno dureessa ikkatto. Anera hajajamittoro seeda diro heeꞌratto.’

Selemooni qullaawa mine mina hanafi. Isi qullaawa mine culkunni, camotenni, haqqetenninna kinnatenni minino. Lowo kume ikkannohu ogeeyye labballinna meenti qullaawa mine mina kaaꞌlino. Gedensaanni qullaawa mine minne gunde maassinsara kaꞌni. Qullaawu mini giddo kakkallanni dargi no; hakko dargi aana kakkalo worroonni. Selemooni kakkallanni dargira albaanni guluphe togo yee huuccatto assino: ‘Yihowa, kuni qullaawu mini ate dihaarannohe; ikkirono eeggatena kakkalonke adhi; huuccattonkeno macciishshi.’ Qullaawu mininna Selemooni assino huuccatto Yihowa hagiirsiissino? Selemooni huuccatto asse kaꞌꞌanni heeꞌreenna, iiminni giira dirrite kakkallanni dargira noo kakkalo mucuqqi assite ittu. Konni garinni Yihowa qullaawa mine baxinota leellishino. Israeelete manni tenne laiti lowo geeshsha hagiidhino.

Moote Selemooni egennaamo ikkinota Israeelete manninna xeertote heeꞌranno manni afino. Mannu qarrisinonsare Selemoonira kuꞌlanno. Saaba mootitte nafa qarrissanno xaꞌmonni fonqoltasira isiwa martino. Ise Selemooni qolino dawaro macciishshite togo yitino: ‘Gobbaꞌyara heeꞌreenna mannu ate daafira kulinoere diammanoomma; egennokki gobbaꞌyara heeꞌreenna kulloonnieta roortannote; Maganikki Yihowa maassiꞌrinohe.’ Hatte yannara Israeelete daga dancha heeshsho heedhino; hattono hagiirraamma ikkitino. Kayinni insa hatte gedeenni diheedhino.