Yohaannisi Yesuusa Cuui

MANCHOHO umu taalo dagganni noo lemboolcho lai. Hakku manchi Yesuusaati. Xa isira 30 diro ikkinosi. Ledosi noohu kayinni Yohaannisiiti. Albaanni Yohaannisire ronsoommo. Maariyaami fiixase Elsaabeexi laꞌara hadhu wote Elsaabeexi godowi giddo noo qaaqqi hagiidhe kubbinota qaagatto? Hakka wote godowise giddo noo qaaqqi Yohaannisiiti. Yohaannisinna Yesuusi xa ma assitanni no?

Yohaannisi Yesuusa Yordaanoosi Lagira waaho lixise fushshe kaino. Manna cuuꞌnannihu hatto assineeti. Balanxe wayi giddora lixinsanni; hakkiinnino wayi giddonni fushshinanni. Yohaannisi manna cuuanno daafira, iso Cuuaancho Yohaannisi yinanni. Ikkina Yohaannisi Yesuusa cuuinohu mayiraati?

Yohaannisi tenne assinohu, Yesuusi isiwa mare cuuannosi gede xaꞌmirino daafiraati. Yohaannisi assitino bunshera gaabbitino mannoota cuuino. Ikkina Yesuusi bunshe asse egenninoyya? Deeꞌni, horonta diegennino; korkaatuno isi iiminni dayinoho Maganu Beettooti. Konni daafira Yesuusi Yohaannisi cuuannosi gede xaꞌmirinohu wolu korkaatiraati. Hakku korkaati maatiro hanni laꞌno.

Yesuusi Yohaannisiwa marara albaanni, haqqe boce soofannoho. Haqqe boce soofanno manchi haqqa soofe, xaraphpheessa, wombarenna barcima seekkanno. Maariyaami ayiddaanni Yooseefi haqqe boce soofannoho; isi Yesuusano konne looso loosanno gede rosiisinosi. Yihowa kayinni Beettosi uullara soyinohu haqqe boce soofara diꞌꞌikkino. Beettisi loosanno gede hasiꞌrinohu mittu baxxino loosi no; hakkawote konne looso loosannoti yanna iillite no. Konni daafira Yesuusi Annisi baxannore assara dayinota leellishate, Yohaannisi cuuannosi gede xaꞌmiri. Maganu tennenni hagiidhinokka?

Ee hagiidhino; korkaatuno Yesuusi cuuame wayi giddonni fulita, iiminni togo yitanno huuro daggino: ‘Isinni tashshi yaannoehu, Beettiꞌya konneeti.’ Qoleno iimi faꞌnameenna, tini lemboolcho Yesuusi aana dirritu. Ise lemboolcho labbolla ikkinnina addu lemboolcho diꞌꞌikkitino. Ise Maganunniho qullaawa ayyaanaati.

Xa Yesuusi heeshshi gotti asse hedannohu lowo coyi noosi daafira, mannu nookki base haꞌre 40 barra keeshshi. Hakko heeꞌreenna Sheexaanu isiwa mari. Sheexaanuno Yesuusi Maganu seeri gobbaanni ikkino coye assanno gede assate sase hige woꞌnaali. Yesuusi kayinni togoo coye diassino.

Hakkunni gedensaanni, Yesuusi noowiinni hige shiimu manninni xaadi; hakku mannino Yesuusire umi harunsaano woyi rosaano ikki. Hakko manni giddo gamu suꞌmi Indiriyaasi, Pheexiroosi (wolu suꞌmisi Simooniiti), Filiphphoosinna Naatinaeeli (wolu suꞌmisi Bertelemewoosiiti) yinannireeti. Yesuusinna kuri haaruuddu rosaano Galiilu awuraajja hadhu. Galiila martuti, Qaana yinanni katamira fooliishshidhu; Naatinaeeli ilaminohu hakko katamiraati. Hakkiichchono Yesuusi sargete minira haꞌri; sargete mineno umi maalale assi. Mayi maalale assinoro afootto? Waa woyinete xajjera soorrino.