Yesuusi Mesihicha Ikki

Yohaannisi, ‘Ane rooru daanni no’ yee sabbakanni keeshshino. Yesuusi 30 diro ikkisita, Galiilunni Yordaanoosi Laga haꞌrino; hakkiicho Yohaannisi manna cuuanni no. Yesuusi, Yohaannisi cuuasira hasiꞌrino; Yohaannisi kayinni, ‘Anella ati cuuattoena ani ate dicuueemmohe’ yii. Yesuusi Yohaannisira, ‘Yihowa ati ane cuuattoera hasiꞌranno’ yiisi. Konni daafira, insa Yordaanoosi Laga eꞌu; hakkiinni Yohaannisi Yesuusa wayi giddo lixise fushshino.

Yesuusi cuuame kai gedensaanni huuccatto assiꞌri. Hatte yannara gordu faꞌnameenna Maganu ayyaani Yesuusi aana lembooli gede ikke dirri. Hakkiinni Yihowa iima heeꞌre togo yii: “Hagiirsiisattoehu baxeemmo Beettiꞌya ateeti.”

Yihowa ayyaani Yesuusi aana dirrita, isi Mesihicha woy Kiristoosa ikkino. Xaate Yesuusi Yihowa uullate aana loosi yiinosi looso loosa dandaanno.

Yesuusi cuuame kaꞌꞌanni heeꞌrenni, halallira haꞌre 40 barra keeshshi. Isi hakkiinni higiti, Yohaannisiwa mari. Yohaannisi Yesuusi isiwa hige daanna lae, ‘Alamete cubbo hoolannohu Maganu Geꞌrechi isooti’ yii. Yohaannisi togo yiinohu mannu Yesuusi Mesihicha ikkinota afanno gedeeti. Yesuusi halalla heeꞌreenna mayi ikkinoro afootto? Aante noo xaggera tenne daafira ronseemmo.