Usuru Mininni Fultu

USURU mini saanqa fananni noo sokkaancho lai. Sokkaanchu usuru mininni fushshanni noori Yesuusi hawaariyaateeti. Insa usurantanno gede assinonsahu maatiro hanni laꞌno.

Yesuusi rosaanora qullaawu ayyaani dirrinku shiima yannalla saꞌino. Hakkunni gedensaanni mayi kalaqamikka? Mitto barra Pheexiroosinna Yohaannisi Yerusaalame Maganu minira hadhu. Martanno wote, ilaminku kayise laanshaawinohu mittu manchi nafara no. Maganu minira daanno manna woxe huucciꞌranno gede, barru baala mannu iso duhe hakka abbanno. Isi Pheexiroosinna Yohaannisi laiti, woxe uyitasira huucciꞌri. Kuri lamu hawaariyaate ma assitukka?

Insano uurrite konne buxichcho mancho laꞌu. Hakkiinnino Pheexiroosi togo yiisi: ‘Woxu dinoe; nooere kayinni eemmohe. Yesuusi suꞌminni gotti yite haꞌri!’ Hakkiinnino Pheexiroosi qiniitichcho angasinni amadisi; manchuno kubbe kae haꞌrami. Mannu tenne laiti, lowo geeshsha xagge assiri; qoleno tenne maalalenni hagiidhi.

Pheexiroosino togo yii: ‘Ninke tenne maalale assinoommohu, Yesuusa reyotenni kayisino Magani wolqanniiti.’ Isinna Yohaannisi tenne coyidhanni heedheenna, ammaꞌnote cimeeyye daggu. Pheexiroosinna Yohaannisi Yesuusi reyotenni kainota mannaho kultanni noo daafira, cimeeyye hanqitu. Hakkiinnino amadde usuru minira eessitunsa.

Layinki barra ammaꞌnote cimeeyye songo songitu. Tini cimeeyye Pheexiroosinna Yohaannisi insa hursitu manchi ledo songonsawa abbitu. Hakkiinnino, ‘Tenne maalale assitinannihu mayi wolqanniiti?’ yite lamenka xaꞌmitu.

Tenne maalale assitinohu Yesuusa reyotenni kayisino Magani wolqanni ikkinota Pheexiroosi kulinsa. Kuri kakkalaano tini hagiirsiissanno maalale ikkitinota kaada dandiitannokki daafira, assitannori bainsa. Konni daafira lamenka layinkita Yesuusire coyidhinoonte yite haꞌrissunsa.

Barru lexxanni haꞌri kiiro hawaariyaate Yesuusire farciꞌranna xiwantinore hursa diagurtino. Assitino maalale duduwi gobba baala iilli. Konni daafira Yerusaalamete qooxeessira noo katammanni lowo manni xiwamino manna hursitanno gede hawaariyaatenniwa abbi. Ammaꞌnote cimeeyye konninni hinaasse, hawaariyaate amadde usuru minira eessitu. Ikkollana hawaariyaate usuru mine lowo yanna dikeeshshitino.

Koye misilete aana laꞌꞌattonte gede, hashsha Maganu sokkaanchi daye usuru mini saanqa fani. Sokkaanchuno togo yiinsa: ‘Hadhine Maganu mine uurritine, konne qaale mannaho kulle.’ Layinki soodo ammaꞌnote cimeeyye hawaariyaate abbanno gede manna sokkanno wote, insa fulte kaꞌino. Hakkiinnino sonki mannooti hawaariyaate Maganu mine rosiissanna affe, Sanihediriini yinanni songo hoowe abbitu.

Ammaꞌnote cimeeyye hawaariyaate togo yitunsa: ‘Layinkita Yesuusire rosiissinoonte yine seekkine kulloommoꞌne. Kiꞌne kayinni rosoꞌne Yerusaalame wonshitini.’ Hawaariyaateno, ‘Ninke mannunni roore Maganoho hajajama hasiissannonke’ yite qoltu. Konni daafira “dancha duduwo” mannaho kulansa diagurtino. Kuni ninkera dancha lawishsha diꞌꞌikkino?