Hoolansara Dandiinohu Dino

Mittu lekka laanshaawino manchi barru baala qullaawu mini xullichira ofolle huucciꞌranno. Mitto barra, isi Pheexiroosinna Yohaannisi qullaawa mine eꞌanna lae, ‘Woxe uuyyeꞌꞌe’ yee huucciꞌri. Pheexiroosi togo yii: ‘Woxe roorinore eemmohe. Yesuusi suꞌminni kaꞌe haꞌri!’ Pheexiroosi amade kayiseenna manchu kae qaafa hanafi. Mannu tenne maalale lae lowo geeshsha hagiidhino; hattono lowo manni Kiristaana ikkino.

Farisootunna Seduqootu kayinni lowo geeshsha hanqitu. Insa soqqamaasine Ayihudete songowa massite, ‘Konne mancho hursitinanni gede wolqa uyinoꞌnehu ayeti?’ yite xaꞌmitunsa. Pheexiroosi, ‘Ninkera wolqa kiꞌne shitinihu Yesuusi Kiristoosi uyinonke’ yii. Ammaꞌnote murrooti ‘Yesuusi suꞌma gana agurre!’ yite cancitu. Soqqamaasine kayinni, ‘Diagurreemmo; isi daafira coyiꞌra hasiissannonke’ yitu.

Pheexiroosinna Yohaannisi hakkiinni fultanni heedhenni wole rosaanowa marte ikkinore kultunsa. Insa gamba yite, ‘Yihowa, waajjinummokkinni loosokki loosa dandiineemmo gede kaaꞌlinke’ yite huuccidhu. Yihowa qullaawa ayyaana uyinonsa daafira, sabbakanna xiwamino manna hursa diagurtino. Konni daafira lowo manni Kiristaana ikkino. Seduqootu hinaassino daafira soqqamaasine amadde usurtunsa. Ikkollana Yihowa hashsha sokkaasincho soyenna, sokkaasinchu usuru mini cufana fane soqqamaasine, ‘Hadhine qullaawa mine noo mannira rosiisse’ yiinsa.

Layinki soodo Sanihediriini yinannihu yoote mini murrootira togo yine kullinsa: ‘Usuru mini waalchi cufame no; usurtini manni kayinni fulino! Insa qullaawa mine marte manna rosiissanni no!’ Xaano soqqamaasine amadde Sanihediriini songowa massitunsa. Kakkalaanote biili, ‘Yesuusi suꞌminni coyidhinoonte yine kuloommoꞌne’ yii. Pheexiroosi kayinni togo yee qoli: “Mannaho hajajamantenni Maganoho hajajama hasiissannonke.”

Ammaꞌnote murrooti lowo geeshsha hanqitino daafira, soqqamaasine shaate heddu. Hakkiinni mittu Gamaaliyaali yinanni Farisichi kae uurre togo yii: ‘Konni manni aana assitinannire layidhinanni asse! Maganu insa ledo nooha ikkara dandaanno. Maganu ledo giwama hasidhinannini?’ Insano isi yiinonsare macciishshitu. Soqqamaasine siqqotenni gantu gedensaanni, layinkita sabbakkannokki gede kulte haꞌrissunsa. Ikkollana soqqamaasine sabbaka diagurtino. Insa waajjitukkinni dancha duduwo qullaawa minenna minunni mine hadhe sabbakkino.