Phaawuloosiha Haaro Kaaꞌlaancho Ximootewosi

HAWAARIYA PHAAWULOOSI ledo noohu kuni wedellichchi Ximootewosiiti. Ximootewosi ayiddisi ledo Lisxiraho heeꞌranno. Amasi suꞌmi Ewunqeeti; ahaahesi suꞌmi kayinni Loyidaati.

Phaawuloosi Lisxira haꞌranna tini sayikkite. Mitto diro meddi yitanno yanna albaanni, Phaawuloosinna Barnabaasi farcidhanni hakka martino. Xa kayinni Phaawuloosi Sillaasi ledo galagale hakka marino.

Phaawuloosi Ximootewosi mayyaanni nooro afootto? ‘Sillaasinna ane ledo haꞌra baxatto? Fafo gobbara noo mannira farciꞌra kaaꞌlattonkena’ yaanni no.

Ximootewosino, ‘Ee, haꞌra baxeemmo’ yii. Hakkiinnino Ximootewosi ayiddesi agure, hakkawotenni Phaawuloosinna Sillaasi ledo haꞌri. Insa haꞌrinshore ronsammora albaanni, Phaawuloosira mayi qarri iillinosiro hanni laꞌno. Phaawuloosi Demaasqo haꞌranna Yesuusi leellisinkunni 17 diro ikkino.

Hakkawote Demaasqo haꞌrinohu Yesuusi rosaano gawajjara ikkinota qaagi; xa kayinni isi umisi Yesuusi rosaanchooti! Gedensaannino, gama diinna Phaawuloosi Yesuusire farciꞌrannota gibbino daafira shitasira hasidhu. Ikkollana rosaano Phaawuloosi reyotenni gatanno gede kaaꞌlitusi. Iso qafichchote worte katamu huxxira gobbaanni dirrissu.

Gedensaannino Phaawuloosi farciꞌrara Antsookiya haꞌri. Umo Yesuusi rosaano Kiristaanaho yinoonnihu hakkooti. Hakkiinnino Phaawuloosinna Barnabaasi Antsookiyunni fushshine wole faffe noo gobbara farcidhanno gede sonki. Insa hadhino gobba giddo mitte, Ximootewosi heeꞌrinote Lisxiru gobbaati.

Phaawuloosi mitto diro meddi yitanno yanna gedensaanni, layinki farciꞌrote haꞌrinshosira galagale Lisxira mari. Ximootewosi Phaawuloosinna Sillaasi ledo haꞌri wote, mitteenni hiikka hadhuro afootto? Misilete aana noo kaarta laꞌeenna, hanni insa hadhino bayichchi giddo gama laꞌno.

Umo, lowo geeshsha fafinokkiha Iqooniyoni yinanni katama hadhu; hakkiinnino layinki katama Antsookiya iillitu. Hakkunni gedensaanni, Xiroaada yinanniwa hadhu; hakkiinnino Filiphphisiyusi, Teselonqenna Beeriyu katama hadhu. Kaartu aana Ateena yinanni katama laitto? Phaawuloosi hakko katamirano farciꞌrino. Hakkunni gedensaanni Qorontoosi katamira farcidhanni mitto dironna darate keeshshitu. Gedensaannino Efesooni katamira shiima yanna keeshshitu. Hakkiinnino yowolotenni galagalte Qeesaariya marte, Antsookiya hadhu; Phaawuloosino hakko heeꞌri.

Konni garinni, Ximootewosi “dancha duduwo” duduwatenna haammata Kiristaanu songo kalaqate Phaawuloosi kaaꞌlanni lowo kume kiilomeetire ikkitanno doogo haꞌrino. Ati lowoha ikkittoro, Ximootewosi gede Maganoho ammanamootto soqqamaancho ikkatto?