Kiristaanu Ammaꞌno Halaꞌlitu

Soqqamaasine Yesuusi hajajinonsa garinni, dancha duduwo uulla woꞌmate dudubbino. Antsookiyaho noo roduuwi 47 M.D., Phaawuloosinna Barnabaasi sabbakkanno gede wolewa sokkino. Lamunku Shiimiidi Iisiyi giddo, Derbe, Lisxiranna Iqooniya yinanniwa diinaggaabbe sabbakkino.

Phaawuloosinna Barnabaasi manna baalaho yaano buxaneteno dureeyyeteno, jajjabbahono shiimmaaddahono sabbakkino. Lowo manni Kiristoosi daafira kulloonninsa halaale macciishshe adhino. Phaawuloosinna Barnabaasi, Qophiroosi gashshaanchi Sergewoosi Phaawuloosi yinanni manchira sabbakkuta, mittu kiilaanchi insa sabbaka agurtanno gede assate woꞌnaali. Phaawuloosi kiilaanchoho, “Maganu anga gantannohe” yii. Bayichonko kiilaanchu ille balli. Gashshaanchu Sergewoosi Phaawuloosi tenne laiti Kiristaancho ikkino.

Phaawuloosinna Barnabaasi base baalate sabbakkino; insa minunni mine hadhe, dikkote, dooggatenna xaadu minnara sabbakkino. Insa Lisxiraho laanshaawino mancho hursitino; tenne maalale laino manni insa magano labbeennansa magansiꞌrate hedi. Phaawuloosinna Barnabaasi kayinni, ‘Ninkeno kiꞌne gedee mannaatina, Magano calla magansidhe!’ yitu. Mitu Ayihudooti dagge, mannu Phaawuloosi shaanno gede kakkayissu. Hakkiinni mannu Phaawuloosi kinnatenni gani; insa reyinoha laweennansa goshooshe katamu giddonni fushshino. Ikkollana Phaawuloosi direyino! Hakkawoyintenni roduuwu dagge galagalte katamu giddora haadhe hadhinosi. Yannate gedensaanni Phaawuloosi Antsookiya higino.

Phaawuloosi 49 M.D. sabbakara wolewa haꞌrino. Isi Shiimiidi Iisiyira heedhanno roduuwa towaati gedensaanni, dancha duduwo Awuroppaho duduwino. Isi Ateena, Efesooni, Filiphisiyusi, Teselonqenna wolewa haꞌrino. Silaasi, Luqaasinna wedellichu beetti Ximootewoosi Phaawuloosi ledo hadhino. Insa songuwa xintatenna xintantino songuwa jawaachishate ledosi loossino. Phaawuloosi Qorontoosira noo roduuwa jawaachishanni hakko mitto dironna lee agana keeshshino. Isi sabbakino, rosiisino, hattono duucha songuwara sokka borreessino. Isi dunkaanano gowanno. Yannate gedensaanni Phaawuloosi Antsookiya higino.

Phaawuloosi 52 M.D., Shiimiidi Iisiyinni kae sabbakara sayikkimeeshsho haꞌrino. Isi aliyye widoonni Filiphisiyusi geeshshanna wororritte Qorontoosi geeshsha haꞌrino. Phaawuloosi rosiisanni, xiwantinore hursanninna songo kaaꞌlanni Efesooni katamira haammata diro keeshshino. Qoleno isi mitte rosu addaraashe giddo barru baala lallawo shiqishanno. Lowo manni isi rosiisinore macciishshe heeshshonsa biddi assiꞌrino. Phaawuloosi duucha gobbara dancha duduwo duduwi gedensaanni Yerusaalame haꞌrino.