Hegerera Heeꞌra Dandiineemmo Gara

TINI qaaqqonna jaallase nabbabbanni noohu hiikko maxaafaatiro afootto? Qullaawu Maxaafi Xagge Roseemmo Maxaafaꞌya yinanniha, konne ati nabbawatto maxaafa nabbabbanni no. Qolteno insa tenne ati nabbawattota, “Hegerera Heeꞌra Dandiineemmo Gara” yitanno xagge nabbabbanni no.

Insa marichcho rossanni nooro afootto? Umo, hegerera heeꞌrate Yihowarenna Beettisi Yesuusire afa hasiissannota rossanni no. Qullaawu Maxaafi togo yaanno: ‘Hegerera heeꞌra dandiinannihu, mittu halaalaanchu Maganirenna isi uullara soyinohure Yesuusi Kiristoosire rosatenniiti.’

Maganu Yihowarenna Beettisi Yesuusire rosa dandiineemmohu hiittoonniiti? Umo assine, konne Qullaawu Maxaafi Xagge Roseemmo Maxaafaꞌya yinanni maxaafa uminni kayinse qaccete geeshsha nabbawa hasiissannonke. Kuni maxaafi Yihowarenna Yesuusire lowore kulanno; dihattooti? Qoleno insa konni albaanni assitinorenna konni kaꞌa assitannoha lowo coye kulanno. Ikkollana konne maxaafa nabbawa calla ikkikkinni wolurino assineemmori no.

Kuneeti uulla nooha wole maxaafa laitto? Kuni Qullaawa Maxaafaati. Qullaawu Maxaafi giddonni, konni maxaafi xagge noo bayichcho mannu nabbawannohe gede assiri. Qullaawu Maxaafi assa hasiissannonkere seekke kulannonke daafira, Yihowara garunni soqqamatenni hegere heeshsho afiꞌra dandiineemmo. Konni daafira Qullaawa Maxaafa barru baala nabbawa hasiissannonke.

Ikkollana Maganu Yihowarenna Yesuusi Kiristoosire rosa calla diꞌꞌikkitanno. Insarenna rosiissino roso seekkine anfoommo daafira calla, hegere heeshsho afiꞌneemmo yaa diꞌꞌikkino. Woluri hasiisannori maatiro afootto?

Ronsoommo rosi garinni heeꞌra hasiissannonke. Asqorootu Yihuda qaagatto? Yihuda, Yesuusi hawaariyaatesi ikkitara doorino 12 manni mereero nooho. Yihuda Yihowarenna Yesuusire lowore afino. Ikkollana maa assinoro qaagatto? Shiima yanna gedensaanni isonooto baxannoha ikki; hakkiinnino Yesuusa 30 birrira diinnasira hiri. Konni daafira Yihuda hegere heeshsho diafiꞌranno.

Xagge 69⁠te ronsummoha Giyaazi yinanni mancho qaagatto? Giyaazi isiha ikkinokki uduunnenna woxe adhara hasiꞌrino. Konne uduunne adhara yee kaphphi. Konni daafira Yihowa qorichchishinosi. Ninkeno higgesi ayirrisa hoongummoro, Yihowa qorichchishannonke.

Ikkollana Yihowara ayeewoteno ammaname soqqaminohu lowo manni no. Ninke hakko manni gedeere ikka hasiꞌneemmo; dihasiꞌneemmo? Qaaqqu Saamueeli dancha lawishsha ikkannonke. Xagge 55⁠te ronsummonte gede, Saamueeli Yihowara xaadooshshu dunkaanisira soqqama hanafi wote shoole woyi onte dirolla ikkannosi. Konni daafira ayee geeshshano qaaqqo ikkittoro, Yihowara soqqamate diajatto.

Ikkollana ninke baalinke roorsine harunsa hasiꞌneemmohu Yesuusi Kiristoosiiti. Xagge 87⁠te ronsummonte gede, Yesuusi shiimu heeꞌrenni Maganu minira mare iimi Annisire wolootaho kulino. Ninkeno isi lawishsha harunsino. Baxillu Maganinke Yihowarenna Beettisi Yesuusi Kiristoosire, dandiinummo geeshsha manna baalaho kullo. Konne baala assineemmoha ikkiro, uullate aana Maganu abbanno haaro gannatera hegerera heeꞌra dandiineemmo.