Durriissa Reyitinori Lubbote No Yite Kaphphitanno

Qullaawu Maxaafi Sheexaane “manna duuchcha soꞌrisiisannohu” yaanno. (Ajuuja 12:9) Sheexaanunna durriissasi Maganu Qaale, Qullaawa Maxaafa ammannammora dihasidhanno. Mannu, reyitinori ayyaanaame alamera ikkitino basera heedhanno yee ammananno gede assate woꞌnaaltanno. Hanni togo assitannohu hiitoonniitiro laꞌno.

Kaphphu Ammaꞌna

Batinynye ammaꞌna mittu manchi maalisi reyihu gedensaanni ayyaanaame alame hadhe heedhannoti lubbo noosi yite rosiissanno. Maalu reyaanno lubbo direyitanno yitanno. Hakkii saꞌeno, lubbo reyitukkinni hegerera heedhanno yite morontanno.

Ikkollana Maganu Qaali togo yee dirosiisanno. Qullaawu Maxaafi manchu umisi lubbo ikkinnota ikkinnina manchu giddo lubbo no diyaanno. Lawishshu gede, Qullaawu Maxaafi Addaami kalaqamare coyiranni: “Yihowa Maganu mancho bushshunni kalaqi, sanosi giddono heeshshote foole eessi, hakkunni gedensaanni manchuno heeshsho noosi lubbo ikki” yaanno. (Kalaqo 2:7) Konni daafira Addaami umisi lubbote ikkinnina dilubbo uyinoonnisi.

Saadano lubbote yaamantanno.—Kalaqo 1:20, 21, 24, 30.

Qullaawu Maxaafi “lubbo” yaanno Qaali mancho umosiiti, konni daafira lubbo reyitannota ikkitinota rosanke dimaalaꞌlissannote. Qullaawa Borro:

• “Cubbo loossanno lubbo ise reyitanno” yitanno.—Hiziqeeli 18:4.

• “Samsoonino: ‘Lubboꞌya Filisixeemaawete ledo reyito’” yiinno.—Mesaafinti 16:30.

• ‘Yihudootu fooliishsho Barra Seerinke garinni assate fajjinoonnihu maati? Seekkatenso bushiishate? Lubbo gatisatenso woy kayinni shaate?’—Maarqoosi 3:4.

Wolu Qullaawa Borro qummeeshshino lubbo baꞌannota (Kalaqo 17:14), bisetenni reyitannota (Iyyaasu 10:37), qalxantannotanna (Iyyoobi 7:15), wayinni egemmantannota (Yoonaasi 2:5) xawisanno. Konni daafiˈra, lubbo reyitanno.

Qullaawa Maxaafa kaimunni kayisse goofimarchu geeshsha nabbawittoro “lubbo direyitanno” yaanno qaale horonta diafatto. Manchu lubbo diayyaanaho. Lubbo direyitanno yaanno rosi Qullaawu Maxaafi roso diꞌꞌikkinno. Kuni rosi Sheexaanunna durriissasiho. Yihowa kaphphu ammaꞌna roso baala giwanno.—Lawishsha 6:16-19; 1 Ximootewosi 4:1, 2.

Busha Ayyaanna Woshshitannori

Sheexaanu manna sorisiissannoti wole doogo busha ayyaanna woshshitannori ragaanniiti. Busha ayyaana woshshannohu yaa durriisatewinni sokka haaꞌra dandaannoho yaate. Batinynyu mannino ikko, busha ayyaanna woshshitannori uminsa, togoo sokka dagganohu reyino manni ekeranniiti yite ammantanno. Ikkollana, kuni dandaamannokkire ikkinota Qullaawu Maxaafinni laꞌnoommo.—Mekibibi 9:5, 6, 10.

Togoo sokka dagganohu ayeoowinniitiya? Uminsa durriisatewiinniiti! Durriissa manchu heeshshote noo yannara coyiranno gara, danasi, loosinore, afinore seekkite afa dandiitanno. Konni daafira reyino mancho lawa insara shotarichchooti.—1 Saamueeli 28:3-19.

Kaphphu Duduwo

Sheexaanu reyino manni lubbote no yee kaphpho halashshannoti wole doogo kaphphu duduwooti. Togoo duduwi manna Qullaawu Maxaafi halaalinni gedensitte qolanno.—2 Ximootewosi 4:4.

Afrikaho reyitu gedensaanni leeltu yinanni manniri batinynyu duduwi duduwamanno. Reyino manchi leelli yinannihu alba heeꞌranno basenni fafeeti. Ikkollana umokki togo yite xaꞌmi: ‘Manchoho reyotenni kaꞌꞌate wolqa heedhoommesiro, maatesiwiinninna jaallasiwiinni xeertirinowa kaꞌꞌanno yaa garaho?ˈ

Ledeno, leelli yini manchi reyi yini mancho lawannohura calla reyote kainoho yaate dandiinanni? Lawishshaho, lamu Kiristaanooti Maganu Qaale gaxarete dudubbanni heedheenna mittu geerchi seeda saate badhensaanni harunsinsa. Mayiraatiro xaꞌmitusita, insa giddo mittu shiimu diri albaanni reyino rodoosi laweennasi ikkinota kulinsa. Kuni manchi kayinni addinta sorino, ikkollana sorosi diammanino. Kuni geerchi jaallasiranna qachchisi mannira mayyee duduwannoro hedi!

Ajuuja, Haaqenna Qoonqo

Mannu wosincho ikkinnore laꞌnummo, macciishshinummo woy haaqiiꞌnummo yaanna macciishshittokki digatootto. Togooti rosantinokki ikkito tuncaabbannonsa manni waajjitanno. Galchimi Afrikira heedhannota, Maareena yinannita ganynyite hashsha hashsha reyitino ahaahese woshshitannase macciishshitanno. Maareenano tenne qoonqo macciishshite bararraaqqe raartanno wote, maatese baala masse kaꞌanno. Yannate gedensaanni, Maareena surre ammadante iseneente habbu.

Reyitinori heeshshote nooha ikkoommero baxxanno fiixansa bararraaqissanno yaa garaho? Deeꞌni digaraho. Togoo gawajjitanno sokka buichcho durriissate.

Jawaachchishshannonna kaaꞌlitannota labbanno sokkare mayinara dandiinanni? Lawishshu gede, Seeraaliyoonete heedhannoti Giibaaseeyi yinanniiti xissante heedhe haaqete reyino annase laꞌu. Anniseno hadhe mitte haqqichonni darcho hiiqqite, waaho cuuꞌe agganno gede kulise. Togo assasera albaanni ayeerano kultannokki gede hajajise. Iseno yiino gede assite hurtu.

Wole manchono minaannise reyihu gedensaanni mitto barra leellinnoseta coyidhino. Biifenna dancha uddano uddire nooha laoomma yitino.

Togoo sokkanna ajuuja danchanna horo uyitannota labbanno. Ikkollana Maganuwiinni dagginote yaa dandiinanni? Horonta didandiinanni. Yihowa “halaalu Maganooti.” (Faarso 31:5) Isi ninke didogannonke woy digowwisannonke. Togo assitannori durriissate.

Ikkollana dancha durriissa no? Deeꞌni dino. Yannate geeshsha kaaꞌlitannore labbe leelturono, baalunku bushuulleho. Sheexaanu Heewani coyishiishi yannara jaala lawe shiqino. (Kalaqo 3:1) Ikkollana iso macciishshite yinota assitu yannara maikkitu? Reyitino.

Xagaraamu manchi jaala lawe shiqe gowwisanna doga rosaminoreeti. Mittu Afriku manni maammaashshi “Hinko waajjo, wodana kolishsho,” yaannonte gede Maganu Qaalino: ‘Sheexaanu xawaabbu soqqamaancho lawara umosi soorrannoˈ yaanno.—2 Qorontoosi 11:14.

Yannankera Maganu manna hasaawisannohu haaqete, ajuujate woy ayyaanaame alamenni dagganno qoonqo ragaanni diꞌꞌikkino. Isi manna massagannohunna rosiisannohu mitto mancho ‘danchu loosi duuchchaho qixxaawinoha ikkanno gedeˈ assanno Qullaawu Maxaafi ragaanniiti.— 2 Ximootewosi 3:16, 17.

Yihowa, Sheexaanu Daawuloosi buutaamo diina ikkinota afinohura, dogannonkekki gede qorophphisiissanonkehu baxannonkehuraati.