Maganunnire Rosa Hasiissannohe

Maganu jaala ikkate, isire rosa hasiissannohe. Jaallakki suꞌmakki affino? Hattono suꞌmikkinni woshshitannohe? Ee woshshitannohe. Hatteente gede, Maganu suꞌmasi afattoranna ganattora hasiꞌranno. Suꞌmisino Yihowaati. (Faarso 83:18; Maatewoosi 6:9) Hakkii saeno baxannorenna giwannore rosa hasiissannohe. Jaallasinna diinnasi badde afa hasiissannohe. Mitto mancho seekke afate yanna hasiissanno. Qullaawu Maxaafi Yihoware yanna adhine rosa busullete yaanno.—Efesooni 5:15, 16.

Maganu jaalla iso hagiirsiisannore assitanno. Hanni jaallakkire hedi. Jaallakkira busha akata leellishattoha ikkironna baxxannokkire assattoha ikkiro jaaloomiꞌne sufanno? Disufanno. Hattonni, Maganu jaala ikkate, iso hagiirsiisannore assa hasiissannohe.—Yohaannisi 4:24.

Maganu ledo jaaloonsiissannoheti dibaalanti ammaꞌnaati. Maganoho muli jaali Yesuusi lame doogore coyiꞌrino. Mitte doogo halaꞌladotenna lowo manni haꞌrannote. Goofimarchiseno baote. Wole doogo kayinni ruukkashshotenna shiimu manni haꞌrannote. Tini doogo hegere heeshshowa massitannote. Togo yaano Maganu ledo jaalooꞌma hasiꞌrittoro iso magansiꞌnannita halaalaancho doogo badde afate rosa hasiissannohe yaate.—Maatewoosi 7:13, 14.