Halaalaancho Ammaꞌna Anfanni Doogo

Maganu jaala ikka hasiꞌrittoro, Magano hagiirsiissanno ammaꞌna harunsa hasiissannohe. Yesuusi ‘halaalunni magansidhannori’ Magano, “halaalu” ledo sumuu yaanno garinni magansidhanno yiino. (Yohaannisi 4:23, 24) Magano halaalunni magansiꞌnanni doogo mitte callate. (Efesooni 4:4-6) Halaalaancho ammaꞌna hegere heeshshowa massagganno, kaphu ammaꞌna kayinni baote widira massagganno.—Maatewoosi 7:13, 14.

Harunsanno manna laꞌe halaalaancho ammaꞌna badde afa dandaatto. Yihowa dancha ikkinonte gede, iso halaalunni magansidhannorino dancha ikka hasiissannonsa. Dancha abukaatote haqqicho dancha abukaatote guma laaltannonte gede, halaalaancho ammaꞌnano dancha manna laaltanno.—Maatewoosi 7:15-20.

Yihowa jaalla Qullaawa Maxaafa lowo geeshsha ayirrissanno. Qullaawu Maxaafi Maganu ayyaaninni borreessaminota ammantanno. Konni daafira heeshshonsa massagara, qarransa tidhate aanno amaale loosu aana hosiisatenna Maganunnire rosate kaaꞌlannonsa gede fajjaameeyyete. (2 Ximootewosi 3:16) Mannaho rosiissannore loosu aana hosiisate woꞌnaaltanno.

Yihowa jaalla insa insaneewa baxantanno. Yesuusi Maganunnire rosiisenna xiwantinore hurse, mannaho baxillu noosita leellishino. Halaalaancho ammaꞌna harunsitannori hattonni woloota baxxanno. Yesuusi gede insano buxane woy wole gaꞌre ikkitinore woffi assite dilaꞌanno. Yesuusi rosaanosi mannu bade afannohu mereeronsa heeꞌranno baxillinniiti yiino.—Yohaannisi 13:35.

Maganu jaalla, Yihowa yaamamannoha suꞌmasi ayirrissanno. Suꞌmakki woshsha hasiꞌrannokki manchi muli jaala ikkahera dandaanno? Didandaanno! Jaalu heeꞌrinkero suꞌmasi gana diginbeemmo; isinni konni jaalinke danchumma wolootaho kulleemmo. Hattonni Maganu jaalla ikkitara hasidhannori suꞌmasi horoonsiꞌranna wolootahono isire duduwa hasiissannonsa. Yihowa hatto assinammora hasiꞌranno.—Maatewoosi 6:9; Roomu Sokka 10:13, 14.

Yesuusi gede, Maganu jaalla mannaho Maganu Gashshootire rosiissanno. Maganu Gashshooti uulla gannate assannoho iimi gashshooteeti. Maganu jaalla konne Maganu Gashshootiha dancha duduwo wolootaho dudubbanno.—Maatewoosi 24:14.

Yihowa Farciꞌraasine Maganu jaalla ikkate woꞌnaaltanno. Qullaawa Maxaafa ayirrissanno, hattono mimmitu ledo baxantanno. Leddeno Maganu suꞌma horoonsidhannonna ayirrissanno, Maganu Gashshootireno wolootaho rosiissanno. Yannankera uullate aana halaalaancho ammaꞌna harunsitanni noori Yihowa Farciꞌraasineeti.