Magano Hagiirsiissanno Ammaꞌna

1. Magano garunni magansiꞌnummoro mayi atoote afiꞌneemmo?

MAGANU YIHOWA ninkera lowo geeshsha assaawanno; qoleno isi baxillunni aannonke biddishsha harunsine horo afiꞌnammora hasiꞌranno. Iso gara ikkitino doogonni magansiꞌneemmoha ikkiro hagiirraamma ikkineemmo; hattono heeshshonke giddo iillannonkeha lowo qarra gatisa dandiineemmo. Qoleno Yihowa atootenna kaaꞌlosi afiꞌneemmo. (Isayyaasi 48:17) Ikkollana, Maganunnire halaale rosiinseemmo yitannoti batinynye ammaꞌna no. Ikkeennano, kuri ammaꞌna Maganu ayiimmanna isi ninkewiinni hasiꞌrannore lainohunni rosiissanno rosi lowo geeshsha babbaxxinoho.

2. Yihowa magansiꞌnannita garu doogo bande afa dandiineemmohu hiittoonniiti? Tenne huwatate kaaꞌlannonke lawishsha kuli.

² Yihowa magansiꞌnannita garu doogo afa dandaattohu hiittoonniiti? Baalanti ammaꞌna rosiissanno roso baala xiinxallanna heewisiisa dihasiissannohe. Qullaawu Maxaafi halaalaancho ammaꞌna lainohunni rosiisanno halaale afa calla ikkitanno. Lawishshaho, duuchcha gobbara kaphphu birra qixxeessite doggannori woꞌmitino. Hattooha kaphphu birra badate looso uyinihero, hiissite badatto? Kaphphu birri baalu hiittoohoro xiinxallattoni? Deeꞌni. Hatteentenni, addu birri hiittoohoro xiinxalla lowo horo afidhino. Addu birri hiittoohoro buuxitto gedensaanni, kaphphu birra bada dandaatto. Hatteente gede, halaalaancho ammaꞌna bande anfeemmo gara ronseemmo wote, kaphphunnitino hiittootero bada dandiineemmo.

3. Yesuusi yiino garinni, Maganu albaanni ayirrinynye afiꞌrate ma assa hasiissannonke?

³ Yihowa hagiidhanno garinni iso magansiꞌranke lowo geeshsha hasiissannote. Duuchchu mannira, baalanti ammaꞌna Magano hagiirsiissanno yitanno hedo noonsa. Qullaawu Maxaafi kayinni hatto yee dirosiisanno. Wole agurranna, ani Kiristaanaho yaa calla diguddanno. Yesuusi togo yiino: ‘“Mootichcha, Mootichcha” yaannoehu duuchchu iimi mangiste eannoha diꞌꞌikkino; iimi mangiste eannohu iima noo Anniꞌya fajjo assannoho.’ Konni daafira, Maganu albaanni ayirrinynye afiꞌrate Maganu ninkewiinni hasiꞌrannore rosanna assa hasiissannonke. Yesuusi Maganu fajjo assannokki manna, ‘finqilaasine’ yiino. (Maatewoosi 7:21-23) Kaphphu birri gede, kaphphu ammaꞌnano mitto waaga diafidhino. Hakkiinni saꞌeno togoo ammaꞌna lowo geeshsha gawajjitanno.

4. Yesuusi lame doogore coyiꞌrino qaali mayi tiro afiꞌrino? Mitte mittenti doogo mayinniwa massitanno?

⁴ Yihowa uullate aana noo manni baalu hegere heeshsho afiꞌranno faro fanino. Ikkeennano Gannatete giddo hegere heeshsho afiꞌrate, Magano garunni magansiꞌranna iso hagiirsiisanno garinni heeꞌra hasiissannonke. Batinynyu manni kayinni tenne assate dihasiꞌranno; kuni dadillisannoreeti. Konni daafira Yesuusi togo yiino: ‘Ruukkashsho waalcho eꞌe; [korkaatuno] baote widira massanno waalchi halaꞌladoho, doogono lowote; hakka eanno mannino lowoho. Heeshshote widira massanno waalchi kayinni ruukkashshoho, doogono lowo geeshsha shaaladote; afiꞌranno mannino shiimaho.’ (Maatewoosi 7:13, 14) Halaalaancho ammaꞌna hegere heeshshowa massitanno. Kaphphu ammaꞌna kayinni baonniwa massitanno. Yihowa mittu manchi nafa baꞌꞌara dihasiꞌranno; bayichcho baalaho noo manni halaale rosanno gede kaayyo aanni noohuno iseraati. (2 Pheexiroosi 3:9) Konni daafira, Magano magansiꞌneemmo doogo heeshshonniwa woyi reyonniwa massitannonke.

HALAALAANCHO AMMAꞌNA BANDE ANFANNI DOOGO

5. Halaalaancho ammaꞌna harunsanno manna bande afa dandiineemmohu mayinniiti?

⁵ ‘Heeshshonniwa massitanno doogo’ afiꞌra dandiinannihu hiittoonniiti? Yesuusi halaalaancho ammaꞌna, harunsannose manni heeꞌranno heeshshonni baxxite leeltannota coyiꞌrino. Isi togo yiino: “Insa baddine [affinannihu guminsanniiti].” “Dancha haqqichcho duuchcha dancha guma laaltanno.” (Maatewoosi 7:16, 17) Wole yaattonni, halaalaancho ammaꞌna harunsanno manni ammanansanninna akatinsanni baxxe leellanno. Halaalaancho ammaꞌna harunsitannori, guunte noonsakkirenna sodhannore ikkiturono, gaamote deerrinni Maganu fajjo assate jawaattanno. Hanni halaalaancho ammaꞌna harunsanno manna bade afate kaaꞌlannonkeha lee coye laꞌno.

6, 7. Maganu soqqamaano Qullaawu Maxaafira mayi lao noonsa? Tenne hajo lainohunni Yesuusi lawishsha ikkinohu hiittoonniiti?

⁶ Maganu soqqamaano rosiissanno rosi Qullaawu Maxaafi aana xintaminoho. Qullaawu Maxaafi umisi togo yaanno: ‘Maganu manchi keeraanchonna danchu loosi duuchchaho qixxaawinoha ikkanno gede, Maganu ayyaani noo Borro duuchcha rosiisatenna [seejjate], wodana suwisatenna [xalallete] noo amaalerano kaaꞌlitanno.’ (2 Ximootewosi 3:16, 17) Hawaariya Phaawuloosi Kiristaanu roduuwisira togo yee borreessino: “Ninkewiinni macciishshitinoonniha Maganu qaale adhitini yannara . . . mannu qaali gede ikkikkinni Maganu qaali gede assitine [adhitinoonni].” (1 Teselonqe 2:13) Konni daafira, halaalaancho ammaꞌna harunsanno manni ammananna assooti, mannu hedonna woga aana xintaminoha diꞌꞌikkino; hatteentenni Maganu Qaali yaano Qullaawu Maxaafi aana xintaminoho.

⁷ Yesuusi Kiristoosi Maganu Qaale horoonsiꞌre rosiisatenni dancha lawishsha ikkino. Isi iimi Annisiwa huuccatto assiꞌri yannara, ‘Qaalikki halaaleho’ yiino. (Yohaannisi 17:17) Yesuusi Maganu Qaale ammananno; qoleno rosiisino rosi baalu Qullaawa Borro ledo sumuu yaannoho. Yesuusi duuchcha wote Qullaawa Borronni xiqise qummi assanno. (Maatewoosi 4:4, 7, 10) Hatteente gede, xaa yannara noori Maganu soqqamaano uminsa hedo dirosiissanno. Insa Qullaawu Maxaafi Maganu Qaale ikkinota ammantanno; qoleno rosiissanno rosi woꞌmunni woꞌma Maganu Qaali aana xintaminoho.

8. Yihowa magansiꞌra maa assa mitteenni amaddanno?

⁸ Halaalaancho ammaꞌna harunsitannori, Yihowa calla magansidhanno; hattono suꞌmasi egensiissanno. Yesuusi togo yiino: “Maganokki Yihowa calla magansiꞌri; isira calla qullaawa soqqansho shiqishi.” (Maatewoosi 4:10, NW) Konni daafira, Maganu soqqamaano Yihowa agurranna wole mittono dimagansidhanno. Yihowa magansiꞌra, Maganu suꞌma wolu mannira egensiisanna Maganu hiittoohoro kulano mitteenni amaddanno. Faarso 83:18 togo yitanno: “Suꞌmakki Yihowa yinannihu ati callu uulla woꞌmate aana Ayirradoho.” Yesuusi wolu manni Magano afanno gede assatenni dancha lawishsha ikkino. Isi huuccatto assiꞌranni togo yiino: “Alamete giddonni oottoe mannira suꞌmakki egensiisoommonsa.” (Yohaannisi 17:6, NW) Hatteente gede, xaa yannara noori halaalaancho ammaꞌna harunsitanno mannooti mannaho Maganu suꞌma, alaamasinna akatasi kultanno.

9, 10. Addu Kiristaani mimmitinsara baxillu noonsata leellishshannohu hiittoonniiti?

⁹ Maganu soqqamaano mimmitinsa ledo lubbora baxantanno; qoleno umonsa diroorsidhanno. Yesuusi togo yiino: “Kiꞌne kiꞌneneewa baxantiniro ane rosaano ikkitinoonnita mannu duuchchu [konninni afanno].” (Yohaannisi 13:35) Hundi Kiristaani mereero togoo baxilli no. Maganu Qaali aana xintamino baxilli, sirchu, gosatenna gobbate badooshshe qeele, diigantannokkite addu roduuwi mittimmanni manna xaadisanno. (Qolasiyaasi 3:14) Kaphphu ammaꞌna harunsitanno mannooti togoota baxillu noo rodiimma diafidhino. Tenne mayinni anfeemmo? Kuri mannooti gosate woyi sirchu badooshshe korkaata assite mimmito shitanno. Halaalunni Kiristoosi harunsitannori kayinni Kiristaana roduuwansa woyi wole manna shaate olu massaara diqodhitanno. Qullaawu Maxaafi togo yee xawisanno: ‘Maganu oosonna Sheexaanu ooso bande anfannihu togoonniiti: danchare assannokkihunna rodoosi baxannokkihu duuchchu Maganu beetto diꞌꞌikkino. . . . Ninke ninkeneewa baxammo; bunshetenni kainohunni rodoosi shiinohu Qayeeli gedeere ikkinoonke.’—1 Yohaannisi 3:10-12; 4:20, 21.

¹⁰ Addu baxille yaa kayinni, manna shaa hooga calla diꞌꞌikkitino. Halaalunni Kiristoosi harunsitanno mannooti honqooqooꞌmitukki yannansanni, wolqansanninna woxinsanni roduuwansa kaaꞌlitanno; qolteno jawaachchishshanno. (Ibiraawuyaani 10:24, 25) Qarru yannara mimmitonsa kaaꞌlitanno; qoleno mannaho ammanantinoreeti. Isinni ‘manna duuchchaho danchare assate’ yite Qullaawu Maxaafi amaale loosu aana hosiissanno.—Galatiya 6:10.

11. Maganu ninke gatisannohu Yesuusi Kiristoosi widoonni ikkinota ammana hasiissannohu mayiraati?

¹¹ Addu Kiristaani, Maganu ninke gatisannohu Yesuusi Kiristoosi widoonni ikkinota ammantanno. Qullaawu Maxaafi togo yaanno: “Gato afiꞌnannihu isinniiti ikkinnina isi kaꞌa wolu ayino dino. [Korkaatuno] mannu gatara Maganu uyinohu uullate aana wolu suꞌmi dino.” (Soqqamaanote Looso 4:12) Fooliishsho 5 aana ronsummonte gede, Yesuusi hajajamanno mannira heeshshosi wodo asse uyino. (Maatewoosi 20:28) Hakkiinni saeno Yesuusi, Maganu iimi Mangistera moohisino Nugusaati; isi uulla woꞌmate moohanno. Maganu, hegere heeshsho ragira hasiꞌnummoro Yesuusira hajajammammoranna isi rosiisino roso loosu aana hosiinsammora hasiꞌranno. Konni daafira Qullaawu Maxaafi togo yaanno: ‘Beetto ammanannohura hegere heeshsho noosi. Beetto ammanannokkihu kayinni heeshsho diafiꞌranno.’—Yohaannisi 3:36.

12. Alamete gaamo ikka hoogate mayinni xeertiꞌra hasiissannonke?

¹² Addu Kiristaani alamete gaamo diꞌꞌikkino. Yesuusi Roomu gashshaanchi Philaaxoosi albaanni firdete shiqi wote, “Ane gashshooti tenne alameha diꞌꞌikkino” yiino. (Yohaannisi 18:36) Halaalunni Yesuusa harunsitanno mannooti ayee gobbarano heedhuro, iimi Mangistesira maahoyye yite galtanno; konni daafira alamete poletiku hajora horonta anga diwodhitanno. Insa poletiku giddora eꞌe mitte gaamora dihaꞌlitanno. Ikkollana Yihowa magansiꞌranno manni, poletiku paarte doora woyi doorama lainohunni wolu manni haja giddora dieanno. Maganu soqqamaano poletiku hajora anga wodhitannokkiha ikkirono, higge ayirrissanno. Mayira? Korkaatuno Maganu Qaali, “aleenni higge noo” gashshaanora ‘maahoyye yite galtanno’ gede hajajannonsa. (Roomu Sokka 13:1) Maganu asse yaanno coyinna poletiku gashshooti asse yaanno coyi xaadannokki yannara addu Kiristaani biꞌree hawaariyaate lawishsha harunsanno. Insa togo yitino: “Ninke mannunkunni roorsine Maganoho hajajammeemmo.”—Soqqamaanote Looso 5:29; Maarqoosi 12:17.

13. Yesuusa halaalunni harunsitannorira Maganu Mangiste lainohunni mayi lao noonsa? Konni daafira insa ma assitanno?

¹³ Halaalunni Yesuusa harunsitannori, mannu ooso hexxo Maganu Mangiste calla ikkitinota sabbakkanno. Yesuusi togo yee masaalino: “Daga duuchchate naqaashe ikkanno gede, kuni [Maganu] Mangistehu danchu duduwi uulla woꞌmate sabbakamanno; hakkiinnino goofimarchu daanno.” (Maatewoosi 24:14, NW) Halaalunni Yesuusi Kiristoosi harunsitannori, qarranke tirtannonke yee mannu alamete gashshaano hexxo assiꞌranno gede dijawaachchishshanno. Hatteentenni mannu ooso hexxo Maganu Mangiste calla ikkitinota dudubbanno. (Faarso 146:3) Yesuusi hakku guutu gashshooti daara huucciꞌneemmo gede rosiisanni togo yiino: “Gashshootikki dayo, fajjokki iima ikkitino gede, uullano ikkito.” (Maatewoosi 6:10) Maganu Qaali tini iimi Mangiste “kuri mangistubba baala [xa noore] daakkanno hattono huntanno; ise kayinni hegerera uurritanno” yee masaalino.—Daanieeli 2:44.

14. Halaalaancho ammaꞌna assa hasiissannosere assitanni noo ammaꞌna hiitteeti yite ammanatto?

¹⁴ Kageeshsha ronsummo rosi garinni ateneeto togo yite xaꞌmi: Rosiissanno rosi baalu Qullaawu Maxaafi aana xintaminorinna Yihowa suꞌma egensiissannori hiitte ammaꞌna harunsitannoreeti? Maganu hajajino garinni baxille leellishshannori, Yesuusa ammantannota leellishshannori, alamete gaamo ikkitinokkirinna mannu ooso hexxo Maganu Mangiste calla ikkitinota dudubbannori hiitte ammaꞌna harunsitannoreeti? Uullate aana noo ammaꞌna duuchchante giddo, konne baala assitannoti hiitte ammaꞌnaati? Taje leellishshanno garinni, konne baala assitannoti Yihowa Farciꞌraasine ammaꞌnaati.—Isayyaasi 43:10-12.

MA ASSATE HEDOOTTO?

15. Maganu, isi noota ammana calla ikkikkinni wole maa assinammora hasiꞌranno?

¹⁵ Maganu noota ammana calla iso hagiirsiisate baqe diꞌꞌikkitino. Qullaawu Maxaafi isinni, agaaninte nafa Maganu noota ammantanno yee kulanno. (Yaaqoobi 2:19, NW) Ikkeennano anfoommonte gede, agaaninte Maganu fajjo diassitanno; hattono isi albaanni ayirrinynye diafidhino. Maganu albaanni ayirrinynye afiꞌrate, isi noota ammana calla ikkikkinni fajjosino assa hasiissannonke. Qoleno kaphphu ammaꞌna agure fulanna halaalaancho ammaꞌna seekke cuꞌmira hasiissannonke.

16. Kaphphu ammaꞌna ledo karsama lainohunni ma assa hasiissannonke?

¹⁶ Hawaariya Phaawuloosi kaphphu ammaꞌnawiinni xeertiꞌra hasiissannonketa xawisino. Isi togo yee borreessino: “Mootichchu Maganu, ‘Mereerinsanni fultine [baxxitinoonnire] ikke’ yaanno. Ledeno, ‘batte ikkinorichcho kissinoonte, anino haaꞌreemmoꞌnena.’” (2 Qorontoosi 6:17; Isayyaasi 52:11) Konni daafira, addu Kiristaani kaphphu ammaꞌna ledo fiixooma afiꞌrino coyi baalunkuwiinni xeertiꞌranno.

17, 18. “Bayira Baabilooni” maati? ‘Isewiinni rahe fula’ hasiissannohuna mayiraati?

¹⁷ Duuchchanti kaphphu ammaꞌna mitteenni “Bayira Baabilooni” gaamo ikkitinota Qullaawu Maxaafi xawisanno.a (Ajuu[j]a 17:5) Kuni suꞌmi, Nohi yannahu Baote Wayi gedensaanni kaphphu ammaꞌna jammartinoha Baabiloonete katama qulli assannonke. Xaa yannara kaphphu ammaꞌna giddo halaꞌle noo rosinna assooti xintaminohu biꞌre Baabiloonete katamiraati. Lawishshaho, Baabiloonete gosa sillaase yinanni magano magansidhannoreeti. Xaa yannara duuchcha ammaꞌnara qara ikkino rosi Sillaase rosooti. Qullaawu Maxaafi kayinni halaalaanchu Magani mitto calla yaano Yihowa ikkinotanna Yesuusi Kiristoosi kayinni Beettosi ikkinota xawise kulanno. (Yohaannisi 17:3) Qoleno Baabiloonete gosa, mannu reyanno wote reyitukki gattanno lubbo nootanna hatti lubbo giirate giddora eessineenna qarrantanno yite ammantanno. Yannankera rooriidi ammaꞌna, reyitannokkitinna sioolete giira eꞌe qarrantanno lubbo woyi fooli no yaanno roso rosiissanno.

¹⁸ Biꞌree Baabiloone ammaꞌna gobba baalate halaꞌlitino daafira, xaati Bayira Baabiloone alamete deerrinni noota kaphphu ammaꞌna mitteenni riqibbanno. Maganu tini alamete deerrinni nooti addi additi kaphphu ammaꞌna hedeweelcho baꞌannota masaalino. (Ajuu[j]a 18:8) Bayira Baabiloone gaamo ikkitinotenni duuchchante ammaꞌnanni baxxite fula hasiissannohehu mayiraatiro xa wodanchitto? Maganu Yihowa yanna gooffukkinni ‘ise giddonni rakke fulattora’ hasiꞌranno.—Ajuu[j]a 18:4.

19. Yihowara soqqamatenni mayi atoote afiꞌratto?

¹⁹ Kaphphu ammaꞌna agurte fulittoro mitu manni atewa aana agurara dandaanno. Ikkollana Yihowara mannisi ledo soqqamattoha ikkiro, aguratto coyinni lowo geeshsha roorinore afiꞌratto. Yesuusa harunsate yite addi addi coye agurtinori biꞌree rosaano gede, atino gedensaanni ammanate roduuwa afiꞌratto. Miliyoonetenni kiirranniha addu Kiristaana amaddinotera alamete hanqafo maatera miila ikkatto; kuri roduuwi ateno lubbora baxxannohe. Qoleno “dagganno [alamera]” hegere heeshsho afiꞌrattoti hagiirsiissanno hexxo heedhannohe. (Maarqoosi 10:28-30) Ammanakki korkaatinni atewiinni xeertidhu mannooti miteekkite mitto barra Qullaawu Maxaafi rosiisannore xiinxallitaranna Yihowa magansidhannore ikkitara dandiitanno.

20. Halaalaancho ammaꞌna harunsitannori muli yanna giddo mayi atoote afidhanno?

²⁰ Qullaawu Maxaafi, Maganu tenne busha alame muli yanna giddo hune Mangistesi gashshitannota keeraancho haaro alame abbannota rosiisanno. (2 Pheexiroosi 3:9, 13) Hatti alame lowo geeshsha hagiirsiissannota ikkitanno! Qoleno hattee keeraancho haaro alamera, mitte halaalaancho ammaꞌna calla heedhanno. Halaalunni Magano magansidhannori ledo magansiꞌrate hasiissannohe qaafo xaanni jammarte adhakki busulle dilabbannohe?